អ៊ីរ៉ង់«ត្រៀមខ្លួនស្រេច»ដើម្បីចរចាដោះដូរអ្នកទោសជាមួយសហរដ្ឋអាមេរិក
នៅថ្ងៃសៅរ៍ រដ្ឋបាលទីក្រុងតេហេរ៉ង់ ប្រកាសថា ខ្លួនបានត្រៀមលក្ខណៈរួចជាស្រេច ដើម្បីចុះកិច្ចព្រមព្រៀងដោះដូរអ្នកទោសជាមួយរដ្ឋបាលក្រុងវ៉ាស៊ីនតោន។ នេះបើតាមការឲ្យដឹងរបស់រដ្ឋមន្ត្រីការបរទេសអ៊ីរ៉ង់។ ស្របពេលនឹងដំណឹងចរចាដោះដូរអ្នកទោសជាមួយសហរដ្ឋអាមេរិកនេះ តុលាការអ៊ីរ៉ង់ ក៏បានកាត់ទោសប្រហារជីវិត អ្នកមានសញ្ជាតិពីរ ជាបន្តបន្ទាប់។ ថ្ងៃសៅរ៍ ប្រទេសស៊ុយអែតបានសម្តែងក្តីខឹងសម្បារចំពោះតុលាការអ៊ីរ៉ង់ ដែលសម្រេចកាត់ទោសពលរដ្ឋរបស់ខ្លួន និងចាត់ទុកថា សាលក្រមផ្តាច់ជីវិតបែបនេះ គឺអមនុស្សធម៌ជាទីបំផុត។
ចុះផ្សាយនៅថ្ងៃ៖
អ៊ីរ៉ង់ និង សហរដ្ឋអាមេរិក បានចរចាគ្នាដោះដូរអ្នកទោស។ នេះបើតាមប្រភពពីទីភ្នាក់ព័ត៌មាន Reuters ហើយ រដ្ឋមន្ត្រីក្រសួងការបរទេសអ៊ីរ៉ង់ ក៏បានបញ្ជាក់ដែរថា ប៉ុន្មានថ្ងៃមកនេះ ប្រទេសទាំងពីរបានពិគ្រោះពិភាក្សាគ្នា ឈានទៅចុះកិច្ចព្រមព្រៀមដោះដូរទណ្ឌិត។ ភាគី អ៊ីរ៉ង់ គឺបានត្រៀមខ្លួនរួចស្រេច ហើយប្រសិនបើអ្វីៗដំណើរការទៅល្អ ការដោះដូរអ្នកទោសរវាងអ៊ីរ៉ង់-និងអាមេរិក អាចនឹងប្រព្រឹត្តទៅក្នុងពេលដ៏ខ្លីខាងមុខ។ នេះបើតាមប្រសាសន៍របស់ប្រមុខការទូតអ៊ីរ៉ង់ លោក Hossein Amirabdollahian ។ ទោះយ៉ាងនេះក្តី គេមិនទាន់មានចម្លើយតប ឬការអះអាងអ្វីពីសំណាក់អាជ្ញាធរសហរដ្ឋអាមេរិក ទេ នៅល្ងាចថ្ងៃសៅរ៍ ។
តាមព័ត៌មានទីភ្នាក់ងារព័ត៌មានបារាំងAFP គឺភាគី អ៊ីរ៉ង យល់ព្រមដោះលែងអ្នកទោសអាមេរិក ដែលភាគច្រើនជា អ្នកជំនួញ និងត្រូវអ៊ីរ៉ងចាប់ខ្លួន ហើយកាត់ទោសពីបទល្មើសពុករលួយ ឬបទចារកម្ម ឬបទប្រព្រឹត្តអំពើភេរវកម្ម ជាដើម។ ជាថ្នូរទៅវិញ អ៊ីរ៉ង ចង់បានការដកទណ្ឌកម្មចំពោះមូលនិធិអ៊ីរ៉ង់ យ៉ាងហោច ៧ ពាន់លានដុល្លារ ដែលត្រូវបង្កកនៅប្រទេសកូរ៉េខាងត្បូង។ សាច់ប្រាក់នោះ ត្រូវបង្កកតាមទណ្ឌកម្មសេដ្ឋកិច្ចរបស់រដ្ឋបាលក្រុងវ៉ាស៊ីនតោន។
ទន្ទឹមគ្នានឹងដំណឹងចរចាដោះដូរអ្នកទោស តុលាការកំពូលអ៊ីរ៉ង់ ក៏បានប្រកាស នៅថ្ងៃសៅរ៍ ថាបានកាត់ទោសប្រហារជីវិតចំពោះបុរសម្នាក់ មានសញ្ជាតិពីរ អ៊ីរ៉ង់-ស៊ុយអែត ឈ្មោះ ហាប៊ិប ឆាប់ ( Habib Chhab)។ បទចោទប្រកាន់របស់សាលាជម្រះក្តីអ៊ីរ៉ង់ គឺទណ្ឌិតរូបនេះ បានលូកដៃប្រព្រឹត្តអំពើរលួយ និងចូលរួមសកម្មជាមួយក្រុមឧទ្ទាម ហើយធ្វើអំពើភេវរកម្មជាច្រើនករណី។ ភ្លាមៗ ពីក្រុងស្កុកខុម ប្រមុខការទូតស៊ុយអែត លោកTobias Billstrom បានប្រតិកម្មថា« ការកាត់ទោសប្រហារជីវិតរបស់តុលាការអ៊ីរ៉ង់ គឺអមនុស្សធម៌ ហើយ ស៊ុយអែត ក៏ដូចជាប្រទេសរង្វង់សហភាពអឺរ៉ុប មិនអាចទទួលយកបានទាល់តែសោះ។»
អ៊ីរ៉ង់ មិនទទួលស្គាល់ការមានសញ្ជាតិពីរទេ។ ក្នុងខែមករា អាជ្ញាធរអ៊ីរ៉ង់ ក៏បានផ្តាច់ជីវិត បុរសម្នាក់ សញ្ជាតិពីរ អ៊ីរ៉ង់-ស៊ុយអែត ដោយចោទប្រកាន់ពីបទប្រព្រឹត្តអំពើពុករលួយ។ ក្នុងខែមីនា តុលាការរដ្ឋធានីក្រុង តេហេរ៉ង់ បានសម្រេចកាត់ទោសប្រហារជីវិត លើបុរសម្នាក់ សញ្ជាតិពីរ អ៊ីរ៉ង់-អាល្លឺម៉ង់ ពី«បទល្មើសប្រព្រឹត្តអំពើភេរវកម្ម»។ សព្វថ្ងៃនេះ យ៉ាងហោចណាស់ ជនជាតិបរទេសដើមកំណើតអ៊ីរ៉ង់ ឬ អ្នកមានសញ្ជាតិពីរ ចំនួន ១៦នាក់ កាន់លិខិតឆ្លងដែនបច្ចិមប្រទេស កំពុងតែឃុំខ្លួន នៅក្នុងពន្ធនាគារ អ៊ីរ៉ង់។
ប៉ុន្មានខែចុងក្រោយនេះ អ៊ីរ៉ង់ បានដោះលែងអ្នកទោសស្រីម្នាក់ មានសញ្ជាតិអេស្ប៉ាញ និងបានទម្លាក់ចោទបទចោទប្រកាន់លើអ្នកទោសស្រីម្នាក់ទៀត មានសញ្ជាតិបារាំង ហើយក៏បានដោះដូរអ្នកទោសសញ្ជាតិប៊ែលស៊ិក ដ្បិតមានកិច្ចព្រមព្រៀងជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ