អ៊ីស្រាអែលស្ថិតក្នុងសភាពការប្រុងប្រយ័ត្នដ៏ខ្ពស់បំផុតនៅមុនពិធីបុណ្យសាសនាជ្វីវ
នៅមុនពិធីបុណ្យសាសនាជ្វីវឈ្មោះYom Kippour ឬ”ការអភ័យទោសដ៏ធំធេង”ដែលត្រូវចាប់ផ្តើមនៅល្ងាចថ្ងៃអង្គារនេះ អ៊ីស្រាអែល កំពុងស្ថិតក្នុងសភាពការប្រុងប្រយ័ត្នដ៏ខ្ពស់បំផុត។ ស្របគ្នានេះ កងកម្លាំងអ៊ីស្រាអែល បានធ្វើការព័ទ្ធចាប់ជនប៉ាឡេស្ទីនរាប់សិបនាក់ បន្ទាប់ពីមានអំពើភេរវកម្មដ៏ហិង្សាមួយនៅក្រុងJérusalem ខាងកើតរួចមក។
ចុះផ្សាយនៅថ្ងៃ៖
ស្តាប់ - ០២:២៩
ការផ្ទុះឡើងអំពើហិង្សាជាថ្មីនេះ ជម្រុញឲ្យប្រជាជនអ៊ីស្រាអែល មានការភ័យខ្លាចយ៉ាងក្រៃលែងខណៈពេលដែលពិធីបុណ្យធំៗរបស់សាសនាជ្វីវបានខិតមកដល់។
ដោយហេតុថា ជនប៉ាឡេស្ទីនម្នាក់អាយុ៣៩ឆ្នាំ បានសម្លាប់ជនចូលនិវត្តន៍អ៊ីស្រាអែលមួយរូបអាយុ៦០ឆ្នាំនិងប៉ូលីសម្នាក់អាយុ២៩ឆ្នាំនៅក្រុង Jérusalem ខាងកើត ប៉ែកខាងប៉ាឡេស្ទីនដែលស្ថិតនៅក្រោមការកាន់កាប់របស់អ៊ីស្រាអែល។ មិនតែប៉ុណ្ណោះ ក៏មានជនអ៊ីស្រាអែល៥នាក់ផ្សេងទៀត ត្រូវរងរបួសដែរនៅមុនពេលដែលជនបង្កហេតុ ត្រូវបានទាហានអ៊ីស្រាអែលបាញ់សម្លាប់។
ចាប់តាំងពីការវាយប្រហារនោះមក ជនប៉ាឡេស្ទីនរាប់សិបនាក់ ត្រូវបានកងកម្លាំងប៉ូលីសអ៊ីស្រាអែលចាប់ខ្លួននៅJérusalem ខាងកើត ក្នុងនោះក៏មានសមាជិកនៃក្រុមគ្រួសាររបស់ជនបង្កការវាយប្រហារ ប្រជាជនប៉ាឡេស្ទីនដែលចង់អបអរសាទរចំពោះកាយវិការរបស់ភេរវជននិងជនប៉ាឡេស្ទីនផ្សេងៗទៀតដែលជាប់ចោទពីបទគប់ដុំថ្មនិងដបបង្កអគ្គីភ័យប្រឆាំងទៅលើប៉ូលីសអ៊ីស្រាអែលនាពេលប៉ះទង្គិចអាវុធ។
ម្យ៉ាងទៀត ក៏មានជនប៉ាឡេស្ទីន ១៦នាក់ផ្សេងទៀត ត្រូវបានប៉ូលីសអ៊ីស្រាអែល ចាប់ខ្លួននាពេលយប់នៅ Cisjordanie ដែនដីជាប់គ្នានឹងទីក្រុងJérusalem និងស្ថិតនៅក្រោមការកាន់កាប់របស់អ៊ីស្រាអែល។ ទោះបីជាអំពើភេរវកម្មពិតឬក៏មិនពិតក្តី ក៏ទាហានអ៊ីស្រាអែល តែងតែប្រតិបត្តិការចាប់ខ្លួនជនប៉ាឡេស្ទីនជារឿយៗនៅ Cisjordanie និងបានអះអាងដែរថា “ប៉ូលីសអ៊ីស្រាអែល បានកំទេចបំផ្លាញរោងជាងផលិតអាវុធមួយកន្លែងដែរ។
គួររំលឹកថា កាលពីឆ្នាំ២០១៥ ពិធីបុណ្យសាសនាជ្វីវ ត្រូវបានប្រព្រឹត្តទៅនៅក្នុងបរិបថមួួយដ៏សែនតានតឹង និងបានចាប់ផ្តើមឡើងក្រោមឥទ្ធិពលនៃអំពើហិង្សាដែលនៅតែមានកំសួលខ្លាំងរហូតមកទល់ពេលនេះ។ ចាប់តាំងពីថ្ងៃទី១តុលា២០១៥មក អំពើហិង្សានៅJérusalem ក្នុងដែនដីប៉ាឡេស្ទីននិងអ៊ីស្រាអែល បានសម្លាប់ជីវិតជនជាតិប៉ាឡេស្ទីនចំនួន២៣២នាក់ ជនជាតិអ៊ីស្រាអែល៣៦នាក់ជនជាតិអាមេរិក ពីររូប ជនជាតិ Erythré ម្នាក់និងជនជាតិស៊ូដង់ម្នាក់-នេះបើយោងតាមតុល្យាការរបស់ទីភ្នាក់ងារព័ត៌មានបារាំង AFP ។
ហើយជនជាតិប៉ាឡេស្ទីនដែលស្លាប់នោះ ភាគច្រើនជាមេក្លោងបង្កការវាយប្រហារឬក៏ជាប់សង្ស័យនៅក្នុងអំពើភេរវកម្មជាដើម។
ម្យ៉ាងទៀត ប៉ូលីសអ៊ីស្រាអែល ទើបបានជូនដំណឹងដែរ អំពីការដាក់ពង្រាយប៉ូលីសជាបន្ថែមទៀតនៅ Jérusalem និងនៅអីស្រាអែល ជាពិសេសនៅក្នុងទីក្រុងចំណាស់និងនៅតាមទីកន្លែងសក្ការៈចំនួន៣០០០នាក់ទៀត ដើម្បីរក្សាការពារសន្តិសុខរបស់ប្រជាជនខ្លួននៅក្នុងពេលបុណ្យសាសនាជ្វីវនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ