តុលាការអ៊ីរ៉ង់ កាត់ទោសប្រហារជីវិតសកម្មជនអ្នកប្រឆាំងម្នាក់ ពី«បទល្មើសភេរវកម្ម»
នៅអ៊ីរ៉ង់ ថ្ងៃអង្គារ៍ តុលាការរដ្ឋធានីក្រុង តេហេរ៉ង់ បានសម្រេចកាត់ទោសប្រហារជីវិត លើបុរសម្នាក់ ដែលមានសញ្ជាតិពីរ អ៊ីរ៉ង់-អាល្លឺម៉ង់ ពី«បទល្មើសប្រព្រឹត្តអំពើភេរវកម្ម»។ នេះបើតាមប្រភពស្និទ្ធនឹងជនជាប់ចោទសង្ស័យ។ ការចាប់ខ្លួនបុរស ជាសកម្មជនប្រឆាំងរូបនេះ បានធ្វើឡើងទាំងបង្ខំ ទម្រង់បែបដូចជា«ចាប់ជំរិត»ពីសំណាក់អាជ្ញាធរអ៊ីរ៉ង់ ហើយការសម្រេចកាត់ទោសផ្តាច់ជីវិតបែបនេះ គឺជាការមិនអាចទទួលបានទាល់តែសោះ សម្រាប់ប្រទេសអាល្លឺម៉ង់។
ចុះផ្សាយនៅថ្ងៃ៖
ស្តាប់ - ០១:៤៥
សកម្មជនប្រឆាំងរដ្ឋអំណាចអ៊ីរ៉ង់ដ៏លិចធ្លោ លោក ចាំស៊ីដ ស្ហារមាដ (Jamshid Sharmahd) បានរត់ភៀសខ្លួនទៅដល់ស្រុកអាល្លឺម៉ង់ នៅទសវត្សរ៍១៩៨០ និងទទួលបានសញ្ជាតិអាល្លឺម៉ង់ មុននឹងសម្រេចចិត្ត នៅឆ្នាំ២០០៣ បន្តដំណើរជីវិត នៅសហរដ្ឋអាមេរិក។ សហរដ្ឋអាមេរិកនោះហើយ ដែលត្រូវ ពួកក្រុមកម្លាំងសម្ងាត់អ៊ីរ៉ង់ លួចចាប់ជំរិត រួចបញ្ជូនខ្លួនមកអ៊ីរ៉ង់ តាមរយៈព្រលានយន្ត ឌុយប៉ៃ។ ប្រតិបត្តិការពិសេស ចាប់ខ្លួនយ៉ាងសម្ងាត់នេះ គឺស្មុគស្មាញខ្លាំង និងត្រូវ អាជ្ញាធរអ៊ីរ៉ង់ប្រកាសពីភាពជោគជ័យ នៅឆ្នាំ២០២០កន្លងទៅ។ ដំណឹងអកុសល សាលក្រមប្រហារជីវិត លើរូបលោក ធ្លាក់នៅថ្ងៃទី២១កុម្ភៈ។
ការកាត់ទោសប្រហារជីវិតនេះ គឺ បន្ទាប់ពី សហភាពអឺរ៉ុប បានសម្រេចដាក់ទណ្ឌកម្មបន្ថែម ទៅលើរដ្ឋមន្ត្រីអ៊ីរ៉ង់ ២នាក់ និង បុគ្គលមានអំណាចមានលុយគ្រាក់ៗ ១៦នាក់ ទៀត ដែលស្និទ្ធនឹងរដ្ឋអំណាចអ៊ីរ៉ង់។ ពួកគេទាំងនោះ មានជាប់ពាក់ព័ន្ធនឹងការបង្ក្រាបបង្ហូរឈាមទៅលើក្រុមបាតុករអ៊ីរ៉ង់។
នៅអ៊ីរ៉ង់ ករណីកាត់ទោសប្រហារជីវិត ឬព្យួរកផ្តាច់ជីវិតទៅលើអ្នកប្រឆាំងនឹងរដ្ឋអំណាច មិនមែនថ្មីទេ។ ខែមករាថ្មីៗនេះ អាជ្ញាធរអ៊ីរ៉ង់ បានផ្តាច់ជីវិត បុរសម្នាក់ សញ្ជាតិពីរ អ៊ីរ៉ង់-ស៊ុយអែត ដោយចោទប្រកាន់ពីបទប្រព្រឹត្តអំពើពុករលួយ។ បុរសម្នាក់ទៀត កាន់សញ្ជាតិពីរ អ៊ីរ៉ង់-ស៊ុយអែត ដែរ ក៏កំពុងតែប្រឈមមុខនឹងការសម្រេចព្យួរក ។
អ៊ីរ៉ង់ មិនទទួលស្គាល់ការមានសញ្ជាតិពីរទេ។ សព្វថ្ងៃនេះ យ៉ាងហោចណាស់ ជនជាតិបរទេសដើមកំណើតអ៊ីរ៉ង់ ឬ អ្នកមានសញ្ជាតិពីរ ចំនួន ១៦នាក់ កាន់លិខិតឆ្លងដែនបច្ចិមប្រទេស កំពុងតែឃុំខ្លួន នៅក្នុងពន្ធនាគារ អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ