អាមេរិកនិងអឺរ៉ុបថ្កោលទោសអំពើហិង្សារបស់និគមអ៊ីស្រាអែលនៅស៊ីហ្សកដានី
ប្រទេសសម្ព័ន្ធមិត្តរបស់អ៊ីស្រាអែល ដូចជាអាមេរិកនិងសហភាពអឺរ៉ុបបានប្រកាសថ្កោលទោសយ៉ាងដាច់ណាត់ការប្រព្រឹត្តអំពើហិង្សារបស់និគមអ៊ីស្រាអែលទៅលើប្រជាជនប៉ាឡេស្ទីនក្នុងទឹកដីស៊ីហ្សកដានី។ តំបន់ស៊ីហ្សកដានីរបស់ប៉ាឡេស្ទីនត្រូវអ៊ីស្រាអែលរំលោភឈ្លានពានយកមកកាន់កាប់ដោយខុសច្បាប់អន្តរជាតិតាំងពីឆ្នាំ១៩៦៧ និងជួបរលកហិង្សាកាន់តែច្រើន បង្កឡើងដោយនិគមជនអ៊ីស្រាអែល គិតចាប់តាំងពីអ៊ីស្រាអែលប្រកាសសង្រ្គាមវាយប្រហារទៅលើក្រុមហាម៉ាសក្នុងទឹកដីហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៥៦
ខណៈពេលដែលប្រជាជនប៉ាឡេស្ទីនជាង២លាននាក់នៅក្នុងតំបន់ហ្កាហ្សាជួបទុក្ខវេទនាដោយសារការទម្លាក់គ្រាប់បែក ការវាយប្រហាររបស់កងទ័ពអ៊ីស្រាអែលទៅលើក្រុមហាម៉ាសប៉ាឡេស្ទីនក្នុងទឹកដីហ្កាហ្សា ប្រជាជននៅក្នុងតំបន់ស៊ីហ្សកដានីទឹកដីមួយទៀតរបស់ប៉ាឡេស្ទីនដែលត្រូវអ៊ីស្រាអែលដណ្តើមកាន់កាប់តាំងពីឆ្នាំ១៩៦៧ ដោយរំលោភច្បាប់អន្តរជាតិ ក៏កំពុងរងគ្រោះដោយសារការធ្វើទុក្ខបុកម្នេញពីសំណាក់ក្រុមនិគមជនអ៊ីស្រាអែល។
សង្រ្គាមអ៊ីស្រាអែលនិងពួកហាម៉ាសកំពុងអុជ បង្កឲ្យមានភាពតានតឹងខ្លាំងនៅព្រំដែនអ៊ីស្រាអែលជាមួយប្រទេសលីបង់ និងនៅតំបន់ស៊ីហ្សកដានី ជាទីដែលអំពើហិង្សារវាងកងកម្លាំងរក្សាសន្តិសុខនិងក្រុមនិគមជនអ៊ីស្រាអែលជាមួយប្រជាជនប៉ាឡេស្ទីនកើនឡើងក្នុងកម្រិតមួយគួរឲ្យព្រួយបារម្ភ។ តាមអាជ្ញាធរប៉ាឡេស្ទីន ចាប់តាំងពីបើកសង្រ្គាមវាយប្រហារទៅលើតំបន់ហ្កាហ្សា កងទ័ពអ៊ីស្រាអែលដែលភ័យខ្លាចការងើបបះបោររបស់ប្រជាជនប៉ាឡេស្ទីន បានបិទខ្ទប់ រារាំងការធ្វើដំណើរចេញចូលរបស់ប្រជាជននៅតំបន់ស៊ីហ្សកដានី ចំណែកក្រុមនិគមជនអ៊ីស្រាអែលដែលចូលទៅបង្កើតសំណង់ខុសច្បាប់ក្នុងទឹកដីស៊ីហ្សកដានីឆ្លៀតឱកាសប្រព្រឹត្តអំពើហិង្សាសម្លាប់មនុស្ស វាយបណ្តេញប្រជាជនប៉ាឡេស្ទីនចេញពីភូមិផ្ទះសម្បែង។
នៅថ្ងៃអង្គារ ដើមសប្តាហ៍នេះ កងទ័ពអ៊ីស្រាអែលបានបំផ្លាញផ្ទះមួយខ្នងនៅស៊ីហ្សកដានី ដែលជាកម្មសិទ្ធិរបស់អ្នកទទួលខុសត្រូវម្នាក់របស់ក្រុមហាម៉ាស និងបាញ់រះលើក្រុមមនុស្សគប់ដុំថ្មសំដៅរារាំងបេសកកម្មរបស់ទាហានអ៊ីស្រាអែល។
តាមអាជ្ញាធរប៉ាឡេស្ទីន ប្រជាជនប៉ាឡេស្ទីន១២៥នាក់ស្លាប់ដោយគ្រាប់កាំភ្លើងរបស់ទាហាន និងក្រុមនិគមជនអ៊ីស្រាអែល គិតចាប់តាំងពីថ្ងៃទី៧តុលា ថ្ងៃដែលក្រុមហាម៉ាសបើកការវាយប្រហារទ្រង់ទ្រាយធំចូលទៅសម្លាប់មនុស្សជាង១៤០០នាក់នៅអ៊ីស្រាអែល និងចាប់មនុស្សជាង២០០នាក់ធ្វើជាចំណាប់ខ្មាំង។
មន្រ្តីអង្គការសហប្រជាជាតិទទួលបន្ទុកសម្រាប់កិច្ចការប៉ាឡេស្ទីន អំពើហិង្សាសម្លាប់មនុស្សរវាងប៉ាឡេស្ទីន និងអ៊ីស្រាអែលរមែងកើតមានជាហូរហែ ប៉ុន្តែ នៅក្នុងរយៈពេល៣សប្តាហ៍ គិតចាប់តាំងពីផ្ទុះសង្រ្គាមអ៊ីស្រាអែលនិងហាម៉ាស ចំនួនប្រជាជនប៉ាឡេស្ទីនត្រូវក្រុមនិគមជនអ៊ីស្រាអែលបាញ់សម្លាប់បានកើនឡើងទ្វេដង។ ទាំងរដ្ឋាភិបាលអ៊ីស្រាអែល និងអ្នកតំណាងនិគមជនអ៊ីស្រាអែលនៅ ស៊ីហ្សកដានីបដិសេធការចោទប្រកាន់ ដោយថា ពួកគេមិនដឹងរឿងអ្វីឡើយ។ ជាញយដង ក្រុមនិគមជនអ៊ីស្រាអែលតែងទម្លាក់កំហុសទៅលើកងទ័ពអ៊ីស្រាអែលថា ជាអ្នកបើកប្រតិបត្តិការទៅលើជនជាតិប៉ាឡេស្ទីន។ ប្រជាជនប៉ាឡេស្ទីនមួយចំនួនបញ្ជាក់ថា នៅរាល់ពេលចុះបាញ់រះ បំផ្លាញផ្ទះប្រជាជនប៉ាឡេស្ទីន ក្រុមនិគមជនអ៊ីស្រាអែលតែងមានទាហានអ៊ីស្រាអែលចុះអមការពារជានិច្ច។
នៅចំពោះមុខនៃការកើនឡើងអំពើហិង្សាសម្លាប់មនុស្សដែលជាស្នាដៃរបស់ក្រុមនិគមជនអ៊ីស្រាអែលនៅ ស៊ីហ្សកដានី អាមេរិកនិងសហភាពអឺរ៉ុបដែលជាសម្ព័ន្ធមិត្តរបស់អ៊ីស្រាអែលបានចេញមុខថ្កោលទោសនិងទាមទារឲ្យរដ្ឋាភិបាលអ៊ីស្រាអែលទប់ស្កាត់ជាបន្ទាន់ បើសិនមិនចង់ជួបសង្រ្គាមបាចសាចដ៏គ្រោះថ្នាក់។ នៅថ្ងៃពុធ វ៉ាស៊ីនតោនតាមរយៈអ្នកនាំពាក្យរបស់ក្រសួងការបរទេស អះអាងថា ខ្លួនបានផ្ញើសារច្បាស់ៗទៅរដ្ឋាភិបាលអ៊ីស្រាអែលដែលថា ការវាយប្រហាររបស់ក្រុមនិគមជនអ៊ីស្រាអែលគឺជារឿងដែលមិនអាចទទួលយកបាន។ សម្រាប់មន្រ្តីអាមេរិក អំពើហិង្សារបស់និគមជនអ៊ីស្រាអែលទៅលើប្រជាជនប៉ាឡេស្ទីន មិនត្រឹមបង្កគ្រោះថ្នាក់សម្រាប់សន្តិសុខរយៈពេលវែងរបស់អ៊ីស្រាអែល ប៉ុន្តែវាបង្កើតរឿងអយុត្តិធម៌កាន់តែខ្លាំងសម្រាប់ប្រជាជនប៉ាឡេស្ទីនក្នុងទឹកដីស៊ីហ្សកដានី។
បើតាមអ្នកនាំពាក្យរបស់សហភាពអឺរ៉ុបទទួលបន្ទុកកិច្ចការបរទេស លោកPeter Stano អ៊ីស្រាអែលត្រូវតែកាតព្វកិច្ចការពារប្រជាជនប៉ាឡេស្ទីននៅស៊ីហ្សកដានីនៅចំពោះមុខការប្រព្រឹត្តអំពើហិង្សារបស់ក្រុមនិគមជនអ៊ីស្រាអែល។
អំពើហិង្សាប្រដាប់អាវុធបង្កឡើងដោយក្រុមនិគមជនអ៊ីស្រាអែលកើនឡើងចំនួនដោយមកពីមូលហេតុសំខាន់២។ ទី១ ក្រុមនិគមជនអ៊ីស្រាអែលឆ្លៀតឱកាសដែលអាជ្ញាធរ កងទ័ពជាប់រវល់ក្នុងសមរភូមិ ដើម្បីប្រព្រឹត្តអំពើហិង្សាបណ្តេញប្រជាជនប៉ាឡេស្ទីន ដណ្តើមយកដីពង្រីកសំណង់អាណានិគមកិច្ចរបស់ខ្លួន។ ទី២ ក្រុមនិគមជនអ៊ីស្រាអែលបានទទួលការលើកទឹកចិត្តពីមន្រ្តីរដ្ឋាភិបាលមកពីក្រុមស្តាំនិយមជ្រុល។ ថ្មីៗនេះ រដ្ឋមន្រ្តីសន្តិសុខជាតិអ៊ីស្រាអែលមកពីក្រុមស្តាំនិយមជ្រុល លោកBen-Gvirដែលមានផ្ទះសង់ក្នុងតំបន់អាណានិគមកិច្ចនៅ ស៊ីហ្សកដានីបានបញ្ជាឲ្យគេទិញកាំភ្លើងពាក់កណ្តាលស្វ័យប្រវត្តិ១ម៉ឺនដើមដើម្បីបំពាក់ប្រជាជនស៊ីវិល រួមទាំងក្រុមនិគមជនអ៊ីស្រាអែល។ នៅពាក់កណ្តាលខែតុលា លោកអះអាងថា កាំភ្លើងជាង៩០០ដើមត្រូវបានចែកចាយទៅឲ្យប្រជាជនដែលរស់នៅភាគខាងជើងតំបន់ស៊ីហ្សកដានីក្បែរព្រំដែនជាមួយលីបង់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ