អ៊ីរ៉ង់៖ អាយ៉ាតូឡា អាលីខាមឺណី ចោទអាមេរិកនិងអ៊ីស្រាអែល ថាជាអ្នកពន្យុះឲ្យមានបាតុកម្មហិង្សា
ប្រមាណជាង២សប្តាហ៍មកហើយ ដែលប្រជាជនអ៊ីរ៉ង់ ជាពិសេសយុវជនសិស្សនិស្សិត បានធ្វើបាតុកម្មនៅតាមទីក្រុងធំៗ ដើម្បីទាមទារសិទ្ធិសេរីភាព ប្រឆាំងចំពោះអំណាចនយោបាយអ៊ីស្លាមផ្តាច់ការ។ បាតុកម្មដែលបានផ្ទុះឡើង ក្រោយការស្លាប់ស្ត្រីអ៊ីរ៉ង់ម្នាក់ ឈ្មោះ Mahsa Amini ដែលត្រូវបានសមត្ថកិច្ចចាប់ខ្លួន ដោយចោទថាមិនបានស្លៀកពាក់ និងទទូលក្រណាត់លើក្បាល ឲ្យបានត្រឹមត្រូវ។ នៅថ្ងៃអង្គារនេះ មគុទេសន៍សាសនាកំពូល របស់អ៊ីរ៉ង់ អាយ៉ាតូឡា អាលីខាមឺណី បានប្រកាសចោទប្រកាន់ថា ចលនាបាតុកម្មហិង្សានេះ គឺជាស្នាដៃ របស់អាមេរិក និងអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:៤៦
ខ្ញុំសូមនិយាយដោយច្បាស់តែម្តង ថា អំពើកុបកម្ម អសន្តិសុខទាំងនេះ គឺជាស្នាដៃ របស់សហរដ្ឋអាមេរិក និងរបស់ពួកអ៊ីស្រាអែល ព្រមទាំងមានការចូលរួមជួយ ពីពួកអ៊ីរ៉ង់ក្បត់ជាតិឯង ដែលរស់នៅក្រៅប្រទេសផង។ នេះគឺជាសម្តីលើកឡើង របស់មគុទេសន៍សាសន៍កំពូលអ៊ីរ៉ង់ អាយ៉ាតូឡា អាលី ខាមឺណី ដែលបានចេញប្រតិកម្មជាលើកទីមួយ ទាក់ទិននឹងបាតុកម្មហិង្សា ដែលកំពុងតែផុសផុលខ្លាំងនៅអ៊ីរ៉ង់ ប្រមាណជាង២សប្តាហ៍មកនេះ។ នៅលើទំព័រ Twitter អាយ៉ាតូឡា អាលី ខាមឺណី បានអះអាងថា អាមេរិកមិនចង់ឃើញអ៊ីរ៉ង់រឹងមាំ ហើយឯករាជ្យនោះទេ។
សូមរំលឹកថា បាតុកម្ម កុបកម្មនៅអ៊ីរ៉ង់ បានផ្ទុះឡើង បន្ទាប់ពីស្ត្រីអ៊ីរ៉ង់ម្នាក់ឈ្មោះ Mahsa Amini អាយុ២២ឆ្នាំ បានស្លាប់កាលពីថ្ងៃទី១៦កញ្ញា ក្រោយសមត្ថកិច្ចឃាត់ខ្លួន ដោយចោទថាមិនបានស្លៀកពាក់និងគ្របទទូលក្រណាត់លើក្បាល ឲ្យបានត្រឹមត្រូវទៅតាមច្បាប់កំណត់។ ការស្លាប់របស់ស្ត្រីរូបនេះ បានធ្វើឲ្យប្រជាជនអ៊ីរ៉ង់ជាពិសេស គឺស្ត្រីតែម្តង បានចូលរួមចុះផ្លូវធ្វើបាតុកម្ម ប្រឆាំងចំពោះអំណាចអ៊ីស្លាមផ្តាច់ការ ដែលបំបិទសិទ្ធិ កៀបសង្កត់ស្ត្រី ក្នុងនឹមប្រពៃណីចាស់គំរិលដ៏តឹងតែងបំផុត។ ចលនាបាតុកម្មនេះ ក៏បានទទួលការគាំទ្រផុសផុលខ្លាំង នៅតាមបណ្តាប្រទេសផ្សេងៗដែរ មិនថាប្រទេសក្បែរខាងអ៊ីរ៉ង់ និងនៅអឺរ៉ុប។
នៅយប់ថ្ងៃអាទិត្យ ឈានចូលថ្ងៃចន្ទ ដើមសប្តាហ៍នេះ កុបកម្មនៅតែផុសផុលខ្លាំង ជាពិសេសនៅតាមសកលវិទ្យាល័យធំៗមួយចំនួន នៅក្រុងតេហេរ៉ង់ និងនៅក្រុងអ៊ីស្ប៉ាអង់ជាដើម។ សមត្ថកិច្ចអ៊ីរ៉ង់ បានប្រើកាំភ្លើងបាញ់គ្រាប់ដែក និងបានប្រើឧស្ម័នបង្ហូរទឹកភ្នែក ខណៈនិស្សិតជាច្រើននាក់ បានស្រែកពាក្យថា “ស្ត្រី ជីវិត សេរីភាព”។ បណ្ដាញព័ត៌មានអ៊ីរ៉ង់ Mehr បានចុះផ្សាយថា ក្រុមនិស្សិត សុខចិត្តស្លាប់ ចៀសជាងទទួលរងនូវការមាក់ងាយ។
យោងតាមអង្គការ Iran Human Rights ដែលមានមូលដ្ឋាននៅក្រុងអូស្លូ គឺយ៉ាងហោចណាស់មានមនុស្សស្លាប់ចំនួន៩២នាក់ ដោយការបង្ក្រាបយ៉ាងហិង្សាបំផុតរបស់សមត្ថកិច្ចអ៊ីរ៉ង់ ក្នុងរវាងជាង២សប្តាហ៍មកនេះ។ ក្នុងចំណោមបាតុករដែលគេចាប់ខ្លួន ក្រសួងចារកិច្ចអ៊ីរ៉ង់អះអាងថា មានជនប្រទេសចំនួន៩នាក់ ក្នុងនោះមានបារាំង អាល្លឺម៉ង់ អ៊ីតាលី ហូឡង់ និងប៉ូឡូញ ជាដើម។ ចំណាត់ការធម៌ក្តៅរបស់របបផ្តាច់ការអ៊ីស្លាមអ៊ីរ៉ង់ ទៅលើការធ្វើបាតុកម្មទាមទារសិទ្ធិសេរីភាព របស់ប្រជាពលរដ្ឋនេះ ត្រូវបានរដ្ឋាភិបាលអាមេរិក អង់គ្លេស និងកាណាដា ជាដើម ប្រកាសថ្កោលទោសជាខ្លាំង។ រដ្ឋមន្ត្រីការបរទេសអង់គ្លេសបានកោះហៅអគ្គរដ្ឋទូតអ៊ីរ៉ង់ទៅសាកសួរ ចំណែកកាណាដាវិញ បានអនុម័តវិធានការទណ្ឌកម្មថ្មីមួយ សំដៅលើមេដឹកនាំអ៊ីរ៉ង់ ដោយចោទថារបបនេះ ធ្វើបាបស្ត្រីជាលក្ខណៈប្រព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ