ពួកហាម៉ាស និងអ៊ីស្រាអែលបានអនុវត្តដំណាក់កាលទី១នៃការដោះដូរចំណាប់ខ្មាំង និងអ្នកទោស
ការផ្អាកបាញ់មនុស្សធម៌ចំនួន ៤ថ្ងៃរវាងអ៊ីស្រាអែល និងពួកហាម៉ាសបានចូលជាធរមាននាព្រឹកថ្ងៃសុក្រ ទី២៤ វិច្ឆិកា។ ការទម្លាក់ចុងកាណុងកាំភ្លើងចុះនេះបានធ្វើឡើងស្របតាមកិច្ចព្រមព្រៀងដែលអ៊ីស្រាអែល និងហាម៉ាសបានចុះហត្ថលេខាកាលពីថ្ងៃពុធ ទី២២ វិច្ឆិកាដោយមានប្រទេសកាតាជាអន្តរការី។ នេះជាលើកទី១ គិតតាំងពីថ្ងៃទី៧ តុលាដែលតំបន់ហ្កាហ្សាបានស្គាល់ភាពស្ងប់ស្ងាត់គ្មានការទម្លាក់គ្រាប់បែកពីទាហានអ៊ីស្រាអែល។
ចុះផ្សាយនៅថ្ងៃ៖
ស្តាប់ - ០២:២៩
តាមកិច្ចព្រមព្រៀងរវាងអ៊ីស្រាអែល និងពួកហាម៉ាស ការផ្អាកបាញ់មនុស្សធម៌ចំនួន ៤ថ្ងៃជាថ្នូរនឹងការដោះលែងចំណាប់ខ្មាំងចំនួន ៥០នាក់ពីខាងពួកហាម៉ាស និងការដោះលែងអ្នកទោសប៉ាឡេស្ទីនចំនួន ១៥០នាក់ពីខាងអ៊ីស្រាអែល។ តែការដោះលែងចំណាប់ខ្មាំង និងការដោះលែងអ្នកទោសនេះនឹងត្រូវធ្វើឡើងជាដំណាក់កាល។ ដំណាក់កាលទី១ បានចាប់ផ្តើមនៅរសៀលថ្ងៃសុក្រ ទី២៤ វិច្ឆិកាដោយពួកហាម៉ាសបានដោះលែងចំណាប់ខ្មាំងជនជាតិអ៊ីស្រាអែលចំនួន ១៣នាក់ ក្នុងនោះជាស្រ្តី និងកូនក្មេង។
ដំបូង ពួកហាម៉ាសបានប្រគល់ចំណាប់ខ្មាំងជនជាតិអ៊ីស្រាអែលទាំង ១៣នាក់ទៅឲ្យកាកបាទក្រហមអន្តរជាតិនៅច្រកព្រំដែនរវាងតំបន់ហ្កាហ្សា និងប្រទេសអេហ្ស៊ីប។ បន្ទាប់មក ចំណាប់ខ្មាំងជនជាតិអ៊ីស្រាអែលទាំង ១៣នាក់ត្រូវបានកាកបាទក្រហមអន្តរជាតិប្រគល់ទៅឲ្យរដ្ឋអំណាចអេហ្ស៊ីប និងបន្ទាប់មកទៀត រដ្ឋអំណាចអេហ្ស៊ីបបានប្រគល់បន្តទៅឲ្យរដ្ឋអំណាចអ៊ីស្រាអែល។ ចំណែកអ៊ីស្រាអែលបានដោះលែងអ្នកទោសប៉ាឡេស្ទីនចំនួន ៣៩នាក់ ក្នុងនោះមានស្រ្តីចំនួន ២៤នាក់ និងកូនក្មេងចំនួន ១៥នាក់។
ក្រៅពីចំណាប់ខ្មាំងជនជាតិអ៊ីស្រាអែលចំនួន ១៣នាក់ ពួកហាម៉ាសក៏បានដោះលែងចំណាប់ខ្មាំងបរទេសចំនួន ១១នាក់ផ្សេងទៀត ក្នុងនោះមានជនជាតិថៃចំនួន ១០នាក់ និងជនជាតិហ្វីលីពីនម្នាក់។ តែចំណាប់ខ្មាំងជនជាតិថៃទាំង ១០នាក់ និងជនជាតិហ្វីលីពីនម្នាក់មិនបានរាប់បញ្ចូលនៅក្នុងចំណោមចំណាប់ខ្មាំងទាំង ៥០នាក់ដែលពួកហាម៉ាសត្រូវដោះលែងតាមការព្រមព្រៀងជាមួយអ៊ីស្រាអែលទេ។ បន្ទាប់ពីដំណាក់កាលទី១ ក្នុងថ្ងៃសុក្រ ទី២៤ វិច្ឆិកា ការដោះលែងចំណាប់ខ្មាំងពីដៃពួកហាម៉ាសជាថ្នូរនឹងការដោះលែងអ្នកទោសប៉ាឡេស្ទីនពីដៃអ៊ីស្រាអែលត្រូវបន្តមានចំនួន ៣ថ្ងៃទៀត។
ជាសរុបក្នុងរយៈពេល ៤ថ្ងៃនៃកិច្ចព្រមព្រៀងផ្អាកបាញ់មនុស្សធម៌ ពួកហាម៉ាសត្រូវដោះលែងចំណាប់ខ្មាំងចំនួន ៥០នាក់ ហើយអ៊ីស្រាអែលត្រូវដោះលែងអ្នកទោសប៉ាឡេស្ទីនចំនួន ១៥០នាក់។ គួរបញ្ជាក់ថា មានចំណាប់ខ្មាំងចម្រុះជាតិសាសន៍សរុបចំនួនប្រមាណជា ២៤០នាក់ត្រូវបានពួកហាម៉ាសចាប់ឃុំកាលពីថ្ងៃទី៧ តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ