ប្រេស៊ីល៖កៅអីប្រធានាធិបតីរបស់លោកស្រីឌីលម៉ា រូសសេហ្វចាប់ផ្តើមរង្គើ
នៅក្នុងប្រទេសប្រេស៊ីល លោកស្រីប្រធានាធិបតីឌីលម៉ា រូសសេហ្វកំពុងប្រឈមនឹងការទម្លាក់ពីតំណែង។ នៅថ្ងៃចន្ទ ទី១១ មេសា គណៈកម្មការសភាបានអនុម័តនូវសេចក្តីសម្រេចចិត្តមួយដោយអនុញ្ញាតឲ្យសភាផ្តើមនីតិវិធីបោះឆ្នោតទម្លាក់លោកស្រីឌីលម៉ា រូសសេហ្វ។ សូមជម្រាបជូនថា មានអាយុ ៦៨ឆ្នាំ ប្រជាប្រិយភាពរបស់លោកស្រីឌីលម៉ា រូសសេហ្វកំពុងធ្លាក់ចុះខ្លាំង ព្រោះលោកស្រីកំពុងជាប់ចោទពីបទពាក់ព័ន្ធនឹងរឿងអាស្រូវពុករលួយ និងពីបទគ្មានតម្លាភាពក្នុងរឿងថវិកាជាតិសម្រាប់ឆ្នាំ ២០១៤ ដែលជាឆ្នាំដែលលោកស្រីបានជាប់ឆ្នោតអណត្តិថ្មី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣០
គណៈកម្មការសភាពិសេសមានសមាជិកជាតំណាងរាស្រ្តចំនួន ៦៥នាក់ និងដែលត្រូវបានបង្កើតឡើងកាលពីថ្ងៃទី៦ មេសា។ គណៈកម្មការសភាមួយនេះទទួលបន្ទុកសិក្សាលើបទចោទប្រកាន់នានាលើលោកស្រីប្រធានាធិបតីឌីលម៉ា រូសសេហ្វ រួមមាន រឿងអាស្រូវពុករលួយ និងរឿងគ្មានតម្លាភាពស្តីពីថវិកាជាតិក្នុងឆ្នាំ ២០១៤ ដែលជាឆ្នាំជាប់ឆ្នោតអណត្តិថ្មីរបស់លោកស្រីឌីលម៉ា រូសសេហ្វ។
បន្ទាប់ពីបានធ្វើការសិក្សាជជែកតទល់គ្នាយ៉ាងប្រទាញប្រទង់អស់រយៈពេល ១១ម៉ោងក្នុងថ្ងៃចន្ទ ទី១១ មេសា គណកម្មការសភាបានអនុម័តនូវសេចក្តីសម្រេចចិត្តមួយឲ្យសភាបន្តនិតីវិធីបោះឆ្នោតទម្លាក់លោកស្រីឌីលម៉ា រូសសេហ្វពីតំណែង ដោយមានសម្លេងគាំទ្រចំនួន ៣៨ ទល់នឹងសម្លេងប្រឆាំង ២៧។ ការផ្តល់ភ្លើងខៀវឲ្យទម្លាក់លោកស្រីឌីលម៉ា រូសសេហ្វពីអំណាចមកពីគណៈកម្មការសភាយល់ឃើញថា លោកស្រីពិតជាបានប្រព្រឹត្តិបទល្មើសមែន។
សូមបញ្ជាក់ជូនបន្តិចថា សេចក្តីសម្រេចចិត្តរបស់គណៈកម្មការសភាពេលនេះគ្រាន់តែជាអនុសាសន៍ប៉ុណ្ណោះ ពោលមិនមានលក្ខណៈបង្ខិតបង្ខំទេ។ តែគេអាចនិយាយបានថាអនុសាសន៍របស់គណៈកម្មការសភាជាការបោះមួយជំហានទៅមុខឆ្ពោះទៅទម្លាក់លោកស្រីឌីលម៉ា រូសសេហ្វពីតំណែងជាយថាហេតុ។
នីតិវិធីទម្លាក់លោកស្រីឌីលម៉ា រូសសេហ្វនៅវែងឆ្ងាយ និងស្មុគស្មាញ
ផ្លូវដែលត្រូវដើរឆ្ពោះទៅទម្លាក់លោកស្រីឌីលម៉ា រូសសេហ្វនៅវែងឆ្ងាយ និងស្មុគស្មាញ ហើយក៏មិនច្បាស់នឹងអាចបញ្ចប់តំណែងលោកស្រីឌីលម៉ា រូសសេហ្វបានដែរ។ អនុសាសន៍របស់គណៈកម្មការសភានឹងត្រូវបញ្ជូនទៅកាន់សភាចាប់ពីថ្ងៃសុក្រ ទី១៥ មេសាខាងមុខ ហើយការបោះឆ្នោតអាចនឹងចាប់ផ្តើមនៅថ្ងៃអាទិត្យ ឬមួយនៅថ្ងៃចន្ទ ទី១៨ មេសាដើមសប្តាហ៍ក្រោយ។ ដើម្បីអាចឲ្យនីតិវិធីទម្លាក់លោកស្រីឌីលម៉ា រូសសេហ្វបន្តទៅមុខបាន លុះត្រាណាតែមានសម្លេងគាំទ្រចំនួន ២ភាគ៣នៅក្នុងសភា ពោលសម្លេងគាំទ្រ ៣៤២សម្លេងក្នុងចំនួនសម្លេងសរុប ៥១៣ ដែលមាននៅក្នុងសភាប្រេស៊ីល។
បើការបោះឆ្នោតនៅសភានាថ្ងៃខាងមុខមិនទទួលបានសម្លេងគាំទ្រ ២ភាគ៣ទេ នោះនិតីវិធីទម្លាក់លោកស្រីឌីលម៉ា រូសសេហ្វនឹងត្រូវកប់ចោលត្រឹមនេះ។ ផ្ទុយទៅវិញ បើមានសម្លេងគាំទ្រ ២ភាគ៣នៅសភា នោះនិតិវិធីទម្លាក់លោកស្រីឌីលម៉ា រូសសេហ្វនឹងបន្តដំណើរទៅកាន់ព្រឹទ្ធសភាទៀត។ ចំណែកនីតិវិធីនៅព្រឹទ្ធសភាត្រូវបានចែកចេញជាពីរដំណាក់កាល ទី១ គឺការបោះឆ្នោតដោយយកសម្លេង ៥០បូក ១ និងដំណាក់កាលទី២ គឺការបោះឆ្នោតដោយត្រូវការសម្លេងគាំទ្រចំនួន ២ភាគ៣។
បើមានសម្លេងគាំទ្រ ៥០បូក១ នៅព្រឹទ្ធសភាក្នុងដំណាក់កាលទី១ នោះលោកស្រីឌីលម៉ា រូសសេហ្វនឹងត្រូវគេព្យួរតំណែងរយៈពេលច្រើនបំផុតចំនួន ១៨០ថ្ងៃ ដោយរង់ចាំការបោះឆ្នោតរបស់ព្រឹទ្ធសភាក្នុងដំណាក់កាលទី២ ដែលត្រូវការសម្លេងគាំទ្រចំនួន ២ភាគ៣។ ក្នុងករណីមានសម្លេងគាំទ្រ ២ភាគ៣នៅព្រឹទ្ធសភាក្នុងដំណាក់កាលទី២ លោកស្រីឌីលម៉ា រូសសេហ្វនឹងត្រូវខ្ទាតចេញពីកៅអីប្រធានាធិបតីជាសា្ថពរ ហើយអ្នកដែលឡើងមកជំនួសកន្លែងលោកស្រី គឺលោក Michel Temer ចេញពីគណបក្សពលករដូចគ្នា និងដែលកំពុងកាន់តំណែងអនុប្រធានាធិបតី។
ឃើញថា នីតិវិធីនៃការទម្លាក់លោកស្រីឌីលម៉ា រូសសេហ្វពិតជាស្មុគស្មាញ និងមានឧបសគ្គជាច្រើន។ ម្យ៉ាងទៀត និតីវិធីទម្លាក់លោកស្រីឌីលម៉ា រូសសេហ្វអាចនឹងចប់នៅត្រឹមការបោះឆ្នោតក្នុងសភាផងក៏មិនដឹង ព្រោះគណបក្សពលកររបស់លោកស្រីមានសម្លេងភាគច្រើននៅក្នុងសភា។
រឿងអាស្រូវពុករលួយដែលលោកស្រីឌីលម៉ា រូសសេហ្វមិនអាចធ្វើមិនដឹង មិនឮបានទេ
រឿងរ៉ាវដែលឈានដល់ការទាមទារឲ្យទម្លាក់លោកស្រីឌីលម៉ា រូសសេហ្វពីអំណាច គឺជាប់ពាក់ព័ន្ធនឹងរឿងអាស្រូវនៅក្នុងក្រុមហ៊ុនប្រេងឥន្ធនៈឈ្មោះ ប៉េត្រូប្រា (Petrobras) ដែលគ្រប់គ្រងដោយរដ្ឋ។ ជាទូទៅ រឿងអាស្រូវពុករលួយមួយនេះត្រូវបានគេមើលឃើញថា មានលក្ខណៈនយោបាយច្រើន និងស្មុគស្មាញ ព្រោះវាបានជំពាក់វាក់វិននឹងគណបក្សនយោបាយ ក៏ដូចជាឥស្សរជននយោបាយជាច្រើនរូប។ រឿងអាស្រូវមួយនេះបានបែកធ្លាយក្នុងខែមីនា ឆ្នំា ២០០៤ និងមានជាប់ពាក់ព័ន្ធរវាងក្រុមហ៊ុនប៉េត្រូប្រា និងក្រុមហ៊ុនសំណង់សាធារណៈ BTP ដែលបានសហការណ៍គ្នាដើម្បីទទួលគម្រោងសាងសង់សំខាន់ៗរបស់រដ្ឋ។
ដើម្បីអាចទទួលបានចំណែកទីផ្សារពីក្រុមហ៊ុនប៉េត្រូប្រាដែលជាក្រុមហ៊ុនរបស់រដ្ឋ ក្រុមហ៊ុនសំណង់សាធារណៈ BTP បានសូកលុយទៅឲ្យគណបក្សនយោបាយក្នុងរដ្ឋាភិបាលចម្រុះកណ្តាល ឆ្វេងនិយមដែលបានកាន់អំណាចតំាងពីការឡើងកាន់តំណែងប្រធានាធិបតីរបស់លោកលូឡាពីឆ្នំា ២០០៣ ដល់ឆ្នំា ២០១០។ លុយសូបប៉ាន់ទំាងនោះត្រូវគេសង្ស័យថា គណបក្សយកទៅចាយក្នុងយុទ្ធនាការបោះឆ្នោត និងក៏ប្រហែលជាបានធ្លាក់ចូលក្នុងហោបៅថ្នាក់ដឹកនំាក្រុមហ៊ុន ឬមួយក៏ឥស្សរជននយោបាយខ្លះផង។
តាមពិតទៅ ឈ្មោះលោកស្រីឌីម៉ា រូសសេហ្វមិនមាននៅក្នុងបញ្ជីឈ្មោះជាជនសង្ស័យនៅក្នុងរឿងពុករលួយនេះទេ។ មួយវិញទៀត នៅពេលផ្ទុះរឿងនេះក្នុងខែមីនា ឆ្នំា ២០០៤ លោកស្រីឌីលម៉ា រូសសេហ្វក៏មិនទាន់កាន់តំណែងប្រធានាធិបតីដែរ។ តែបញ្ហានៅត្រង់ថាពេលនោះ លោកស្រីមានតំណែងជារដ្ឋមន្រ្តីក្រសួងថាមពលក្នុងជំនាន់លោកលូឡា។ សម្រាប់ពលរដ្ឋប្រេស៊ីលទូទៅ លោកស្រីឌីលម៉ា រូសសេហ្វមិនអាចនិយាយថា មិនដឹងអ្វីទំាងអស់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ