សង្គ្រាមហ្កាហ្សា៖ ទាហានអ៊ីស្រាអែលវាយលុកចូលដល់មន្ទីរពេទ្យធំal Chifaរបស់ហ្កាហ្សា
នៅថ្ងៃពុធទី ១៥វិច្ឆិកា២០២៣នេះ ទាហានអ៊ីស្រាអែលបានវាយចូលទៅដល់មន្ទីរពេទ្យal Chifa ដ៏ធំជាងគេបំផុតប្រចាំតំបន់ហ្កាហ្សា ដែលមានពលរដ្ឋភៀសខ្លួនប៉ាឡេស្ទីនរាប់ពាន់នាក់កំពុងសំងំជ្រកកោន។ ប៉ុន្តែសម្រាប់យោធាអ៊ីស្រាអែល មានមូលដ្ឋានយុទ្ធសាស្ត្ររបស់ក្រុមប្រដាប់អាវុធហាម៉ាសតាំងនៅក្នុងមន្ទីរពេទ្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
នៅក្នុងថ្ងៃទី៤០នៃសង្គ្រាមកម្ទេចពួកហាម៉ាសនៅហ្កាហ្សា ទាហានអ៊ីស្រាអែលបានបើកប្រតិបត្តិការស៊ីបដៅលើពួកហាម៉ាស ត្រង់មន្ទីរពេទ្យអាល់ជីហ្វា ដ៏ធំជាងគេដែលស្ថិតនៅភាគខាងជើងតំបន់ហ្កាហ្សា។ នេះបើតាមសេចក្តីថ្លែងការណ៍របស់អ៊ីស្រាអែល។
បន្ទាប់ពីរងការឡោមព័ទ្ធ និងប្រយុទ្ធតតាំងជាមួយក្រុមប្រដាប់អាវុធហាម៉ាសនៅសង្កាត់ជុំវិញមន្ទីរពេទ្យ អស់ជាច្រើនថ្ងៃមក នៅថ្ងៃពុធទី១៥វិច្ឆិកា ទាហាននិងកងកម្មង់ដូអ៊ីស្រាអែលរាប់សិបនាក់បានសម្រុកចូលទៅដល់ក្នុងមន្ទីរពេទ្យអាល់ជីហ្វាតែម្តង និងបានបញ្ជាឱ្យជនប៉ាឡេស្ទីនព្រមចុះចូល។ ក្មេងចាស់ប្រុសស្រីចាប់ពីអាយុ១៦ឆ្នាំឡើងទៅទាំងអស់ ត្រូវដើរចេញពីកន្លែងលាក់ខ្លួនទៅទីធ្លាខាងក្នុងរបស់មន្ទីរពេទ្យ ដោយលើកដៃឡើងលើ ជាសញ្ញាសុំចុះចាញ់។ ដោយបាញ់ឡើងលើ ទាហានអ៊ីស្រាអែលខ្លះពាក់មួកបាំងមុខសល់តែប្រលោះភ្នែក បានរុករុលក្នុងមន្ទីរពេទ្យ ពីបន្ទប់មួយទៅបន្ទប់មួយ ពីផ្នែកមួយទៅផ្នែកមួយ ចោទសួរបុគ្គលិកពេទ្យ អ្នកជំងឺ និងគ្រូពេទ្យ ព្រមទាំងឆែកឆេរលើខ្លួនស្រ្តីនិងកុមារ ទំនងដើម្បីស្វែងរកពួកហាម៉ាសបង្កប់ខ្លួន។
នៅខាងក្រៅ កងរថក្រោះនិងរថពាសដែកអ៊ីស្រាអែលដែលឡោមព័ទ្ធមន្ទីរពេទ្យតាំងពីពីរបីថ្ងៃមកហើយនោះ បានចូលទៅដល់ផ្នែកខាងក្នុងនៃមន្ទីរពេទ្យ រួចចតនៅគ្រប់ច្រកចូលកន្លែងសង្គ្រោះបន្ទាន់ និងនៅផ្នែកផ្សេងៗទៀត។
ដោយថតបង្ហោះបង្ហាញអំពីបណ្តាញនិងជម្រករូងក្រោមដីក្នុងបរិវេណមន្ទីរពេទ្យ យោធាអ៊ីស្រាអែលយល់ថាមន្ទីរពេទ្យអាល់ជីហ្វាជាជម្រករចនាសម្ព័ន្ធយុទ្ធសាស្ត្ររបស់ចលនាហាម៉ាសដែលយកពលរដ្ឋស៊ីវិលជាខែលការពារ។ តែទាហានអ៊ីស្រាអែលបានបញ្ជូនក្រុមពេទ្យចេះនិយាយភាសាអារ៉ាប់និងបានទទួលការហាត់ហ្វឹកហ្វឺនពិសេសមកជួយព្យាបាលដើម្បីកុំឱ្យហាម៉ាសបន្លំប្រើអ្នកជំងឺជាខែលបាន។ សេតវិមានក៏បានអះអាងដូចគ្នាកាលពីថ្ងៃអង្គារថាពួកហាម៉ាសនិងជីហាតអ៊ីស្លាមជាសម្ព័ន្ធមិត្ត មានទីបញ្ជាការនិងទីចាត់ការ នៅមន្ទីរពេទ្យអាល់ជីហ្វានេះ។
ប៉ុន្តែចលនាអ៊ីស្លាមជ្រុលនិយមហាម៉ាសនិងក្រសួងសុខាភិបាលនៅហ្កាហ្សាបានបដិសេធជាផ្លូវការពាក្យចោទរបស់អ៊ីស្រាអែលនិងទាមទារឱ្យមានគណៈកម្មការអង្កេតអន្តរជាតិចុះមកពិនិត្យផ្ទាល់។ អង្គការសហប្រជាជាតិ និងសហគមន៍អន្តរជាតិត្រូវតែធ្វើអន្តរាគមន៍ភ្លាមដើម្បីបញ្ចប់ប្រតិបត្តិការយោធាអ៊ីស្រាអែលក្នុងមន្ទីរពេទ្យ។ នេះជាសម្រែករបស់រដ្ឋមន្ត្រីក្រសួងសុខាភិបាលនៅហ្កាហ្សាដោយបញ្ជាក់បន្ថែមថាមានសពយ៉ាងហោចណាស់១៧៩នាក់ត្រូវបានកប់ក្នុងផ្នូររួម។ បើតាមអង្គការសហប្រជាជាតិ មានមនុស្សប្រមាណ២៣០០នាក់ ជាអ្នកជំងឺ ជាគ្រូពេទ្យនិងអ្នកភៀសខ្លួនសង្គ្រាមកំពុងជ្រកកោនក្នុងមន្ទីរពេទ្យក្នុងលក្ខខណ្ឌដ៏លំបាកលំបិនបំផុត គ្មានទឹកគ្មានភ្លើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ