អ៊ីរ៉ង់ចាប់ពលរដ្ឋ៧នាក់ ដោយចោទថា«ពាក់ព័ន្ធនឹងអង់គ្លេស»និង«ចូលដៃ»ប្រឆាំងរដ្ឋាភិបាល
នៅអ៊ីរ៉ង់ កម្លាំងឆ្មាំបដិវត្តន៍ បានចាប់ខ្លួនពលរដ្ឋ ចំនួន ៧ នាក់ ដោយចោទប្រកាន់ថា ឃុបឃិតជាមួយ អង់គ្លេស និង «ចូលដៃ» ជាមួយក្រុមបាតុករប្រឆាំងរដ្ឋាភិបាល។ ការចាប់ខ្លួននេះ ធ្វើឡើងនៅថ្ងៃអាទិត្យ និងត្រូវរដ្ឋអំណាចទម្លាយព័ត៌មាននៅថ្ងៃច័ន្ទ។ សារព័ត៌មានផ្លូវការរបស់រដ្ឋអ៊ីរ៉ង់ បានបញ្ជាក់ថា ក្នុងចំណោមពលរដ្ឋទាំងនោះ គឺអ្នកខ្លះ មានសញ្ជាតិពីរ ហើយធ្វើការបម្រើឲ្យ ភ្នាក់ងារសម្ងាត់អង់គ្លេស។
ចុះផ្សាយនៅថ្ងៃ៖
ស្តាប់ - ០២:០៤
អ្នកត្រូវចាប់ខ្លួននោះ ជាក្រុមមេដឹកនាំបាតុកម្មពីពេលថ្មីៗ។ ពួកគេមានសញ្ជាតិ២ អង់គ្លេសនិងអ៊ីរ៉ង់ ហើយមានបំណងប្រុងរត់គេចចេញពីប្រទេស។ នេះបើតាមអ្នកនាំពាក្យ ក្រសួងការបរទេសអ៊ីរ៉ង់ ដែលបញ្ជាក់បន្ថែមថា បុគ្គលទាំងនោះ ធ្វើការឲ្យភ្នាក់ងារអង់គ្លេស។
មន្ត្រីជាន់ខ្ពស់ការទូតអ៊ីរ៉ង់ដដែល បានគូសបង្ហាញប្រាប់អ្នកកាសែតនៅក្រុងតេហេរ៉ង់ថា ប្រទេសអង់គ្លេសដើរតួមិនល្អសោះ នៅក្នុងការវិវឌ្ឍថ្មីនៅអ៊ីរ៉ង់ ពោលគឺ អង់គ្លេស បានញ៉ុះញ៉ុង់ក្រុមបាតុកម្ម ឲ្យប្រឆាំងនឹងរដ្ឋាភិបាល។ អង់គ្លេស ជាប្រទេសដែល រដ្ឋបាលក្រុងតេហេរ៉ង់ ចាត់ទុកចូលជាសត្រូវរបស់អ៊ីរ៉ង់ ដូចនឹង សហរដ្ឋអាមេរិក អ៊ីស្រាអែល និង អារ៉ាប៊ីសាអូឌីត ។
ប្រទេសបស្ចិមលោក បានចោទ អ៊ីរ៉ង់ ថាតែងតែចាប់ពលរដ្ឋបរទេស ជាចំណាប់ខ្មាំង និងជាចំណាប់ថ្នូរ សម្រាប់ទាមទារដោះដូរជាមួយនឹងអ្នកទោសអ៊ីរ៉ង់ ដែលកំពុងជាប់ឃុំនៅបរទេស។ ជាក់ស្តែង ប៉ុន្មានសប្តាហ៍មុន ប្រទេសប៊ែលស៊ិក បានសម្រេចចិត្តចុះកិច្ចព្រមព្រៀងជាមួយអ៊ីរ៉ង់ ដើម្បីដោះដូរអ្នកទោសទៅវិញទៅមក។
បាតុកម្មប្រឆាំងនឹងរដ្ឋាភិបាលអ៊ីរ៉ង់ ផ្ទុះឡើងជាង ៣ ខែមកហើយ។ ពីដំបូងឡើយ គឺដរចេញពីមរណភាពរបស់យុវតីម្នាក់ ដែលស្លាប់បន្ទាប់ពីប៉ូលីសចាប់ខ្លួន ព្រោះតែពាក់ក្រណាត់ទទូរក្បាលមិនសមរម្យតាមបែបសាសនាអ៊ីស្លាមអ៊ីរ៉ង់។ ចាប់ពីពាក់កណ្តាលខែកញ្ញាមក បាតុកម្មប្រឆាំងរដ្ឋអំណាចអ៊ីរ៉ង់ ក៏ឆេះឡើង ទាំងក្នុង និង ក្រៅបរទេស។ នារីៗជាច្រើនបានដោះស្បៃគ្របក្បាល និងកាត់សក់ ជាសញ្ញាណប្រឆាំងរដ្ឋអ៊ីរ៉ង់ និងដើម្បីសម្តែងពីការទាមទារសេរីភាព។
បាតុកម្មនៅអ៊ីរ៉ង់ ក៏បានធ្វើឲ្យវិស័យសេដ្ឋកិច្ចអ៊ីរ៉ង់រងផលវិបាកខ្លាំង។ វិបាកមួយ ព្រោះតែទណ្ឌកម្មសេដ្ឋកិច្ចរបស់បច្ចិមលោក ហើយមួយទៀត ព្រោះតែទេសចរណ៍ធ្លាក់ចុះ។ ជើងហោះហើរ ៩០% ឆ្ពោះទៅអ៊ីរ៉ង់ ត្រូវលើកពេល ឬលុបចោល។ រូបិយប័ណ្ណជាតិអ៊ីរ៉ង់ ក៏បានធ្លាក់ចុះថ្លៃ ២៥% បើធៀបនឹងប្រាក់ដុល្លារនិងប្រាក់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ