អ៊ីស្រាអែល៖ការវាយប្រហារដោយគ្រាប់បែកក្នុងទីក្រុងហ្សេរ៉ុយសាឡឹមបានផ្តាច់ជីវិតមនុស្សម្នាក់ និងរបួសច្រើននាក់
នៅក្នុងប្រទេសអ៊ីស្រាអែល មានស្លាប់ម្នាក់ និងរបួសប្រមាណ ១៥នាក់ផ្សេងទៀតនៅក្នុងការវាយប្រហារដោយបំផ្ទុះគ្រាប់បែកនៅចំណតរថយន្តក្រុងចំនួនពីរកន្លែងនាព្រឹកថ្ងៃចន្ទ ទី២៣ វិច្ឆិកា។ យោងតាមរដ្ឋអំណាចអ៊ីស្រាអែល ការបំផ្ទុះទី១ បានសម្លាប់ក្មេងប្រុសអាយុ ១៥ ឬ ១៦ឆ្នាំជាជនជាតិអ៊ីស្រាអែលដើមកំណើតកាណាដា និងមានរបួសចំនួន ១២នាក់ ក្នុងនោះមានរបួសធ្ងន់ចំនួន ៤នាក់។ ចំណែកការបំផ្ទុះទី២ ដែលស្ថិតមិនសូវឆ្ងាយពីកន្លែងបំផ្ទុះទី១ បានបណ្តាលឲ្យមានរបួសចំនួន ៣នាក់។ ប្រភពសន្តិសុខអ៊ីស្រាអែលបានបញ្ជាក់ប្រាប់ AFP ថា គ្រាប់បែកដាក់នៅទាំងពីរកន្លែងនោះត្រូវបានគេទាញបំផ្ទុះពីចម្ងាយ។ ខណៈនេះ នៅមិនមានក្រុមណាចេញមុខសារភាពជាស្នាដៃរបស់ខ្លួននៅឡើយទេ។ តែចលនាប៉ាឡេស្ទីនហាម៉ាស់ដែលជាសត្រូវនឹងអ៊ីស្រាអែលបានសាទរចំពោះព្រឹត្តិការណ៍មួយនេះ។ គួរបញ្ជាក់ថា អស់ជាច្រើនឆ្នាំដែលក្រុងហ្សេរ៉ុយសាឡឹមមិនដែលស្គាល់ការវាយប្រហារដោយបំផ្ទុះគ្រាប់បែក។
ចុះផ្សាយនៅថ្ងៃ៖
ស្តាប់ - ០១:៣០
« កាលពីប៉ុន្មានឆ្នាំមុន អំពើហិង្សាដែលគេបានឃើញកើតមាននៅក្នុងទីក្រុងហ្សេរ៉ុយសាឡឹមជាអំពើហិង្សាប្រើកាំបិត មានន័យថា ជនដៃដល់ប្រព្រឹត្តិអំពើឃាតកម្មដោយប្រើកាំបិត ការប្រើអាវុធសង្រ្គាម ឬមួយក៏ប្រើឡានកាំមីញ៉ុងបរសំដៅលើហ្វូងមនុស្សជាដើម។ ពិតណាស់ អស់រយៈពេលជាច្រើនឆ្នាំដែលគេមិនធ្លាប់ឃើញមានការវាយប្រហារដោយបំផ្ទុះគ្រាប់បែកនៅក្នុងទីក្រុងហ្សេរ៉ុយសាឡឹម ពិសេសការដាក់បង្កៃគ្រាប់បែកនៅទីកន្លែងពីរខុសគ្នា។
លើសពីនេះ ការវាយប្រហារដោយបំផ្ទុះគ្រាប់បែកនៅកន្លែងខុសគ្នាទាំងពីរនេះក៏ស្ថិតនៅមិនឆ្ងាយពីគ្នាប៉ុន្មានដែរ។ យ៉ាងណាក៏ដោយ គេអាចដឹង និងស្គាល់នូវព្រឹត្តិការណ៍ដែលនឹងកើតមានឡើងនាពេលខាងមុខ ក្នុងនោះ អាចនឹងមានការកោះប្រជុំក្រុមប្រឹក្សាសន្តិសុខជាតិពីខាងអ៊ីស្រាអែល អាចនឹងមានអន្តរាគមន៍ផ្លូវអាកាសរបស់កងទ័ពអ៊ីស្រាអែល និងអាចមានមនុស្សស្លាប់នៅខាងភាគីប៉ាឡេស្ទីន។ ដូច្នេះចង់ ឬមិនចង់ ការវាយបង្រ្កាប សងសឹកវិញពីអ៊ីស្រាអែលនឹងបង្កឲ្យអំពើហិង្សាជាថ្មីទៀត។
ជានិច្ចកាល យើងតែងតែស្ថិតនៅវិលវល់នៅក្នុងស្ថានភាពបែបនេះមិនចេះចប់ មិនចេះហើយ។ ដូច្នេះ ដរាបការកាន់កាប់ ឬការធ្វើអាណានិគមអូសបន្លាយ ដរាបនោះអំពើហិង្សារបៀបនេះនឹងបន្តកើតមាន និងកើតមាននៅក្រោមទម្រង់ផ្សេងៗគ្នា។ យើងបន្តស្ថិតក្នុងស្ថានភាពបែបនេះគ្មានថ្ងៃបញ្ចប់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ