តុលាការយុត្តិធម៌អន្តរជាតិបញ្ជាឲ្យអាមេរិកដកទណ្ឌកម្មចេញពីអ៊ីរ៉ង់
តុលាការយុត្តិធម៌អន្តរជាតិ ដែលមានទីស្នាក់ការនៅទីក្រុងឡាអេ បានចេញសេចក្តីសម្រេច នៅថ្ងៃពុធនេះ បញ្ជាឲ្យសហរដ្ឋអាមេរិកដកចេញវិញនូវទណ្ឌកម្ម ដែលដាក់លើអ៊ីរ៉ង់ ជុំវិញសំណុំរឿងនុយក្លេអ៊ែរ។ ទណ្ឌកម្មដែលតុលាការតម្រូវឲ្យអាមេរិកដកចេញវិញនេះ គឺទាក់ទងទៅនឹងការហាមឃាត់ការនាំចូលមុខទំនិញដែលប្រើប្រាស់ក្នុងគោលដៅមនុស្សធម៌។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីសម្រេចរបស់តុលាការក្រុងឡាអេ នៅថ្ងៃពុធនេះ ត្រូវបានធ្វើឡើង ទៅតាមបណ្តឹងរបស់អ៊ីរ៉ង់ដែលតវ៉ាប្រឆាំងនឹងទណ្ឌកម្ម ដែលរដ្ឋការរបស់លោកដូណាលត្រាំសម្រេចដាក់លើអ៊ីរ៉ង់ ក្រោយពីបានដកខ្លួនចេញពីកិច្ចព្រមព្រៀងនុយក្លេអ៊ែរ។ យោងតាមរដ្ឋាភិបាលក្រុងតេហេរ៉ង់ ទណ្ឌកម្មរបស់អាមេរិកបង្កនូវផលប៉ះពាល់យ៉ាងធ្ងន់ធ្ងរចំពោះសេដ្ឋកិច្ចអ៊ីរ៉ង់ ហើយក៏ជាការរំលោភបំពានទៅលើកិច្ចព្រមព្រៀងជាច្រើនផងដែរ។
ចៅក្រមតុលាការយុត្តិធម៌អន្តរជាតិ បានចេញសេចក្តីសម្រេច ដោយសំឡេងឯកចន្ឆន្ទ កំណត់ថា ទណ្ឌកម្មរបស់អាមេរិកទៅលើអ៊ីរ៉ង់ គឺពិតជារំលោភបំពានមែន ទៅលើសន្ធិសញ្ញាមិត្តភាពអ៊ីរ៉ង់-អាមេរិក ដែលចុះកាលពីឆ្នាំ១៩៥៥ ពោលគឺ តាំងពីមិនទាន់មានបដិវត្តន៍នៅអ៊ីរ៉ង់។
ដូច្នេះហើយបានជាតុលាការបានកំណត់ថា សហរដ្ឋអាមេរិកត្រូវតែដកចេញវិញទាំងអស់ នូវរាល់ទណ្ឌកម្មទាំងឡាយណា ដែលដាក់ចាប់តាំងពីថ្ងៃទី៨ ខែឧសភា ឆ្នាំ២០១៨មក ហើយដែលបង្កនូវផលប៉ះពាល់ទៅដល់ការនាំចេញនាំចូលមុខទំនិញមួយចំនួន រួមមានដូចជា ថ្នាំពេទ្យ បរិក្ខាពេទ្យ ចំណីអាហារ ផលិតផលកសិកម្ម ព្រមទាំងផលិតផលផ្សេងទៀត ដែលចាំបាច់នៅក្នុងការធានាសន្តិសុខខាងអាកាសចរណ៍ស៊ីវិល។
គួរបញ្ជាក់ថា សេចក្តីសម្រេចរបស់តុលាការយុត្តិធម៌អន្តរជាតិ គឺជាសេចក្តីសម្រេចស្ថាពរបិទផ្លូវតវ៉ា ហើយមានអានុភាពតាមផ្លូវច្បាប់បង្ខំឲ្យប្រទេសជាភាគីជម្លោះត្រូវតែអនុវត្តតាម។ ក៏ប៉ុន្តែ នៅក្នុងការអនុវត្តជាក់ស្តែង ប្រសិនបើប្រទេសណាមួយមិនអនុវត្តតាម ក៏តុលាការមិនមានកម្លាំងប៉ូលិស ដែលអាចទៅចាប់បង្ខំឲ្យអនុវត្តនោះដែរ។
កាលពីពេលកន្លងទៅ គេសង្កេតឃើញថា ទាំងសហរដ្ឋអាមេរិក និងទាំងអ៊ីរ៉ង់ សុទ្ធតែធ្លាប់មិនអនុវត្តសេចក្តីសម្រេច ដែលចេញដោយតុលាការយុត្តិធម៌អន្តរជាតិ។ នៅក្នុងសំណុំរឿងក្តីក្តាំជាមួយអ៊ីរ៉ង់ពេលនេះទៀត អាមេរិកធ្លាប់បានប្រកាសជាច្រើនលើករួចមកហើយថា ខ្លួនមិនទទួលស្គាល់សមត្ថកិច្ចតុលាការក្រុងឡាអេ នៅក្នុងការជំនុំជម្រះបណ្តឹងរបស់អ៊ីរ៉ង់នេះទេ។
ទោះជាយ៉ាងណា តាមផ្លូវនយោបាយ និងការទូត សេចក្តីសម្រេចរបស់តុលាការក្រុងឡាអេនៅថ្ងៃពុធនេះ អាចនឹងធ្វើឲ្យលោកដូណាល់ត្រាំកាន់តែត្រូវឯកោខ្លាំងឡើងថែមទៀត នៅក្នុងសំណុំរឿងនុយក្លេអ៊ែរអ៊ីរ៉ង់ ក្នុងពេលដែលបណ្តាប្រទេសជាច្រើន ក្នុងនោះ រួមមានទាំងប្រទេសជាសម្ព័ន្ធមិត្តរបស់អាមេរិកផង និងស្ថាប័នអន្តរជាតិដ៏ល្បីល្បាញ ដូចជាទីភ្នាក់ងារថាមពលនុយក្លេអ៊ែរអន្តរជាតិផង សុទ្ធតែបានបង្ហាញនូវជំហរជំទាស់នឹងការដកខ្លួនរបស់អាមេរិកចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ដែលចុះកាលពីឆ្នាំ២០១៥ ក្នុងអាណត្តិរបស់លោកអូបាម៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ