អ៊ីស្រាអែលនិងហាម៉ាសព្រមផ្អាកបាញ់មនុស្សធម៌ជាថ្នូរនឹងការដោះលែងចំណាប់ខ្មាំង
រដ្ឋាភិបាលអ៊ីស្រាអែលបានប្រកាសនៅថ្ងៃពុធទី ២២វិច្ឆិកា២០២៣នេះព្រមទទួលយកការផ្អាកបាញ់ជាថ្នូរនឹងដោះដូរចំណាប់ខ្មាំង៥០នាក់ដំបូង។ ហាម៉ាសបានប្រកាសស្វាគមន៍ឈប់បាញ់មនុស្សធម៌។ ចំណែកប្រទេសកាតាក៏បានចេញមុខមកបញ្ជាក់បន្ថែមទៀតថាអ៊ីស្រាអែលនិងហាម៉ាសបានព្រមព្រៀងផ្អាកបាញ់ និងដោះដូរចំណាប់ខ្មាំងជាមួយអ្នកទោសប៉ាឡេស្ទីន។
ចុះផ្សាយនៅថ្ងៃ៖
ស្តាប់ - ០២:២៤
បន្ទាប់ពីលង់ក្នុងភាពហិង្សាតានតឹងអស់ជាច្រើនសប្តាហ៍ សង្គ្រាមនៅហ្កាហ្សាចាប់ស្គាល់ភាពធូរស្បើយដំបូង ដោយនៅថ្ងៃនេះភាគីអ៊ីស្រាអែលនិងហាម៉ាសបានប្រកាសព្រមព្រៀងឈប់បាញ់មនុស្សធម៌រយៈពេលបួនថ្ងៃ ជាថ្នូរនឹងការដោះដូរអ្នកទោសនិងជំនួយមនុស្សធម៌ដ៏សម្បើម។
បើតាមខ្លឹមសារលម្អិតនៃកិច្ចព្រមព្រៀងផ្សព្វផ្សាយដោយក្រសួងការបរទេសកាតា ដែលជាអន្តរការី ការដោះលែងចំណាប់ខ្មាំងនឹងប្រព្រឹត្តជាដំណាក់ៗនិងជាក្រុមតូចៗ ជារៀងរាល់ថ្ងៃ។ ក្នុងដំណាក់កាលទីមួយដែលត្រូវចាប់ផ្តើមនៅថ្ងៃព្រហស្បតិ៍ទី ២៣វិច្ឆិកា នឹងមានការដោះលែងចំណាប់ខ្មាំងជាង៥០នាក់។ ចំណាប់ខ្មាំងស៊ីវិលភេទស្រីនិងកុមារ បានទទួលសេរីភាពមុនគេ ជាថ្នូរនឹងការដោះលែងអ្នកទោសស្ត្រីនិងកុមារជាប់ឃុំឃាំងក្នុងពន្ធនាគារអ៊ីស្រាអែល។ បើតាមហាម៉ាស នេះជាការដោះដូរ ចំណាប់ខ្មាំង១០នាក់ទល់នឹងអ្នកទោសប៉ាឡេស្ទីន៣០នាក់។
ចំណែកអ៊ីស្រាអែលអះអាងថា ចំនួនចំណាប់ខ្មាំងត្រូវដោះលែងនឹងកើនឡើងជាលំដាប់នៅដំណាក់កាលបន្តបន្ទាប់ ស្របតាមការព្រមព្រៀងពោលគឺ ភាគីជម្លោះទាំងពីរអាចនឹងបន្តបទឈប់បាញ់ ដោយបើដោះលែងចំណាប់ខ្មាំងបន្ថែម១០នាក់ នឹងមានការឈប់បាញ់មួយថ្ងៃបន្ថែមទៀត។
ក្នុងពេលមានបទឈប់បាញ់នេះ ក្បួនដឹកជំនួយមនុស្សធម៌និងជំនួយបន្ទាន់ទាំងខ្សែៗ រាប់ទាំងឡានប្រេងផង នឹងអាចចូលទៅដល់តំបន់ហ្កាហ្សាដែលអ៊ីស្រាអែលបានបិទខ្ទប់ទាំងស្រុងតាំងពីថ្ងៃទី៩តុលាមក។
សម្រាប់រដ្ឋាភិបាលអ៊ីស្រាអែល ផ្អាកបាញ់មនុស្សធម៌មិនមែនជាការបិទបញ្ចប់សង្គ្រាមនៅហ្កាហ្សាទេ។ អ៊ីស្រាអែលនឹងចាប់បើកប្រតិបត្តិការយោធាយ៉ាងពេញទំហឹងវិញ ដើម្បីកម្ទេចចលនាហាម៉ាសឱ្យខ្ទេចឈប់ជាការគំរាមកំហែងសន្តិសុខដល់រដ្ឋអ៊ីស្រាអែល និងនៅពេលចំណាប់ខ្មាំងក្នុងដែលហាម៉ាសបានសេរីភាពវិញអស់។
តែយ៉ាងណាក៏ដោយ ក៏សហគមន៍អន្តរជាតិ ផ្តើមដោយសហរដ្ឋអាមេរិក បារាំង ចិន និងរុស្ស៊ី សុទ្ធតែអបអរស្វាគមន៍បទឈប់បាញ់មនុស្សធម៌អ៊ីស្រាអែល-ហាម៉ាសទាំងអស់គ្នា។ ប្រធានាធិបតីអាមេរិកលោកចូបៃដិន ពេញចិត្តបទឈប់បាញ់នេះខ្លាំងណាស់។ សម្រាប់រុស្ស៊ីបទផ្អាកបាញ់នេះជាអ្វីដែលម៉ូស្គូអំពាវនាវរកតាំងពីផ្តើមជម្លោះភ្លាម។ ចំណែកចិនវិញយល់ថាការផ្អាកបាញ់បណ្តោះអាសន្ន នឹងធ្វើឱ្យវិបត្តិមនុស្សធម៌បានស្គាល់ភាពធូរស្បើយ និងជាកាត់បន្ថយភាពតានតឹង។ បារាំងលើកសរសើរអំពីស្នាដៃកាតាជាអន្តរការី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ