អ៊ីស្រាអែល ប្រាប់ពលរដ្ឋខ្លួនកុំឲ្យទៅតួកគី ខ្លាចក្រែងរងការវាយប្រហាររបស់ចារកិច្ចអ៊ីរ៉ង់
ប៉ុន្មានថ្ងៃចុងក្រោយនេះ យោងតាមអាជ្ញាធរអ៊ីស្រាអែល គឺមានករណីប៉ុនប៉ងវាយប្រហារជាច្រើនករណី ត្រូវបានធ្វើឡើងដោយក្រុមចារកិច្ចរបស់អ៊ីរ៉ង់ ធ្វើទៅលើប្រជាជនអ៊ីស្រាអែល នៅទីក្រុងអ៊ីស្តង់ប៊ូល ប្រទេសតួកគី។ ការប៉ុនប៉ងវាយប្រហារ ដែលត្រូវបានអាជ្ញាធរតួកគី ទប់ស្កាត់បានទាន់ពេលវេលា។ រដ្ឋាភិបាលអ៊ីស្រាអែល កាលពីថ្ងៃចន្ទ ទី១៣មិថុនា បានចេញសេចក្តីប្រកាស ហាមឃាត់កុំឲ្យពលរដ្ឋខ្លួន ធ្វើដំណើរទៅតួកគី និងហៅឲ្យអ្នកដែលកំពុងស្ថិតនៅទីនោះ ត្រូវចាកចេញជាបន្ទាន់។
ចុះផ្សាយនៅថ្ងៃ៖
ស្តាប់ - ០២:៤៧
ដោយយោងទៅលើករណីប៉ុនប៉ងវាយប្រហារបែបភេរវកម្ម ជាច្រើនករណី បង្កឡើងដោយចារកិច្ចអ៊ីរ៉ង់ ធ្វើទៅលើពលរដ្ឋអ៊ីស្រាអែល ដែលទៅកំសាន្តនៅក្រុងអ៊ីស្តង់ប៊ូល រដ្ឋាភិបាលអ៊ីស្រាអែល សូមប្រកាស ប្រាប់ទៅពលរដ្ឋអ៊ីស្រាអែលទាំងអស់ ត្រូវចៀសវៀង កុំធ្វើដំណើរទៅអ៊ីស្តង់ប៊ូល។ ចំពោះអ្នកដែលបានទៅដល់ហើយ ត្រូវប្រញាប់ត្រឡប់ចូលស្រុកវិញជាបន្ទាន់។ នេះគឺជាអ្វីដែលមានសរសេរ ក្នុងលិខិតប្រកាស របស់លោក Yaïr Lapid រដ្ឋមន្ត្រីក្រសួងការបរទេសអ៊ីស្រាអែល ចេញថ្ងៃទី១៣មិថុនា។
លោករដ្ឋមន្ត្រីការបរទេសអ៊ីស្រាអែល បានលើកឡើងអំពីវា គ្រោះថ្នាក់ ដែលមានជាក់ស្តែង បង្កឡើងការករណីប៉ុនប៉ងសំលាប់ និងករណីចាប់ពង្រត់ជាដើម។ លោកបានថ្លែងអរគុណ ដល់អាជ្ញាធរតួកគី ដែលបានជួយសង្គ្រោះជីវិតពលរដ្ឋអ៊ីស្រាអែល ពីការវាយប្រហារ របស់ចារកិច្ចអ៊ីរ៉ង់។ បន្ថែមពីនេះ លោក Yaïr Lapid បានប្រកាសគំរាមថា នរណាក៏ដោយ ឲ្យតែហ៊ានរំខានដល់សន្តិសុខ អាយុជីវិត របស់ប្រជាពលរដ្ឋអ៊ីស្រាអែល អ្នកនោះនឹងរកការវាយប្រហារតបវិញពីអ៊ីស្រាអែល ទោះស្ថិតនៅទីណាក៏ដោយ។
គួរបញ្ជាក់ថា យោងតាមការចុះផ្សាយរបស់បណ្តាញព័ត៌មានអ៊ីស្រាអែល ក្នុងរវាងប៉ុន្មានសប្តាហ៍ចុងក្រោយនេះ មានករណីប៉ុនប៉ងវាយប្រហារជាច្រើន មកលើអ្នកទេសចរណ៍ជាតិអ៊ីស្រាអែល នៅទីក្រុងអ៊ីស្តង់ប៊ូល ប្រទេសតួកគី។ តែការវាយប្រហារនេះ ត្រូវបានទប់ស្កាត់បានទាន់ពេលវេលា ដោយមានការសហការ រវាងមន្ត្រីជំនាញសន្តិសុខអ៊ីស្រាអែល និងតួកគី។
គួររំលឹកដែរថា អ៊ីស្រាអែល និងអ៊ីរ៉ង់ គឺជាសត្រូវនឹងគ្នា ដែលតែងតែធ្វើសសកម្មភាពវាយប្រហារគ្នា ទាំងចេញមុខ ទាំងកំបាំងមុខ។ អ៊ីរ៉ង់ ចោទអ៊ីស្រាអែល ថាជាអ្នកធ្វើគ្រប់យ៉ាង ដើម្បីបំផ្លាញកិច្ចព្រមព្រៀងនុយក្លេអ៊ែរអ៊ីរ៉ង់ ហើយចង់ឲ្យអ៊ីរ៉ង់រងទណ្ឌកម្មសេដ្ឋកិច្ចពីសហគមន៍អន្តរជាតិជារៀងដរាប។ អ៊ីស្រាអែល វិញបានចោទអ៊ីរ៉ង់ថា គឺជាគ្រោះថ្នាក់តំបន់ ព្រោះអ៊ីរ៉ង់ បាននិងបន្តបញ្ជូនអាវុធ ទៅឲ្យក្រុមហេសបូឡាលីបង់ ព្រមទាំងក្រុមអាម៉ាសប៉ាឡេស្ទីន។
កាលពីថ្ងៃទី២២ ឧសភា មេបញ្ជាការកងប្រតិបត្តិការក្រៅប្រទេស របស់ក្រុមឆ្មាំបដិវត្តអ៊ីរ៉ង់ម្នាក់ ឈ្មោះ Sayyad Khodai ត្រូវបានគេបាញ់សម្លាប់នៅជាយក្រុងតេអេរ៉ង់។ ភាគីអ៊ីរ៉ង់អះអាងថាជាស្នាដៃរបស់ចារកិច្ចអ៊ីស្រាអែល។ ទន្ទឹមគ្នានេះ អ៊ីស្រាអែល បានបើកប្រតិបត្តិការវាយប្រហារទៅលើទីតាំងមួយចំនួន ដែលគេអះអាងថាជាទីតាំងយោធានិងឃ្លាំងស្តុកអាវុធរបស់អ៊ីរ៉ង់នៅក្នុងទឹកដីស៊ីរី។ ជាក់ស្តែងកាលពីថ្ងៃសុក្រសប្តាហ៍កន្លងទៅ អ៊ីស្រាអែលបានបាញ់មីស៊ីលទៅលើព្រលានយន្តហោះក្រុងដាម៉ាស បណ្តាលឲ្យខូចផ្លូវយន្តហោះចុះឡើងមួយ។ យោងតាមអ៊ីស្រាអែល អ៊ីរ៉ង់បានដឹកជញ្ជូនអាវុធ ទៅជួយក្រុមហេសបូឡាលីបង់ តាមរយៈជើងយន្តហោះអាកាសចរណ៍ស៊ីវីល ចុះនៅក្រុងដាម៉ាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ