អ៊ីស្រាអែលបិទផ្លូវចរចាជាមួយក្រុមហាម៉ាស និងសង្ឃឹមទទួលជ័យជំនះទាំងស្រុងនៅប៉ុន្មានខែខាងមុខ
អ៊ីស្រាអែលបែរមកវាយប្រហារភាគខាងត្បូងហ្កាហ្សា និងបិទផ្លូវចរចាជាមួយក្រុមហាម៉ាស។ កងទ័ពអ៊ីស្រាអែលបង្កើនការវាយប្រហារទីក្រុងRafah ភាគខាងត្បូងហ្កាហ្សា ជាប់ជាមួយព្រំដែនអេហ្ស៊ីប នៅថ្ងៃព្រហស្បតិ៍ បន្ទាប់ពីនាយករដ្ឋមន្រ្តីលោកបេនចាមីន នេតាន់យ៉ាហ៊ូ បដិសេធមិនចរចាជាមួយក្រុមហាម៉ាស និងចេញបញ្ជាឲ្យត្រៀមវាយលុកចូលភាគខាងត្បូងហ្កាហ្សា។ នៅចំពោះមុខជំហររឹងទទឹងរបស់ប្រមុខរដ្ឋាភិបាលអ៊ីស្រាអែល ប្រមុខការបរទេសអាមេរិកលោកអង់តូនី ប្លីងកិនដែលទើបបិទបញ្ចប់ទស្សនកិច្ចមួយជុំតំបន់ដើមបូព៌ា នៅប្រទេសអ៊ីស្រាអែល បានត្រឹមតែអំពាវនាវឲ្យអ៊ីស្រាអែលគិតគូរជាអាទិភាពដល់អាយុជីវិតប្រជាជនប៉ាឡេស្ទីន នៅក្នុងប្រតិបត្តិការយោធានៅភាគខាងត្បូងហ្កាហ្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
៥ខែនៃសង្រ្គាមហ្កាហ្សា ដើម្បីសងសឹកក្រុមហាម៉ាស ប៉ាឡេស្ទីន អ៊ីស្រាអែលរបស់លោកនាយករដ្ឋមន្រ្តី បេនចាមីន នេតាន់យ៉ាហ៊ូ កាន់តែសម្រុកវាយប្រហារទឹកដីហ្កាហ្សា។ ជាក់ស្តែង បន្ទាប់ពីបិទបញ្ចប់ដំណាក់កាលបោសសម្អាតក្រុមហាម៉ាស នៅភាគខាងជើងហ្កាហ្សា កងទ័ពអ៊ីស្រាអែល នៅថ្ងៃព្រហស្បតិ៍ទី ៨កុម្ភៈ ចាប់ផ្តើមងាកមកបង្កើនការវាយប្រហារទីក្រុងរ៉ាហ្វា ភាគខាងត្បូងហ្កាហ្សា ជាប់ព្រំដែនអេហ្ស៊ីប។
អង្គការសហប្រជាជាតិបានទាញសញ្ញាអាសន្នធំពីគ្រោះមហន្តរាយសម្លាប់ជីវិតមនុស្សដ៏ធ្ងន់ធ្ងរ ព្រោះថា ទីក្រុងរ៉ាហ្វាជាកន្លែងជ្រកចុងក្រោយរបស់ប្រជាជនប៉ាឡេស្ទីនជាង ១លាន ៥សែននាក់ ដែលទៅកកផ្តុំ នៅទីនោះ បន្ទាប់ពីរត់គេចពីការវាយប្រហាររបស់អ៊ីស្រាអែល នៅភាគខាងជើង។
កងទ័ពអ៊ីស្រាអែលបែរទិសប្រតិបត្តិការយោធាសំដៅភាគខាងត្បូងហ្កាហ្សា នៅបន្ទាប់ពី នាយករដ្ឋមន្រ្តីលោកបេនចាមីន នេតាន់យ៉ាហ៊ូ បដិសេធមិនចរចាជាមួយ ក្រុមហាម៉ាស និងបញ្ជាឲ្យកងទ័ពត្រៀមបើកសមរភូមិប្រយុទ្ធនៅខាងត្បូងហ្កាហ្សា ព្រោះថា នៅមិនយូរខែទេ អ៊ីស្រាអែលនឹងទទួលជ័យជំនះទាំងស្រុងនៅហ្កាហ្សា។ នៅក្នុងសេចក្តីថ្លែងតាមកញ្ចក់ទូរទស្សន៍ជាតិ នាយករដ្ឋមន្រ្តីអ៊ីស្រាអែលវាយតម្លៃថា សំណើបទឈប់បាញ់របស់ក្រុមហាម៉ាសចម្លែក។ បើសិនអ៊ីស្រាអែលទទួលយល់ព្រម នោះសោកនាដកម្មសម្លាប់ប្រជាជនអ៊ីស្រាអែល ដូចថ្ងៃទី ៧តុលា នឹងកើតមានសាជាថ្មី នៅទឹកដីអ៊ីស្រាអែល។
ទោះពន្លឺចរចាដើម្បីបទឈប់បាញ់នៅហ្កាហ្សា កាន់តែរួញតូចដោយសារការបដិសេធ ដាច់ណាត់របស់នាយករដ្ឋមន្រ្តីអ៊ីស្រាអែល ប៉ុន្តែ ក្រុមហាម៉ាសនៅតែបញ្ជូនអ្នកតំណាងរបស់ខ្លួនទៅទីក្រុងគែរ ប្រទេសអេហ្ស៊ីប នៅថ្ងៃព្រហស្បតិ៍ នៅក្នុងក្តីសង្ឃឹមជំរុញឲ្យមានបទឈប់បាញ់ នៅហ្កាហ្សា។
ដោយមានការសម្របសម្រួលពីអេហ្ស៊ីប និងកាតា ការចរចាស្តីពីបទឈប់បាញ់ ដើម្បី ឈានទៅដល់ការដោះលែងចំណាប់ខ្មាំង និងបើកផ្លូវផ្តល់ជំនួយមនុស្សធម៌នៅហ្កាហ្សា ក៏ជាប្រធានបទសំខាន់ដែលប្រមុខការបរទេសអាមេរិកលោកអង់តូនី ប្លីងកិនលើកយកទៅជជែកជាមួយនាយករដ្ឋមន្រ្តី និងមន្រ្តីយោធាជាន់ខ្ពស់របស់អ៊ីស្រាអែល នៅក្នុងទស្សនកិច្ចរបស់លោកនៅអ៊ីស្រាអែល។ ប៉ុន្តែ គ្មានចេញជាលទ្ធផលអ្វីទាំងអស់។ នៅថ្ងៃព្រហស្បតិ៍ រដ្ឋមន្រ្តីការបរទេសអាមេរិកបានបិទបញ្ចប់ទស្សនកិច្ចលើកទី៥ នៅដើមបូព៌ា ជាមួយការចាកចេញពីអ៊ីស្រាអែលដោយបាតដៃទទេ។
ដោយមិនអាចបញ្ចុះបញ្ចូលអ៊ីស្រាអែលដែលនៅតែប្តេជ្ញាចិត្តខ្ពស់ ចង់គាស់រំលើងក្រុមហាម៉ាសមិនឲ្យមានមុខនៅហ្កាហ្សាតទៅទៀត លោកប្រមុខការបរទេសអាមេរិកបានត្រឹមអំពាវនាវឲ្យអ៊ីស្រាអែលគិតគូរឲ្យបានខ្ពស់បំផុតអាយុជីវិតរបស់ប្រជាជនស៊ីវិល។ តាមរដ្ឋមន្រ្តីការបរទេសអាមេរិក បើទោះបីជាអ៊ីស្រាអែលរងគ្រោះដោយសារភេរវកម្ម ៧តុលា ប៉ុន្តែ ប្រជាជនប៉ាឡេស្ទីនភាគច្រើនបំផុត ដែលកំពុងរងគ្រោះដោយសារសង្រ្គាមវាយប្រហាររបស់អ៊ីស្រាអែល នៅហ្កាហ្សា គ្មានជាប់ពាក់ព័ន្ធនឹងការវាយប្រហាររបស់ក្រុមហាម៉ាសនៅទឹកដីអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ