ក្រោមរជ្ជកាលសាល់ម៉ាន អារ៉ាប៊ីសាអូឌីតប្រហារជីវិតមនុស្សច្រើនស្ទើរទ្វេដង
បើតាមរបាយការណ៍របស់អង្គការការពារសិទ្ធិមនុស្សអង់គ្លេស Repieve និងអង្គការ European Saudi Organization for Humain Rights-ESOHR ចេញផ្សាយនៅថ្ងៃទី ៣១មករា២០២៣ ការប្រហារជីវិតមនុស្សបានកើនឡើងស្ទើរមួយជាពីរ នៅអារ៉ាប៊ីសាអូឌីត ក្រោមការគ្រងរាជនិងដឹកនាំដោយព្រះចៅសាល់ម៉ាន និងរាជបុត្រស្នងរាជ មូហាម៉េដ បេនសាល់ម៉ាន។ អង្គការសិទ្ធិមនុស្សទាំងពីរ បានលើកឡើងទៀត អំពីករណីធ្វើទារុណកម្មលើអ្នកទោសជាស្វ័យប្រវត្តិនៅក្នុងរាជាណាចក្រនេះ។
ចុះផ្សាយនៅថ្ងៃ៖
ស្តាប់ - ០២:០៤
ពីឆ្នាំ២០១០ដល់២០១៤ អារ៉ាប៊ីសាអូឌីត បានប្រហារជីវិតមនុស្សអស់ជាមធ្យម៧០,៨ក្នុងមួយឆ្នាំៗ និងដល់ទៅ១២៩,៥ជាមធ្យមក្នុងមួយឆ្នាំ តាំងពីព្រះមហាក្សត្រសាល់ម៉ាន និងរាជបុត្រស្នងរាជម៉ូហាមេដ បេនសាល់ម៉ាន ឡើងគ្រងរាជនៅអារ៉ាប៊ីសាអូឌីតឆ្នាំ២០១៥មក។ ពោលគឺរាជវង្សបច្ចុប្បន្នបានអនុវត្តទោសប្រហារជីវិតលើពិរុទ្ធជនជាង ១០០០នាក់។ នេះបើតាមរបាយការណ៍របស់អង្គការក្រៅរដ្ឋាភិបាលទាំងពីរ ដែលផ្គុំតួលេខបានតាមរយៈការអង្កេតនិងសួរនាំក្រុមមេធាវី សមាជិកគ្រួសារជនរងគ្រោះនិងសកម្មជនសិទ្ធិមនុស្ស។ របាយការណ៍ដដែលបានបញ្ជាក់ថា យោងតាមទិន្នន័យរបស់ទីភ្នាក់ងារសារព័ត៌មានបារាំងAFP ដែលផ្អែកលើសេចក្តីប្រកាសរបស់រដ្ឋាភិបាល កាលពីឆ្នាំទៅ ក្រុងរីយ៉ាដប្រហារជីវិតមនុស្សអស់១៤៧នាក់ ក្នុងនោះ៨១នាក់ត្រូវប្រហារតែក្នុងមួយថ្ងៃនៃខែមីនា។
រាជបុត្រស្នងរាជ្យនៃរាជាណាចក្រអារ៉ាប៊ីសាអូឌីតដ៏មហាអភិរក្សដែលជាអ្នកក្តាប់អំណាចដោយជាក់ស្តែង បានធ្វើកំណែទម្រង់គួរឱ្យកត់សម្គាល់។ ប៉ុន្តែបើតាមសកម្មជនសិទ្ធិមនុស្សមនុស្ស កំណែទម្រង់មានអមដោយការបង្ក្រាបរាល់គ្រប់ទម្រង់និងសណ្ឋាននៃការប្រឆាំង ហើយបើតាមរបាយការណ៍ម្សិលមិញ រយៈពេល៦ឆ្នាំដែលមានការប្រហារជីវិតមនុស្សយ៉ាងសន្ធឹកសន្ធាប់បំផុតនោះ គឺស្ថិតនៅក្រោមការគ្រប់គ្រងរបស់ស្តេចសាល់ម៉ាននិងរាជបុត្រម៉ូហាមេដតែម្តង។
ការប្រហារជីវិតកើនស្ទើរទ្វេដងហើយ មានករណីប្រហារដោយសម្ងាត់គួរឱ្យព្រួយបារម្ភខ្លាំងទៀត តាំងពីចុងឆ្នាំ២០២២មក។ ក្រៅអំពីប្រហារជីវិត ក្មេងមិនទាន់ពេញវ័យ ដោយគ្មានជូនដំណឹងដល់ក្រុមគ្រួសារ របាយការណ៍បានលម្អិតថាមានស្ត្រី៣១នាក់ ៖ ២៣នាក់ជាបរទេសនិង១៣អ្នកជាបម្រើការតាមផ្ទះ បានរងការប្រហារជីវិតពីឆ្នាំ២០១០ដល់២០២១ ក្នុងនោះម្នាក់ស្រ្តីអ្នកបម្រើជាតិឥណ្ឌូណេស៊ី ពីបទបានសម្លាប់ម្ចាស់ផ្ទះដែលបានប្រព្រឹត្តអំពើហិង្សារំលោភបំពានផ្លូវភេទនាងជាច្រើនឆ្នាំ។
របាយការណ៍កម្រាស់៥៨ទំព័រ ក៏បានលើកឡើងផងដែរអំពីករណីធ្វើទារុណកម្មជាស្វ័យប្រវត្តិនិងការរំលោភដំណើរបែបបទច្បាប់ ដោយប្រើសវនការដែលគ្មានសមធម៌ និង ទារុណកម្មលើកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ