អ៊ីរ៉ង់ តវ៉ានឹងគម្រោងសាងសង់ទំនប់វារីអគ្គិសនី របស់តួកគី នៅលើដងទន្លេអារ៉ាស
ការគ្រប់គ្រងនឹងប្រើប្រាស់ធនធានទឹក កំពុងតែក្លាយជាបញ្ហាទំនាស់ការទូត រវាងតួកគី និង អ៊ីរ៉ង់។ លោករដ្ឋមន្ត្រីការបរទេសអ៊ីរ៉ង់ បានបញ្ជាក់ឲ្យដឹងថា រដ្ឋាភិបាលលោកបានបង្ហាញការជំទាស់ ចំពោះគម្រោងសាងសង់ទំនប់វារីអគ្គិសនី ដែលតួកគីចង់សាងសង់លើដងទន្លេអារ៉ាស (Aras) ទន្លេដែលហូរកាត់តួកគី ព្រមទាំងជាព្រំដែនពុះចែករវាង អ៊ីរ៉ង់ និង អាម៉េនី។ រវាង អ៊ីរ៉ង់ និង តួកគី គឺគ្មានកិច្ចព្រមព្រៀងណាមួយ ដើម្បីគ្រប់គ្រងធនធានទឹករួមគ្នាទេ។
ចុះផ្សាយនៅថ្ងៃ៖
ស្តាប់ - ០២:៣៣
យោងតាមការចុះផ្សាយ របស់ទីភ្នាក់ងារព័ត៌មាន Irna កាលពីថ្ងៃអង្គារ នៅចំពោះអង្គសភាអ៊ីរ៉ង់ លោក Hossein Amir-Abdoullahian រដ្ឋមន្ត្រីការបរទេសអ៊ីរ៉ង់ បានថ្លែងថា ការដែលតួកគី សាងសង់ទំនប់នៅលើដងទន្លេដែលហូរឆ្លងព្រំដែន គឺវាជារឿងមិនអាចទទួលយកបានទេ ហើយអ៊ីរ៉ង់នឹងធ្វើការប្រឆាំងតវ៉ា។
លោកប្រមុខការបរទេសអ៊ីរ៉ង់ បានបន្ថែមថា លោកបានលើកឡើងពីបញ្ហានេះ ជាមួយសមភាគីតួកគី ចំនួន៣លើករួចហើយ រវាង៣ខែមកនេះ ដោយជួបនិយាយគ្នាផ្ទាល់នៅទីក្រុងញូយ៉ក នៅតេអេរ៉ង់ និងបានទូរស័ព្ទនិយាយគ្នាបន្ថែមទៀត។ លោកបានទាមទារឲ្យភាគីតួកគី ត្រូវតែពិចារណាឡើងវិញឲ្យបានច្បាស់ ទាក់ទិននឹងគម្រោងសាងសង់ទំនប់ នៅលើដងទន្លេអារ៉ាស។ លោករដ្ឋមន្ត្រីការបរទេសអ៊ីរ៉ង់ បានទទួលស្គាល់ដែរថា ដោយគ្មានកិច្ចព្រមព្រៀងគ្រប់គ្រងធនធានទឹក រវាងអ៊ីរ៉ង់ និងតួកគី លោកក៏បានស្នើឲ្យបង្កើតគណកម្មាធិការចម្រុះមួយ ដើម្បីឲ្យភាគីទាំង២ធ្វើការរួមគ្នាក្នុងវិស័យនេះ។
សូមបញ្ជាក់ថា ទន្លេអារ៉ាស (Aras) មានប្រភពនៅលើខ្ពង់រាបភាគខាងកើតតួកគី ហើយហូរកាត់មក ពុះចែកជាព្រំដែនធម្មជាតិ រវាងតួកគីអាម៉េនី រវាងអ៊ីរ៉ង់ និងអាម៉េនី រវាងអ៊ីរ៉ង់ និងអាហ៊្សែបៃហ្សង់ មុននឹងហូរទៅជួបនឹងទន្លេ Kura ហើយបន្ទាប់មកហូរចូលទៅក្នុងសមុទ្រកាសព្យែន។
ខ្ពង់រាបតួកគី គឺជាប្រភពនៃដងទន្លេដ៏សំខាន់ៗមួយចំនួន ដូចជាទន្លេ Tigre និងទន្លេ Euphrate ដែលប្រទេសផ្សេងទៀតនៅខាងក្រោមរំពឹងយ៉ាងខ្លាំង។ អ៊ីរ៉ាក់ និងស៊ីរី ដែលទទួលផលរួមគ្នា ពីទន្លេទាំង២នេះ បានចុះហត្ថលេខានៅឆ្នាំ១៩៩៧ ផ្តល់សច្ចាប័ន ដល់សន្ធិសញ្ញាអង្គការសហប្រជាជាតិគ្រប់គ្រងដងទន្លេ។ ដោយឡែក តួកគី និង អ៊ីរ៉ង់ មិនបានចុះហត្ថលេខាទេ។ សន្ធិសញ្ញានេះ បានចែងកំណត់អំពីការតព្វកិច្ចគោរពគ្នាទៅវិញទៅមក បែងចែក ប្រើប្រាស់ ដោយស្មើភាពគ្នា នូវធនធានទឹក រវាងប្រទេសក្បែរខាងដែលមានដងទន្លេហូរកាត់។
គួរកត់សំគាល់ថា ធនធានទឹកនៅតាមដងទន្លេគឺជាបញ្ហាសំខាន់ណាស់ សម្រាប់ប្រទេសក្នុងតំបន់ដើមបូព៌ា ដែលក្តៅហួតហែង សំបូរវាលខ្សាច់។ កន្លងមក តួកគី និង អ៊ីរ៉ង់ ធ្លាប់បានសាងសង់ទំនប់ជាច្រើន បង្កឲ្យប៉ះពាល់ផងដែរ ដល់អ៊ីរ៉ាក់ និងស៊ីរី ដែលស្ថិតនៅខាងក្រោម។ បញ្ហាប្រើប្រាស់ធនធានទឹក ការសាងសង់ទំនប់ ដោយគ្មានការគោរពចំពោះប្រទេសក្បែរខាង ពីសំណាក់តួកកីនៅពេលនេះ អាចក្លាយជាចំណុចចាប់ផ្តើមថ្មីមួយ នៃវិបត្តិការទូតរវាងតួកគី និងអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ