អ៊ីស្រាអែលពង្រីកប្រតិបត្តិការយោធានៅហ្កាហ្សា តែលេចដំណឹងព្រមផ្អាកបាញ់
អ៊ីស្រាអែល សហរដ្ឋអាមេរិកនិងហាម៉ាស ទំនងជាបានយល់ព្រមគ្នា ផ្អាកបាញ់ជាគោលការណ៍ដើម្បីដោះដូរចំណាប់ខ្មាំង។ នេះបើតាមព័ត៌មានចុះផ្សាយដោយកាសែត Washington Post។ ប៉ុន្តែទន្ទឹមគ្នានេះ អ៊ីស្រាអែលបានប្រកាសពង្រីកប្រតិបត្តិការយោធា កាន់តែធំឡើង នៅក្នុងតំបន់ហ្កាហ្សា។
ចុះផ្សាយនៅថ្ងៃ៖
ស្តាប់ - ០២:៤៤
យោធាអ៊ីស្រាអែលបានប្រកាសបន្តពង្រីកប្រតិបត្តិការក្នុងតំបន់ភាគខាងជើងហ្កាហ្សា ដោយដៅលើសង្កាត់ថ្មីៗទៀតនៅថ្ងៃសោរ៍ទី១៨វិច្ឆិកាម្សិលមិញ ដូចជាសង្កាត់Jabaliya និង Zaytoun។ បើតាមរូបភាពបង្ហោះតាមបណ្តាញសង្គមដែលទីភ្នាក់ងារសារព័ត៌មានបារាំងAFP អាចផ្ទៀងផ្ទាត់បាន គេឃើញមនុស្សស្លាប់ ខ្លះរបួសប្រលាក់សុទ្ធតែឈាម នៅក្នុងសាលារៀនal-Fakhoura។ សាលាal-Fakhoura ស្ថិតនៅក្នុងជំរំជនភៀសខ្លួនJabaliya គ្រប់គ្រងដោយអង្គការសហប្រជាជាតិ រងការបាញ់ប្រហារពីសំណាក់យោធាអ៊ីស្រាអែល បណ្តាលឱ្យស្លាប់មនុស្សយ៉ាងហោច៨០នាក់។ នេះបើតាមក្រសួងសុខាភិបាលហាម៉ាសនៅហ្កាហ្សាដែលបញ្ជាក់ទៀតថា ការវាយប្រហារទីពីរដៅចំលើអាគារលំនៅឋាននៅសង្កាត់Jabaliya ដដែល ស្លាប់៣២នាក់ក្នុងនោះ១៩នាក់ជាកុមារ។
ចំណែកនៅមន្ទីរពេទ្យal-Chifaដ៏ធំជាងគេនៅហ្កាហ្សាវិញ បានក្លាយជាជំរំមរណៈទៅហើយ។ នេះជាពាក្យរបស់អង្គការសុខភាពពិភពលោកដែលចុះទៅបំពេញបេសកកម្មបានមួយម៉ោងនៅថ្ងៃសៅរ៍ម្សិលមិញ។ អង្គការសុខភាពពិភពលោកនិងដៃគូបានស្នើសុំឱ្យមានផែនការជម្លៀសបន្ទាន់ ក្រុមគ្រូពេទ្យ២៥នាក់និងអ្នកជំងឺនៅសេសសល់ប្រមាណ២៩១នាក់ដែលសុទ្ធតែមានជំងឺធ្ងន់ធ្ងរខ្លាំង ទៅកាន់មន្ទីរពេទ្យផ្សេងទៀតរបស់ហ្កាហ្សា។ មន្ទីរពេទ្យal -Chifaលែងមានទឹក មានភ្លើង មានថ្នាំ និងសម្ភារៈបរិកា្ខរសម្រាប់ព្យាបាលជំងឺទៅហើយ។ សម្រាប់យោធាអ៊ីស្រាអែលដែលបើកយុទ្ធនាការវាយសម្រុកតាំងពីថ្ងៃពុធមក លើមន្ទីរពេទ្យអាល់ជីហ្វា ព្រោះក្បាលម៉ាស៊ីនដឹកនាំហាម៉ាស លាក់ខ្លួនក្នុងបណ្តាញរូងក្រោមដីមន្ទីរពេទ្យនេះ។
អ៊ីស្រាអែលបានសម្រេចបិទខ្ទប់ហ្កាហ្សាទាំងស្រុងតាំងពីថ្ងៃទី៩តុលា និងសច្ចាកម្ចាត់ពួកហាម៉ាសឱ្យអស់ ហើយនាំចំណាប់ខ្មាំងទាំង២៤០នាក់មកវិញ។ តែបើតាមកាសែតWashington Post ដែលសំអាងលើប្រភពស្និទ្ធនឹងសំណុំរឿង អ៊ីស្រាអែល សហរដ្ឋអាមេរិកនិងហាម៉ាសបានរកឃើញកិច្ចព្រមព្រៀងគ្នាជាគោលការណ៍ ដោះដូរអ្នកទោសជាថ្នូរនឹងការផ្អាកបាញ់៥ថ្ងៃ នៅអំឡុងពេលប៉ុន្មានថ្ងៃខាងមុខ ព្រមទាំងជំនួយមនុស្សធម៌ដ៏សម្បើមផង។ តាមគម្រោងកិច្ចព្រមព្រៀង ការដោះលែងប្រព្រឹត្តជាដំណាក់ៗនិងជាក្រុមតូចៗ ជារៀងរាល់ថ្ងៃ ដោយនៅថ្ងៃដំបូងនឹងមានការដោះលែងចំណាប់ខ្មាំងប្រមាណ៥០នាក់។ នេះបើតាមកាសែតវ៉ាស៊ីនតោនប៉ុស្តិ៍ដដែល។ ប៉ុន្តែអ្នកនាំពាក្យសេតវិមានបានចេញមកបដិសេធពាក្យចចាមអារាមនេះ ដោយអះអាងថា អាមេរិកកំពុងបន្តព្យាយាមចរចាខ្លាំងណាស់ដើម្បីសម្រេចកិច្ចព្រមព្រៀងរវាងអ៊ីស្រាអែលនិងហាម៉ាស ស្តីពីបញ្ហាចំណាប់ខ្មាំង គ្រាន់តែក្នុងដំណាក់កាលនេះពុំទាន់មានលទ្ធផលអ្វីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ