លោក នេតាន់យ៉ាហ៊ូ បញ្ជាឲ្យត្រៀមជម្លៀសប្រជាជនតំបន់រ៉ាហ្វាហ៍ដើម្បីកម្ទេចពួកហាម៉ាស
បន្ទាប់ពីបើកការវាយប្រហារនៅក្រុង រ៉ាហ្វាហ៍, នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ បានចេញបញ្ជាបន្ថែមឲ្យ ក្រុមយោធាអ៊ីស្រាអែល ត្រៀមជម្លៀសប្រជាជនប៉ាឡេស្ទីន ចេញពីក្រុង រ៉ាហ្វាហ៍ ។ ក្រុងនេះ ឋិតប៉ែកខាងត្បូងតំបន់ ហ្កាហ្សា ដែលមានប្រជាជន ប្រមាណ ១ ៣០០ ០០០ នាក់។ គម្រោងជម្លៀសប្រជាជននេះ ត្រូវ អង្គការអន្តរជាតិ រិះគន់ជាខ្លាំង ហើយសូម្បីតែសម្ព័ន្ធមិត្តអាមេរិក ក៏ទំនាស់ដែរ។ ទោះជាយ៉ាងនេះក្តី នាយករដ្ឋមន្ត្រីអ៊ីស្រាអែល នៅតែប្រកាន់ជំហរដាច់ខាត ថា ត្រូវកម្ទេចពួកប្រដាប់អាវុធហាម៉ាសនៅក្រុង រ៉ាហ្វាហ៍ ដែលជាជម្រកចុងក្រោយរបស់ពួកគេ។
ចុះផ្សាយនៅថ្ងៃ៖
ស្តាប់ - ០៣:០១
នាយករដ្ឋមន្ត្រីអ៊ីស្រាអែល លោក បេនចាមិន នេតាន់យ៉ាហ៊ូ ពីថ្ងៃពុធ បានបើកភ្លើងខៀវឲ្យយោធាសម្រុកវាយប្រហារនៅ ក្រុង រ៉ាហ្វាហ៍ ប៉ែកខាងត្បូងតំបន់ ហ្កាហ្សា។ ក្រុង រ៉ាហ្វាហ៍ ជាកន្លែងចុងក្រោយ សម្រាប់ជនប៉ាឡេស្ទីន សំងំជ្រកគេចពីសង្គ្រាម។ ស្រាប់តែនៅថ្ងៃសុក្រ ទី៩កុម្ភៈ លោក នេតាន់យ៉ាហ៊ូ បានដាក់បញ្ជាបន្ថែម ឲ្យកងទ័ពអ៊ីស្រាអែល រៀបចំផែនការជម្លៀសប្រជាជន ជាង ១ ៣០០ ០០០ នាក់ ដើម្បីនឹងអាចវែកផ្លូវ កម្ទេចពួកក្រុមប្រដាប់អាវុធហាម៉ាស ឲ្យអស់ដល់ឫសគល់។ បើតាមលោកនេតាន់យ៉ាហ៊ូ, អ៊ីស្រាអែលមិនអាចសម្រេចគោលដៅបានឡើយ ប្រសិនបើមិនបានកម្ទេចកម្ចាត់ពួកហាម៉ាសដែលសំងំលាក់ខ្លួនជាមួយប្រជាជននៅក្រុង រ៉ាហ្វាហ៍។ ដូច្នេះ ត្រូវតែជម្លៀសប្រជាជនចេញពីទីតាំងប្រយុទ្ធ។
ផ្ទុយទៅវិញ ផែនការរបស់ថ្នាក់ដឹកនាំអ៊ីស្រាអែល ត្រូវ សហគមន៍អន្តរជាតិ បញ្ចេញមតិជំទាស់ សូម្បីតែ សម្ព័ន្ធសហរដ្ឋអាមេរិក ក៏មិនយល់ស្របដែរ។ លោក អង់តូនី ប្ល៊ីងកិន រដ្ឋមន្រ្តីក្រសួងការបរទេសសហរដ្ឋអាមេរិក ដែលបញ្ចប់ទស្សនកិច្ចនៅតំបន់ដើមបូព៌ា និងនៅអ៊ីស្រាអែល កាលពីព្រហស្បតិ៍ បានថ្លែងប្រាប់ផ្ទាល់ទៅកាន់លោក បេនចាមិន នេតាន់យ៉ាហ៊ូ ថាសហរដ្ឋអាមេរិក មិនគាំទ្រប្រតិបត្តិសឹកនៅក្រុង រ៉ាហ្វាហ៍ នោះឡើយ។ បើតាមប្រមុខទូតអាមេរិក, ការវាយសម្រុកចូលក្រុងរ៉ាហ្វាហ៍ ដោយគ្មានគម្រោងផែនការច្បាស់លាស់ និងមិនបានគិតគូរដល់សុវត្ថិភាពប្រជាជនស៊ីវិល ជាគ្រោះមហន្តរាយដ៏ធំ។
លោកស្រី ណាដ្យា ហារដម៉ាន់ អ្នកជំនាញច្បាប់ជនភៀសខ្លួន នៃអង្គការឃ្លាំមើលសិទ្ធិមនុស្ស Human Right Watch បានថ្លែងក្តីបារម្ភថា ការបង្ខំជម្លៀសប្រជាជនប៉ាឡេស្ទីន ចេញពីក្រុង រ៉ាហ្វាហ៍ ដល់ជាង១ ៣០០ ០០០ នាក់ ដោយមិនដឹងថាត្រូវដាក់នៅកន្លែងសុវត្ថិភាពណាមួយផង ជាទង្វើខុសច្បាប់ ហើយនិងនាំហានិភ័យដ៏សម្បើម។ អ្នកជំនាញច្បាប់ជនភៀសខ្លួនរូបនេះ ក៏អំពាវនាវឲ្យសហគមអន្តរជាតិជួយចាត់វិធានការជាបន្ទាន់ ដ្បិតថា គ្មានកន្លែងសុវត្ថិភាពសម្រាប់ពលរដ្ឋក្នុងតំបន់ហ្កាហ្សាទៀតឡើយ។
ទន្ទឹមនឹងគ្នានេះ អគ្គលេខាធិការអង្គការសហប្រជាជាតិ លោក អង់តូនីញ៉ូ ហ្គូទែរស៍ ចាត់ទុកថា គម្រោងវាយប្រហាររបស់អ៊ីស្រាអែលនេះ ជាសុបិនអាក្រក់សម្រាប់មនុស្សជាតិ។ ប្រមុខការទូតសហភាពអឺរ៉ុប លោក ហ្សូសេព បូរែល ថា ផែនការវាយលុករបស់លោក នេតាន់យ៉ាហ៊ូ នឹងនាំគ្រោះមហន្តរាយធ្ងន់ធ្ងរដល់ប្រជាជនស៊ីវិល ដែលពេលនេះកំពុងតែវេទនាខ្លាំងស្រេចទៅហើយ។
ទោះបីជាយ៉ាងនេះក្តី ការវាយប្រហារទៅលើក្រុង រ៉ាហ្វាហ៍ កាន់តែមានច្រើនឡើងនៅព្រឹកថ្ងៃសៅរ៍ ហើយទីនោះ ប្រជាជនខ្លះ បានបីពរសពកូនក្មេង បង្ហាញអ្នកកាសែតអន្តរជាតិ។ នេះបើតាមទីភ្នាក់ងារព័ត៌មានបារាំងអាអេហ្វប៉េ និងសាក្សីនៅក្រុង រ៉ាហ្វាហ៍។ ក្នុងសេចក្តីថ្លែងការណ៍ ចេញផ្សាយនៅថ្ងៃទី១០កុម្ភៈ អាជ្ញាធរក្រុមហាម៉ាស បានអះអាងថា កាវាយប្រហាររបស់អ៊ីស្រាអែលទៅលើក្រុងរ៉ាហ្វាហ៍ អាចនឹងធ្វើឲ្យមនុស្សរាប់ពាន់នាក់ ស្លាប់ និងរងរបួស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ