ប្រេស៊ីល៖ផ្ទុះបាតុកម្មថ្មី ក្រោយការតែងតាំងលោកលូឡានៅក្នុងរដ្ឋាភិបាល
នៅក្នុងប្រទេសប្រេស៊ីល ចលនាសង្គមកំពុងផ្ទុះឡើងនៅថ្ងៃព្រហស្បតិ៍ ទី១៧ មីនានេះ ក្រោយពីលោកស្រីប្រធានាធិបតីឌីលម៉ា រូសែហ្វបានសម្រេចតែងតាំងលោកអតីតប្រធានាធិបតីលូឡាឲ្យធ្វើជារដ្ឋមន្រ្តីទីស្តីការគណៈរដ្ឋមន្រ្តីដែលមានឋានៈស្មើនឹងនាយករដ្ឋមន្រ្តីនៅក្នុងប្រទេសប្រេស៊ីល។ ការទាញលោកលូឡាឲ្យចូលក្នុងរដ្ឋាភិបាលពេលនេះបានធ្វើឡើង ចំពេលដែលលោកអតីតប្រធានាធិបតីរូបនេះកំពុងជាប់ក្នុងរឿងអាស្រូវពុករលួយ។
ចុះផ្សាយនៅថ្ងៃ៖
ស្តាប់ - ០២:២៨
ប្រេស៊ីលបានផុងខ្លួនក្នុងវិបត្តិកាន់តែជ្រៅថែមទៀតនៅថ្ងៃនេះជាមួយនឹងការតែងតាំងលោកអតីតប្រធានាធិបតីលូឡាជារដ្ឋមន្រ្តីទីស្តីការគណៈរដ្ឋមន្រ្តីនៅក្នុងរដ្ឋាភិបាលរបស់លោកស្រីប្រធានាធិបតីឌីលម៉ា រូសែហ្វ។ តាំងពីយប់មិញមកដល់ថ្ងៃនេះ មានផ្ទុះឡើងនូវបាតុកម្មនៅតាមទីក្រុងសំខាន់ដើម្បីប្រឆាំងនឹងការដែលលោកស្រីបានទាញយកលោកលូឡាចូលក្នុងរដ្ឋាភិបាល។ ក្រៅពីការប្រឆាំងរបស់មហាជនទូទៅ ការតែងតាំងនេះក៏មានការជំទាស់ខ្លាំងពីក្រុមប្រឆាំងនៅក្នុងរដ្ឋសភាដែរ។
ក្រុមអ្នកតំណាងរាស្រ្តរបស់បក្សប្រឆាំងបានសម្រេចដាក់ញត្តិប្តឹងទៅតុលាការដើម្បីរារាំងកុំឲ្យលោកលូឡាអាចចូលកាន់តំណែងថ្មីនេះបាន។ សម្រាប់ក្រុមប្រឆាំង ទង្វើរបស់លោកស្រីឌីលម៉ា រូសែហ្វជាទង្វើនយោបាយមួយក្នុងគោលដៅជួយស្រោចស្រង់លោកលូឡាឲ្យរួចផុតពីកណ្តាប់ដៃតុលាការក្នុងរឿងអាស្រូវពុករលួយ។ កាលពីថ្ងៃទី១១ មីនាកន្លងទៅ រដ្ឋអាជ្ញារអមតុលាការក្រុងសាវប៉ូឡូថែមទាំងបានស្នើឲ្យចាប់ខ្លួនលោក លូឡា ដាក់ឃុំបណ្តោះអាសន្នដើម្បីការពារកុំឲ្យលោកគេចខ្លួន។
គួរជម្រាបជូនថា កាន់តំណែងប្រធានាធិបតីពីឆ្នាំ ២០០៣ ដល់ឆ្នាំ ២០១០ លោកលូឡាត្រូវបានតុលាការចោទប្រកាន់ពីបទទទួលសំណូកជាគេហដ្ឋានមាត់សមុទ្រផ្តល់ឲ្យដោយក្រុមហ៊ុនសំណង់សាធារណៈ BTP ដែលជាដៃគូជាមួយក្រុមហ៊ុនរុករក និងផលិតប្រេងប្រេស៊ីលឈ្មោះ Petrobras។ កន្លងមក រឿងអាស្រូវស៊ីសំណូកសូកប៉ាន់មួយនេះបានអូសទាញប្រធានក្រុមហ៊ុនទាំងពីរ ព្រមទាំងអ្នកនយោបាយជាច្រើនឲ្យឡើងឆ្លើយបំភ្លឺនៅមុខតុលាការ។
អ្វីដែលធ្វើឲ្យពលរដ្ឋប្រេស៊ីលក្តៅក្រហាយកាន់តែខ្លាំងពេលនេះ គឺកិច្ចសន្ទនាតាមទូរស័ព្ទរវាងលោកស្រីឌីលម៉ា រូសែហ្វ និងលោកលូឡាដែលចៅក្រមស៊ែហ្សូ ម៉ូរ៉ូបានផ្សព្វផ្សាយជាសាធារណៈនៅថ្ងៃពុធ ទី១៦ មីនា។ នៅក្នុងកិច្ចសន្ទនានោះ លោកស្រីបាននិយាយប្រាប់លោកលូឡាពីក្រឹត្យដែលលោកស្រីបានតែងតាំងលោកលូឡានៅក្នុងរដ្ឋាភិបាល។
សំណួរដែលចោទពេលនេះគឺថា តើតំណែងថ្មីនេះនឹងអាចជួយលោកលូឡាឲ្យរួចពីកណ្តាប់ដៃតុលាការបានរយៈពេលប៉ុន្មាន និងថា តើទង្វើរបស់លោកស្រីឌីលម៉ា រូសែហ្វពេលនេះ មិនមែនជាទង្វើដែលនឹងធ្វើឲ្យលោកស្រីខ្លួនឯងរងការប្រឆាំងកាន់តែខ្លាំងទេ ឬយ៉ាងណា?។ ចូរកុំភ្លេចថានៅចុងសប្តាហ៍កន្លងទៅ មានបាតុកររាប់លាននាក់បានចុះផ្លូវធ្វើបាតុកម្មឲ្យលោកស្រីឌីលម៉ា រូសែហ្វចុះចេញពីតំណែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ