អង្គការRSF ប្តឹងរាជបុត្រអារ៉ាប៊ី សាអូឌីតពីបទឧក្រិដ្ឋកម្មប្រឆាំងមនុស្សជាតិ
ប៉ុន្មានថ្ងៃក្រោយ របាយការណ៍របស់ទីភ្នាក់ងារស៊ើបការណ៍សម្ងាត់អាមេរិក ដាក់បន្ទុក រាជបុត្រស្នងរាជ្យ អារ៉ាប៊ី សាអូឌីត ថា ជាអ្នកទទួលខុសត្រូវលើឃាតកម្មអ្នកកាសែត លោក ចាម៉ាល់ កាស៊ូហ្ស៊ី អង្គការអ្នកកាសែតគ្មានព្រំដែន RSF បានដាក់ពាក្យបណ្តឹងទៅតុលាការសហព័ន្ធនៅក្នុងប្រទេសអាល្លឺម៉ង់ កាលពីថ្ងៃអង្គារទី ២ មីនា ដើម្បីទាមទារយុត្តិធម៌ឲ្យអ្នកកាសែតអារ៉ាប៊ី សាអូឌីត។
ចុះផ្សាយនៅថ្ងៃ៖
ស្តាប់ - ០២:៤២
នៅក្នុងពាក្យបណ្តឹងជាច្រើនរយទំព័រ ដាក់ទៅតុលាការសហព័ន្ធអាល្លឺម៉ង់ ដែលមានសមត្ថកិច្ចបើកការជំនុំជម្រះ លើបទឧក្រិដ្ឋកម្មអន្តរជាតិ អង្គការអ្នកកាសែតគ្មានព្រំដែនបានសំដៅ ប្តឹង រាជបុត្រស្នងរាជ្យអារ៉ាប៊ី សាអូឌីត ដែលទីភ្នាក់ងារស៊ើបការណ៍សម្ងាត់អាមេរិក ចោទប្រកាន់ថា ជាអ្នកអនុញ្ញាតឲ្យគេសម្លាប់អ្នកកាសែត អារ៉ាប៊ី សាអូឌីត លោក ចាម៉ាល់ កាស៊ូហ្សី។ នៅក្នុងបទចោទប្រកាន់ ប្រព្រឹត្តឧក្រិដ្ឋកម្មប្រឆាំងមនុស្សជាតិ អង្គការអ្នកកាសែតគ្មានព្រំដែន បានចោទប្រកាន់ រាជបុត្រស្នងរាជ្យ រួមទាំងមន្រ្តីជាន់ខ្ពស់របស់អារ៉ាប៊ី សាអូឌីត ៤រូប ផ្សេងទៀត ដូចជា អនុប្រធានទីភ្នាក់ងារស៊ើបការណ៍សម្ងាត់អារ៉ាប៊ី សាអូឌីត អតីតប្រធានកុងស៊ុល និងប្រធានក្រុមកងកុម្ម៉ង់ដូរ ដែលបានចូលរួម ផ្ទាល់ ក្នុងឃាតកម្មសម្លាប់អ្នកកាសែត អារ៉ាប៊ី សាអូឌីត នៅស្ថានកុងស៊ុលអារ៉ាប៊ី សាអូឌីតក្នុងទឹកដីតួកគី។
ក្រៅតែពីប្តឹង រាជបុត្រស្នងរាជ្យ ក្នុងសំណុំរឿងឃាតកម្មលើអ្នកកាសែត ចាម៉ាល់ កាស៊ូហ្ស៊ី អង្គការអ្នកកាសែតគ្មានព្រំដែនសាខានៅអាល្លឺម៉ង់ បានដាក់ពាក្យបណ្តឹងផងដែរ សម្រាប់ការធ្វើទុក្ខបុកម្នេញលើអ្នកកាសែត នៅប្រទេសអារ៉ាប៊ី សាអូឌីត។ តាមអង្គការRSF ពីឆ្នាំ ២០១១ ដល់ឆ្នាំ ២០១៩ អ្នកកាសែត ៣៤នាក់ ត្រូវអាជ្ញាធរអារ៉ាប៊ី សាអូឌីតចាប់ដាក់ពន្ធនាគារ ដែលនៅក្នុងនោះ មានម្នាក់ ជាអ្នកសរសេរប្លុក Blog ត្រូវ អាជ្ញាធរ អារ៉ាប៊ី សាអូឌីត ចាប់វាយ ១ពាន់ដំបង និងដាក់ពន្ធនាគារ ១០ឆ្នាំ សម្រាប់បទល្មើសជេរប្រមាថសាសនាអ៊ីស្លាម។
ការធ្វើទារុណកម្ម អំពើហិង្សា ការបាត់ខ្លួនដោយចាប់បង្ខំ ឬការបំបិទសិទ្ធិសេរីភាព។ ទាំងនេះ ជាអ្វី ដែលអ្នកកាសែតអារ៉ាប៊ី សាអូឌីត កំពុងជួបប្រទះសព្វថ្ងៃ។ តាមអង្គការអ្នកកាសែតគ្មានព្រំដែន មានតែ តុលាការសហព័ន្ធអាល្លឺម៉ង់ នៅ Karlsruhe ប៉ុណ្ណោះ ដែលអាចជួយដោះស្រាយក្នុងរឿងនេះបាន ព្រោះថា តុលាការ សហព័ន្ធអាល្លឺម៉ង់ មួយនេះ មានសមត្ថកិច្ចជាសកល អាចអនុញ្ញាតឲ្យរដ្ឋអាល្លឺម៉ង់ ប្តឹងប្រឆាំងអ្នកប្រព្រឹត្តឧក្រិដ្ឋកម្មធ្ងន់ធ្ងរ មិនថា អ្នកនោះ ជាជាតិសាសន៍អ្វី ឬរស់នៅ ប្រព្រឹត្តនៅប្រទេសណានោះទេ។
អង្គការអ្នកកាសែតគ្មានព្រំដែនសម្រេចដាក់ពាក្យប្តឹងទៅតុលាការអាល្លឺម៉ង់ ដើម្បីទាមទារ រកយុត្តិធម៌ ឲ្យអ្នកកាសែត លោកចាម៉ាល់ កាស៊ូហ្ស៊ី នៅបន្ទាប់ពីរដ្ឋបាលអាមេរិកនៅស្ងប់ស្ងៀម មិនដាក់ទណ្ឌកម្មលើរាជបុត្រស្នងរាជ្យអារ៉ាប៊ី សាអូឌីត នៅក្រោយចេញរបាយការណ៍ដាក់បន្ទុករបស់ទីភ្នាក់ងារ CIA។ ដើម្បី កុំឲ្យខូចទំនាក់ទំនងអាមេរិក អារ៉ាប៊ី សាអូឌីត រដ្ឋបាលលោកចូ បៃដិន មិនបានប្រកាសដាក់ទណ្ឌកម្មផ្ទាល់លើរាជបុត្រស្នងរាជ្យម៉ូហាម៉េដ បិន សាល់ម៉ាននោះទេ ប៉ុន្តែ អាមេរិកបានទាមទារឲ្យអាជ្ញាធរអារ៉ាប៊ី សាអូឌីត ធ្វើកំណែទម្រង់ថ្មី និង ចាត់វិធានការ ប្រឆាំង នឹងជនដៃដល់ ក្នុងឃាតកម្មលើអ្នកកាសែត ដែលទើបត្រូវតុលាការអារ៉ាប៊ី សាអូឌីតសម្រេចសម្រាលទោស កាលពីប៉ុន្មានខែមុននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ