សហរដ្ឋអាមេរិក ស្នើអាជ្ញាធរប៉ាឡេស្ទីន ឲ្យកែទម្រង់រចនាសម្ព័ន្ធដឹកនាំថ្មី
សង្គ្រាមអ៊ីស្រាអែល និងក្រុមហាម៉ាសប៉ាឡេស្ទីន នៅតែបន្ត។ ក៏ប៉ុន្តែ ប៉ុន្មានសប្តាហ៍ចុងក្រោយនេះ ថ្នាក់ដឹកនាំជាន់ខ្ពស់នៃរដ្ឋបាលទីក្រុងវ៉ាស៊ីនតោន បានអញ្ជើញទៅអ៊ីស្រាអែល និងតំបន់ស៊ីសហ្ស័កដានី ដើម្បីស្នើដំណោះស្រាយនៅក្រោយចប់សង្គ្រាម។ ពោលគឺសហរដ្ឋអាមេរិកឲ្យរៀបចំកែទម្រង់ថ្មី ប្តូរក្រុមដឹកនាំអាជ្ញាធរប៉ាឡេស្ទីន បើកលំហូរសេរីភាពសារព័ត៌មាន ហើយនិងរៀបចំការបោះឆ្នោតដោយសេរី។ ចំណែក ថ្នាក់ដឹកនាំអាជ្ញាធរប៉ាឡេស្ទីន លោក ម៉ះមូដ អាបាស់ បានឲ្យដឹងសារព័ត៌មានថា បញ្ហាមិននៅត្រង់ការប្តូរ«ឈាមថ្មី»ដឹកនាំប៉ាឡេស្ទីន ទេ ប៉ុន្តែបញ្ហាមកពីនយោបាយដឹកនាំរបស់រដ្ឋអំណាចអ៊ីស្រាអែល ទៅវិញទេ។
ចុះផ្សាយនៅថ្ងៃ៖
ស្តាប់ - ០២:២៦
ចាប់តាំងពីផ្ទុះសង្គ្រាមអ៊ីស្រាអែលនិងក្រុមហាម៉ាស នៅថ្ងៃទី៧ ខែតុលា មកម្ល៉េះ ដែល ប្រធានាធិបតីសហរដ្ឋអាមេរិក បានបញ្ជាក់យ៉ាងច្បាស់ ថាចង់ឃើញការសើរើផ្លាស់ប្តូរក្រុមថ្នាក់ដឹកនាំអាជ្ញាធរប៉ាឡេស្ទីន នៅពេលសង្គ្រាមផុតរលត់ទៅ។
ថ្ងៃសុក្រថ្មីៗនេះ អ្នកទីប្រឹក្សាលោកចូ បៃដិន ខាងសន្តិសុខជាតិអាមេរិក គឺលោក ជេក ស៊ូលីវ៉ាន់ បានជួបពិភាក្សាជាមួយនឹងមេថ្នាក់ដឹកនាំអាជ្ញាធរប៉ាឡេស្ទីន លោក ម៉ះមូដ អាបាស់ ហើយនិងបានរំឭកជំរុញឲ្យផ្លាស់ប្តូរក្បាលម៉ាស៊ីលដឹកនាំឲ្យបានឆាប់រហ័ស។ នេះគឺបន្ទាប់ពីចុងខែវិច្ឆិកកន្លងទៅ ដែលប្រមុខការទូតអាមេរិក លោក អង់តូនី ប្ល៊ីងកិន ជួបក្រុមមេថ្នាក់ដឹកនាំអាជ្ញាធរប៉ាឡេស្ទីន ហើយនិងបានបញ្ជាក់អំពីសារៈសំខាន់នៃការផ្លាស់ប្តូរកែទម្រង់ ទប់ស្កាត់អំពើពុករលួយ ពង្រឹងផ្នែកសង្គមស៊ីវិល ហើយនិង បើកចំហរគាំទ្រឲ្យមានសេរីភាពសារព័ត៌មាន។
មិនតែប៉ុណ្ណោះ សំណើរបស់រដ្ឋបាលក្រុងវ៉ាស៊ីនតោន គឺចង់ឲ្យលោក ម៉ះមូដ អាបាស់ ផ្ទេរអំណាច ឬបែងចែកអំណាចនីតិប្រតិបត្តិទៅឲ្យ អនុប្រធានណាម្នាក់។ ចំពោះសហរដ្ឋអាមេរិក និងសម្ព័ន្ធមិត្តអ៊ីស្រាអែល គឺ សម្លឹងឃើញនិងចង់បាន អ្នកបន្តវេនដែលអាចមកជំនួសរូបលោក ម៉ះមូដ អាបាស់ គឺជាបេក្ខជនលោក ហូស្សេន អាល-ស្ហែក្ហ (Hussein al-Sheikh) ដែលជាថ្នាក់ដឹកនាំជាន់ខ្ពស់នៃគណៈកម្មាធិការចលនារំដោះប៉ាឡេស្ទីន និងជាអ្នកទទួលបន្ទុកកិច្ចការជនស៊ីវិលប៉ាឡេស្ទីន។
គម្រោងសំណើស្នើរបស់សហរដ្ឋអាមេរិកនេះ បានដាក់ទៅកាន់បណ្ដាប្រទេសដែលមានឥទ្ធិពលលើអាជ្ញាធរប៉ាឡេស្ទីន គឺដូចជា ហ្ស័កដានី អេហ្ស៊ីប កាតារ និង អេម៊ីរ៉ាត់អារ៉ាប់រួម។ ប៉ុន្តែ ប្រទេសទាំងនោះ នៅមិនទាន់បញ្ជាក់យោបល់ថាម្តេចនៅឡើយទេ។
ក្នុងបទសម្ភាសជាមួយនឹងទីភ្នាក់ព័ត៌មាន Reuters គឺ ថ្នាក់ដឹកនាំអាជ្ញាធរប៉ាឡេស្ទីន បានអះអាងយល់ព្រមផ្លាស់ប្តូររចនាសម្ព័ន្ធដឹកនាំប៉ាឡេស្ទីន ហើយនិងរៀបចំការបោះឆ្នោតឡើងវិញ។ ការបោះឆ្នោតដែលបានផ្អាកចាប់ពីឆ្នាំ២០០៦មក។ បើតាមប្រភពពីទីភ្នាក់ងារព័ត៌មានបារាំងAFP គឺ លោក ម៉ះមូដ អាបាស់ បញ្ជាក់ថា ការផ្លាស់ប្តូរទាំងនេះ ត្រូវមានលក្ខខណ្ឌ១ ជាថ្នូរ។ នោះគឺការបង្កើត«រដ្ឋប៉ាឡេស្ទីន»។ លោកស្នើឲ្យរដ្ឋាភិបាលអាមេរិក ត្រូវតែដាក់សម្ពាធជំរុញឲ្យ រដ្ឋាភិបាលអ៊ីស្រាអែល យល់ព្រមឲ្យបង្កើត រដ្ឋប៉ាឡេស្ទីនជាផ្លូវការ ដែលអាចគ្រប់គ្រងដែនដីតំបន់ហ្កាហ្សា តំបន់ស៊ីសហ្ស័កដានី ហើយនិង ហ្សេរ៉ូសាឡឹមខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ