អ៊ីរ៉ង់៖ទីក្រុង និងខេត្តជាង ៥០ត្រូវបានបំពាក់ដោយប្រព័ន្ធការពារប្រឆាំងនឹងការវាយប្រហារពីក្រៅ
នៅក្នុងប្រទេសអ៊ីរ៉ង់ ក្រសួងការពារជាតិបានប្រកាសឲ្យដឹងថា មានទីក្រុង និងខេត្តជាង ៥០ ត្រូវបានរដ្ឋាភិបាលបំពាក់ប្រព័ន្ធការពារដើម្បីប្រឆាំងទប់នឹងការវាយប្រហារជីវសាស្រ្ត វិទ្យុសកម្ម និងគីមជាយថាហេតុពីក្រៅ។ ការប្រកាសរបស់ក្រសួងការពារជាតិនេះបានធ្វើឡើងដោយអនុរដ្ឋមន្រ្តីការពារជាតិឧត្តមសេនីយមេឌី ហ្វារ៉ាហ៊ី និងត្រូវបានចុះផ្សាយដោយ Iribnews ដែលជាគេហទំព័រទូរទស្សន៍រដ្ឋកាលពីយប់ថ្ងៃសៅរ៍ ទី៣ កញ្ញា។
ចុះផ្សាយនៅថ្ងៃ៖
ស្តាប់ - ០២:២២
ដោយមិនបាននិយាយសំដៅលើការវាយប្រហារពីប្រទេសណាមួយ អនុរដ្ឋមន្រ្តីការពារជាតិអ៊ីរ៉ង់លោកហ្វារ៉ាហ៊ីបានត្រឹមបញ្ជាក់ថា ប្រព័ន្ធការពារដែលរដ្ឋាភិបាលបានដាក់តាំងនៅក្នុងទីក្រុង និងខេត្តចំនួន ៥១ មាននាទីចាប់អត្តសញ្ញាណ ឃ្លាំមើល និងស្ទាក់បាញ់កម្ទេចលើរាល់ការវាយប្រហារជីវសាស្រ្ត វិទ្យុសកម្ម និងគីមីគ្រប់ប្រភេទ។ គួររម្លឹកថា នៅក្នុងសង្រ្គាមរវាងអ៊ីរ៉ង់ និងអ៊ីរ៉ាក់ចន្លោះឆ្នាំ ១៩៨០ និង ១៩៨៨ មេដឹកនាំផ្តាច់ការអ៊ីរ៉ាក់កាលណោះគឺសាដាំ ហ៊ូសេនបានប្រើអាវុធគីមីទ្រង់ទ្រាយធំវាយប្រហារលើអ៊ីរ៉ង់។ ក្នុងថ្ងៃទី២៨ មិថុនា ឆ្នាំ ១៩៨៧ ទីក្រុង Sardasht របស់អ៊ីរ៉ង់បានក្លាយជាផ្ទាំងស៊ីបនៃការវាយប្រហារដោយអាវុធគីមីរបស់អ៊ីរ៉ាក់ដែលបណ្តាលឲ្យមានមនុស្សស្លាប់ចំនួន ១១៩នាក់ និងរបួសចំនួន ១ ៥១៨នាក់។
ផ្តើមចេញពីព្រឹត្តិការណ៍សោកសង្រេងមួយនេះ អតីតរដ្ឋមន្រ្តីការពារជាតិអ៊ីរ៉ង់លោកអាមៀ ហាតាមីធ្លាប់បានថ្លែងក្នុងខែមីនា ឆ្នាំ ២០២១ ថា ប្រទេសរបស់លោកត្រូវតែត្រៀមដើម្បីការពារខ្លួនប្រឈមទប់នឹងការវាយប្រហារជាយថាហេតុទោះជាការវាយប្រហារនុយក្លេអែរ ជីវសាស្រ្ត ឬមួយគីមី។ សូមជម្រាបថា មិនមែនជារឿងចៃដន្យទេដែលរដ្ឋអំណាចអ៊ីរ៉ង់បានសម្រេចបំពាក់ប្រព័ន្ធការពារនៅក្នុងទីក្រុង ខេត្តចំនួន ៥១ នៅពេលនេះ។ មិនចៃដន្យ ព្រោះចំពេលដែលអ៊ីរ៉ង់កំពុងបន្តការចរចាជាមួយក្រុមប្រទេសមហាអំណាចដើម្បីស្រោចស្រង់កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ឡើងវិញ ប្រទេសអ៊ីស្រាអែលដែលជាសត្រូវស៊ូពូជរបស់អ៊ីរ៉ង់បានបន្តប្រឆាំងយ៉ាងដាច់អហង្ការនឹងកិច្ចព្រមព្រៀងនោះ។
ក្នុងថ្ងៃទី២៨ សីហា នាយករដ្ឋមន្រ្តីអ៊ីស្រាអែលលោកយ៉ាអៀរ ឡាពីដបានបញ្ចាក់ថា ទាហានអ៊ីស្រាអែលបានទទួលបញ្ជាឲ្យត្រៀមគ្រប់សេណារីយ៉ូទាំងអស់ដើម្បីរារាំងអ៊ីរ៉ង់កុំឲ្យបំពាក់គ្រាប់បែបបរមាណូ។ តែប្រធានាធិបតីអ៊ីរ៉ង់លោកអ៊ីប្រាហ៊ីម រ៉ាអ៊ីស៊ីបានឆ្លើយបកវិញថា អ៊ីស្រាអែលគ្មានពេលដើម្បីធ្វើសកម្មភាពនេះទេ ប្រសិនបើអ៊ីស្រាអែលសម្រេចចិត្តធ្វើនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ