ក្រោយគ្រោះរញ្ជួយដី សហគមន៍អន្តរជាតិសម្រុកផ្តល់ជំនួយដល់តួកគី ជាងស៊ីរី
ក្រៅអំពីចូលរួមរំលែកទុក្ខនិងសោកស្តាយចំពោះគ្រោះមហន្តរាយរញ្ជួយដី ដែលបានសម្លាប់ជីវិតមនុស្សជាង២៣០០នាក់នៅតួកគីនិងនៅស៊ីរី សហគមន៍អន្តរជាតិចាប់ប្រកាសផ្តល់ជំនួយដល់ប្រទេសរងគ្រោះទាំងពីរ។ ជំនួយសង្គ្រោះនិងជំនួយមនុស្សធម៌បានទៅដល់កន្លែងរងគ្រោះជាបណ្តើរៗនិងជាបន្តបន្ទាប់ហើយ ជាពិសេសសម្រាប់ប្រទេសតួកគីតែម្តង។
ចុះផ្សាយនៅថ្ងៃ៖
ស្តាប់ - ០២:២៣
លោកប្រធានាធិបតីអាមេរិកបានប្រកាសសហការយ៉ាងស្អិតជាមួយតួកគី និងផ្គត់ផ្តង់ជំនួយចាំបាច់គ្រប់យ៉ាង។ ស្នងការអឺរ៉ុបទទួលបន្ទុកគ្រោះមហន្តរាយវិញ បានប្រកាសថា យន្តការការពារស៊ីវិលរបស់សហភាពអឺរ៉ុប និងក្រុមការងារដែលប្រមូលផ្តុំសមាជិក១០ប្រទេស (ប៊ុលហ្ការី ក្រូអាស៊ី បារាំងក្រិក ហូឡង់ ប៉ូឡូញ រ៉ូម៉ានី ឆែក) ចាប់ចេញទៅជួយតួកគីហើយ។
ក្នុងក្របខ័ណ្ឌនេះ ប៊ុលហ្ការី និង រ៉ូម៉ានី បានបញ្ជូនក្រុមពន្លត់អគ្គីភ័យនិងសង្គ្រោះប្រមាណ៦០នាក់ តាមយន្តហោះម្នាក់ៗពីរគ្រឿង តាំងពីល្ងាចថ្ងៃចន្ទកើតហេតុភ្លាម។ អ្នកពន្លត់អគ្គីភ័យ៧៦នាក់ ឆ្កែសង្គ្រោះ៨ក្បាល មកពីខាងភាគីប៉ូឡូញ និងឆែក។ អេស្ប៉ាញ បានប្រមូលទាំងកម្លាំងមនុស្សនិងដ្រូន ជាស្រេចនៅមជ្ឈមណ្ឌលជំនួយអន្តរជាតិ។ ចំណែកបារាំង លោកប្រធានាធិបតីអេម៉ានុយអែល ម៉ាក្រុងបានបង្ហាញសាមគ្គីភាពជាមួយតួកគីតាមរយៈកម្លាំងអ្នកសង្គ្រោះ១៣៩នាក់ ដើម្បីផ្តល់ជំនួយបន្ទាន់ដល់ពលរដ្ឋរងគ្រោះ។ ក្រុមពន្លត់អគ្គីភ័យស្ម័គ្រចិត្តជាង៣០នាក់ នឹងចេញដំណើរទៅតួកគីនៅថ្ងៃអង្គារ។ ប៉ុន្តែពុំទាន់មានអ្វីជាក់ស្តែងសម្រាប់ស៊ីរីទេ។ ក្រិក ព្រមទាំងបណ្តាប្រទេសអឺរ៉ុបផ្សេងទៀតដូចយ៉ាងស៊ុយអែត ដែលមានទំនាក់ទំនងរកាំរកូសខ្លាំងជាមួយតួកគី បានទុកកំហឹងដោយឡែក ហើយបានប្រកាសផ្តល់ជំនួយមនុស្សធម៌និងកម្លាំងសង្គ្រោះទៅឱ្យតួកគីដែរ។
ក្រៅពីអឺរ៉ុប អ្នកជំនាញសង្គ្រោះស្វីស៨០នាក់ អ្នកសង្គ្រោះអង់គ្លេស៦១នាក់ និងឆ្កែ ព្រមទាំងសម្ភារៈផ្សេងៗ នឹងទៅដល់តួកគីក្នុងពេលឆាប់ៗ តាមយន្តការជំនួយបន្ទាន់។ ឥណ្ឌាបានសម្រេចបញ្ជូន ក្រុមរុករក ក្រុមសង្គ្រោះ និងក្រុមគ្រូពេទ្យ ព្រមទាំងសម្ភារៈសង្គ្រោះទៅដល់មុនគេ។
អ៊ុយក្រែនជាប់សង្គ្រាមមែន តែមិនខ្លាចនឹងចែករំលែកអ្នកសង្គ្រោះឱ្យជួយតួកគីទេ។ ទន្ទឹមពេលជាមួយគ្នានេះ លោកពូទីន បានធានាថារុស្ស៊ីត្រៀមជាស្រេចនឹងផ្តល់ជំនួយដ៏ចាំបាច់ដល់តួកគី ដោយមិនភ្លេចឧបត្ថម្ភដល់ខាងស៊ីរីឡើយ។ អាជ្ញាធរតួកគីនិងស៊ីរី ក៏បានទទួលសញ្ញាគាំទ្រជាជំនួយមនុស្សធម៌ពីខាងចិនដែរ។ ប៉ុន្តែអ្វីដែលគួរសម្គាល់ខ្លាំងបំផុតក្នុងគ្រោះមហន្តរាយនេះ គឺជំនួយរបស់អ៊ីស្រាអែលចំពោះស៊ីរី។ ក្រៅពីស្នើបញ្ជូនក្រុមអ្នកសង្គ្រោះនិងជំនួយមនុស្សធម៌ទៅតួកគី លោកនាយករដ្ឋមន្ត្រីអ៊ីស្រាអែលនេតាន់យ៉ាហ៊ូបានប្រកាសថាជំនួយនឹងទៅដល់ស៊ីរី ក្នុងពេលដ៏ឆាប់ដែរ។ គ្មានទំនាក់ទំនងការទូតនឹងគ្នា ស៊ីរីមិនដែលទទួលប្រទេសអ៊ីស្រាអែលទេ ហើយធ្លាប់តតាំងគ្នាជាច្រើនដងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ