អង់គ្លេសថ្កោលទោសអ៊ីរ៉ង់ដែលប្រហារជីវិតអ្នកទោសសញ្ជាតិពីរ អង់គ្លេស-អ៊ីរ៉ង់
អ៊ីរ៉ង់ប្រហារជីវិតពលរដ្ឋរបស់ខ្លួនម្នាក់ដែលមានសញ្ជាតិពីរ អង់គ្លេស អ៊ីរ៉ង់។ តាមការចុះផ្សាយរបស់ទីភ្នាក់ងារព័ត៌មានរដ្ឋអ៊ីរ៉ង់ Mizan លោកAlireza Akbari ត្រូវបានតុលាការអ៊ីរ៉ង់កាត់ទោសប្រហារជីវិតក្នុងបទធ្វើចារកម្មដើម្បីប្រយោជន៍ប្រទេសអង់គ្លេស។ តាមរយៈសារធ្វីតធ័រ នៅថ្ងៃសៅរ៍ទី ១៤មករា លោកនាយករដ្ឋមន្រ្តីអង់គ្លេស រីស៊ី ស៊ូណាក់ ថ្កោលទោស ចាត់ទុកការអនុវត្តទោសប្រហារជីវិតពលរដ្ឋអ៊ីរ៉ង់ថា ជាសកម្មភាពព្រៃផ្សៃដែលគេមិនអាចអត់ឱនឲ្យបាន។
ចុះផ្សាយនៅថ្ងៃ៖
ស្តាប់ - ០២:២៨
តាមការចុះផ្សាយរបស់ទីភ្នាក់ងារព័ត៌មានរដ្ឋអ៊ីរ៉ង់ នៅថ្ងៃសៅរ៍នេះ លោក Alireza Akbari ដែលមានសញ្ជាតិពីរ អង់គ្លេស អ៊ីរ៉ង់ត្រូវបានអាជ្ញាធរអ៊ីរ៉ង់ប្រហារជីវិតដោយការព្យួរក។ ការប្រហារជីវិតធ្វើឡើងនៅតែ៣ថ្ងៃ ក្រោយតុលាការនៅទីក្រុងតេហេរ៉ង់សម្រេចកាត់ទោសប្រហារជីវិតលោក Alireza Akbari ក្នុងបទចោទប្រកាន់ប្រព្រឹត្តអំពើពុករលួយ និងធ្វើសកម្មភាពប្រឆាំងសន្តិសុខផ្ទៃក្នុង និងបរទេសអ៊ីរ៉ង់ តាមរយៈការលួចធ្វើចារកម្មដើម្បីផលប្រយោជន៍ក្រុមចារកិច្ចអង់គ្លេស។
មានអាយុ៦១ឆ្នាំ លោកAlireza Akbari ធ្លាប់ជាសមាជិកកងទ័ពអ៊ីរ៉ង់ដែលបានអនុវត្តបទឈប់បាញ់ដែលជាគន្លឹះសំខាន់នៃការបិទបញ្ចប់សង្រ្គាមអ៊ីរ៉ាក់ អ៊ីរ៉ង់នៅឆ្នាំ ១៩៨៨។ លោកក៏ធ្លាប់ធ្វើជាអនុរដ្ឋមន្រ្តីការពារជាតិអ៊ីរ៉ង់ រហូតដល់ឆ្នាំ ២០០៥ មុននឹងធ្វើដំណើរទៅរស់នៅ និងបានទទួលសញ្ជាតិអង់គ្លេស នៅឆ្នាំ ២០០៨។
លោកAlireza Akbari ត្រូវបានចាប់ខ្លួន នៅឆ្នាំ ២០១៩ នៅពេលលោកធ្វើដំណើរត្រលប់ទៅអ៊ីរ៉ង់។ តាមប្រព័ន្ធចុះផ្សាយអ៊ីរ៉ង់ លោក Alireza Akbariត្រូវចោទប្រកាន់ថា បានទទួលប្រាក់សំណូក ប្រមាណ ២លានអឺរូ (១,៨លានអឺរ៉ូ ២៦៥០០០ ផោន ៥០០០០ដុល្លារ) ជាថ្នូរនឹងការផ្តល់ព័ត៌មានទៅឲ្យក្រុមយកការណ៍សម្ងាត់របស់អង់គ្លេស។
នៅថ្ងៃព្រហស្បតិ៍ កាសែតផ្លូវការរបស់របបអ៊ីស្លាម អ៊ីរ៉ង់បានចុះផ្សាយ ជាសាធារណៈវីដេអូដើម្បីបញ្ជាក់ថា លោកAkbari ដើរតួនាទីសំខាន់នៅក្នុងហេតុការណ៍ធ្វើឃាត លោក Mohsen Fakhrizadeh អ្នកវិទ្យាសាស្រ្តផ្នែកនុយក្លេអ៊ែររបស់អ៊ីរ៉ង់ កាលពីឆ្នាំ ២០២០ ដែលអ៊ីរ៉ង់ធ្លាប់ទម្លាក់ការចោទប្រកាន់ទៅលើក្រុមចារកម្មអ៊ីស្រាអែល។
នៅក្នុងសារសំឡេងទៅកាន់ក្រុមគ្រួសារតាំងពីមន្ទីរឃុំឃាំងនៅតេហេរ៉ង់ និងដែលត្រូវបានចាក់ផ្សាយដោយប្រព័ន្ធផ្សព្វផ្សាយអង់គ្លេសBBC លោក Akbariបាននិយាយថា នៅក្រោមការធ្វើទារុណកម្ម ៣៥០០ម៉ោង លោកត្រូវគេបង្ខំឲ្យឆ្លើយសារភាពទទួលស្គាល់ឧក្រិដ្ឋកម្មដែលលោកមិនបានធ្វើទាល់តែសោះ។
ប្រតិកម្មទៅនឹងការប្រហារជីវិតលោក Akbari ដែលមានសញ្ជាតិពីរ អង់គ្លេស និងអ៊ីរ៉ង់ នាយករដ្ឋមន្រ្តីអង់គ្លេស លោករីស៊ី ស៊ូណាក់ថ្កោលទោសសកម្មភាពឃោឃៅ និងកំសាកដែលប្រព្រឹត្តឡើងដោយរបបព្រៃផ្សៃ។ នៅថ្ងៃព្រហស្បតិ៍ ថ្ងៃតុលាការអ៊ីរ៉ង់បើកសវនាការកាត់ទោសប្រហារជីវិតលោក Akbari អ្នកទទួលខុសត្រូវនៃការិយាល័យបរទេសអង់គ្លេសបាននិយាយថា អង់គ្លេសកំពុងពិចារណាចង់ដាក់បញ្ចូលឆ្មាំបដិវត្ត ដែលជាកងកម្លាំងពិសេសរបស់អ៊ីរ៉ង់ទៅក្នុងបញ្ជីក្រុមអង្គការភេរវនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ