អន្តរជាតិបង្កើនសម្ពាធដើម្បីកិច្ចព្រមព្រៀងផ្អាកបាញ់អ៊ីស្រាអែលហាម៉ាស
ក្រោយឮអ៊ីស្រាអែលប្រកាសបើកប្រតិបត្តិការយោធានៅRafah សហគមន៍អន្តរជាតិផ្តើមដោយ អាមេរិក ចិន ... បាននាំគ្នាបញ្ចេញប្រតិកម្មនិងដាក់សម្ពាធកាន់តែខ្លាំងឡើងៗ នៅថ្ងៃអង្គារនេះ ឱ្យមានកិច្ចព្រមព្រៀងឈប់បាញ់រវាងអ៊ីស្រាអែលនិងចលនាអ៊ីស្លាមប៉ាឡេស្ទីនហាម៉ាស។ ជាកិច្ចព្រមព្រៀងដែលមានបញ្ជូលការដោះលែងចំណាប់ខ្មាំងថ្មីបន្ថែមទៀតផង។
ចុះផ្សាយនៅថ្ងៃ៖
ស្តាប់ - ០២:៤៤
ចិនបានអំពាវនាវឱ្យអ៊ីស្រាអែលបញ្ឈប់ឱ្យបានលឿនបំផុតប្រតិបត្តិការយោធានៅរ៉ាហ្វា តំបន់ភាគខាងត្បូងរបស់ហ្កាហ្សា និងប្រឹងឱ្យអស់ពីលទ្ធភាពបញ្ជៀសកុំឱ្យមានជនរងគ្រោះស៊ីវិលស្លូតត្រង់ ដើម្បីកុំឱ្យមានមហន្តរាយមនុស្សធម៌អាក្រក់ធ្ងន់ធ្ងរជាងនេះ។ នៅក្នុងសេចក្តីថ្លែងការណ៍ ក្រសួងការបរទេសបានគូសបញ្ជាក់ថា ចិនតាមដានស្ថានភាពនៅរ៉ាហ្វា ចិនប្រឆាំងនិងថ្កោលទោសរាល់គ្រប់សកម្មភាពដែលប៉ះពាល់ជីវិតជនស៊ីវិល និងរំលោភច្បាប់អន្តរជាតិ។
ចំណែកខាងសហរដ្ឋអាមេរិកសម្ព័ន្ធមិត្តដ៏ចំបងរបស់អ៊ីស្រាអែល ក៏ប្រឆាំងនឹងប្រតិបត្តិការយោធាទ្រង់ទ្រាយធំដោយគ្មានដំណោះស្រាយសម្រាប់ជនស៊ីវិលដែរ។ នាឱកាសទទួលជួបព្រះមហាក្សត្រហ្សកដានីអាប់ដាឡះពីរ លោកប្រធានាធិបតីចូបៃដិន បានស្នើសុំឱ្យយោធាអ៊ីស្រាអែល បង្ហាញផែនការគួរទីទុកចិត្តដែលមិនប៉ះពាល់ដល់ជីវិតជនស៊ីវិលងាយរងគ្រោះ។ នាយកទីភ្នាក់ងារចារកិច្ចអាមេរិក ត្រូវអញ្ជើញទៅដល់ក្រុងគែរនៅថ្ងៃអង្គារទី១៣កុម្ភៈនេះ ដើម្បីបើកកិច្ចចរចាថ្មីស្តីពីការដោះលែងចំណាប់ខ្មាំងក្នុងដៃហាម៉ាសនៅតំបន់ហ្កាហ្សា ដោយមានកាតាជាអន្តរការី។ អាមេរិកកំពុងផ្តោតការចរចាលើកិច្ចព្រមព្រៀងដោះដូរចំណាប់ខ្មាំងជាថ្នូរនឹងការឈប់បាញ់ផ្តល់ភាពស្ងប់ស្ងាត់ភាពនិងសម្រាប់រយៈពេលយ៉ាងហោច៦សប្តាហ៍នៅហ្កាហ្សា។
អង្គការសហប្រជាជាតិមិនចូលរួមចំណែកក្នុងការជម្លៀសដោយបង្ខំប្រជាពលរដ្ឋនៅរ៉ាហ្វាទេ។ នេះជាការព្រមានរបស់អគ្គលេខាធិការអង្គកាសហប្រជាជាតិ តាមរយៈអ្នកនាំពាក្យ។ ប្រធានាធិបតីតួកគី លោកអ៊ែរដូហ្កាន អ្នករិះគន់ប្រឆាំងនឹងអ៊ីស្រាអែលដ៏ខ្លាំងមួយតាំងពីដើមមក ក៏សកម្មដែរ។ លោកត្រូវទៅដល់ក្រុងឌូបៃនៅថ្ងៃអង្គារនេះ និងក្រុងគែរនៅថ្ងៃពុធ។
ប្រឈមនឹងក្តីព្រួយបារម្ភ និងសម្ពាធរបស់អន្តរជាតិ លោកនាយករដ្ឋមន្ត្រីអ៊ីស្រាអែលបានបានអះអាងកាលពីថ្ងៃអាទិត្យថាអ៊ីស្រាអែលនឹងបើកច្រកសុវត្ថិភាពមួយឱ្យពលរដ្ឋស៊ីវិលចាកចេញពីរ៉ាហ្វា តែមិនបានបញ្ជាក់ថាចេញទៅទីណាឡើយ។ នៅថ្ងៃចន្ទម្សិលមិញ ក្រោយប្រកាសរំដោះចំណាប់ខ្មាំងពីតំបន់ហ្កាហ្សាបានពីរនាក់ លោកនេតាន់យ៉ាហ៊ូ បានបញ្ជាក់ជាថ្មីអំពីជំហរដាច់ខាត ការប្រើកម្លាំងយោធារហូតយកឈ្នះលើពួកហាម៉ាសទាំងស្រុង ពោលគឺបន្តធ្វើប្រតិបត្តិយោធានៅរ៉ាហ្វាដែលជាជម្រកចុងក្រោយរបស់ហាម៉ាស ដើម្បីរំដោះចំណាប់ខ្មាំង។ បើតាមអ៊ីស្រាអែល នៅមានចំណាប់ខ្មាំងនៅតំបន់ហ្កាហ្សាចំនួន១៣០នាក់ទៀត ក្នុងនោះ ២៩នាក់បានស្លាប់។ ក្នុងចំណោមចំណាប់ខ្មាំង២៥០នាក់ចាប់ខ្លួនបានកាលពីថ្ងៃ៧តុលា ១០៥នាក់បានទទួលសេរីភាពជាថ្នូរនឹងការដោះលែងអ្នកទោសប៉ាឡេស្ទីន ក្នុងអំឡុងឈប់បាញ់មួយសប្តាហ៍កាលពីខែវិច្ឆិកា២០២៣៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ