ប្រេស៊ីលរឹតបន្តឹងសន្តិសុខមុនពេលបោះឆ្នោតជ្រើសរើសប្រធានាធិបតីជុំទីពីរ
ការបោះឆ្នោតជ្រើសរើសប្រធានាធិបតី ជុំទីពីរនៅប្រទេសប្រេស៊ីល នឹងធ្វើឡើងនៅថ្ងៃអាទិត្យទី២៦ តុលានេះ។ ចាប់តាំងពីថ្ងៃសុក្រម្លេះ អជ្ញាធរប្រេស៊ីល បានរាយកម្លាំង ជាពិសេសតាម តំបន់ហ្វាវេឡា ដែលជាតំបន់សំណង់អាណាធិបតេយ្យ នៅក្រុងរីយ៉ូ ដែលសម្បួរទៅដោយ ក្រុមអ្នកលេង ជើងកាង។ ក្រុមនេះហើយ ដែលធ្លាប់បានបង្កអំពើហិង្សាជាបន្តបន្ទាប់ និងដែលធ្លាប់បានសម្លាប់ប៉ូលីលប្រេស៊ីលទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ចាប់តាំងពីថ្ងៃសុក្រ ទី២៤ តុលា មក អាជ្ញាធរប្រេស៊ីល បានរាយកម្លាំងចំនួន ៣៥០០០ នាក់ នៅតាមតំបន់អាណាធិបតេយ្យហ្វាវេឡា ក្នុងក្រុងរីយ៉ូ ដើម្បីធានាសន្តិសុខ បង្កាកុំឲ្យមានអំពើហិង្សា នៅមុនពេលបោះឆ្នោតជ្រើសរើសប្រធានាធិបតីប្រ៊េស៊ីល ដែលនឹងត្រូវធ្វើឡើងនៅថ្ងៃអាទិត្យនេះ។
ទីក្រុងរីយ៉ូ រដ្ឋធានីប្រទេសប្រេស៊ីល មានតំបន់ ហ្វាវេឡាចំនួន ២៥៣ កន្លែង។ តំបន់ហ្វាវេឡានេះ គឺជាសង្កាត់សំបូរទៅដោយសំណង់អាណាធិបតេយ្យ ធ្វើនៅបញ្ច្រៀតគ្នាតាមជម្រាលភ្នំ។ តំបន់ទាំងនោះ ជាជំរកប្រជាជនប្រ៊េស៊ីលក្រីក្រ និងជាពិសេស សំបូរទៅដោយ ក្រុមជើងកាង ដែលមានគ្នាច្រើនសន្ធឹកសន្ធាប់។ ក្រុមទាំងនេះ បានបង្កអំពើហិង្សាជាញឹកញាប់។ ជាក់ស្តែង តំបន់ហ្វាវេឡា មួយឈ្មោះ Complexo da Maré បានធ្លាក់ទៅក្នុងការគ្រប់គ្រងរបស់ពួកជើងកាង អស់ជាច្រើនឆ្នាំមកហើយ។ មិនដែលមាននគរបាលប្រេស៊ីលណា ហ៊ានទៅធ្វើអន្តរាគមន៍នៅម្តុំនោះទេ។ ទើបតែពេលថ្មីៗនេះប៉ុណ្ណោះ ដែល អាជ្ញាធរប្រេស៊ីល បានដណ្តើមកាន់កាប់មកវិញ។ ប៉ុន្តែ កាលពីថ្ងៃទី ១៧ តុលា ពួកជើងកាង បានវាយប្រហារទីស្នាក់ការនគរបាល ប្រចាំការនៅតំបន់នោះ ហើយបានសម្លាប់នគរបាលម្នាក់ និងរបួសជាច្រើននាក់។ ក្រុមអ្នកលេង តែងតែបាញ់តបតជាញឹកញាប់ ជាមួយកម្លាំងសមត្ថកិច្ចប្រ៊េស៊ីល។
សូមបញ្ជាក់ថា ប្រជាជនប្រ៊េស៊ីលចំនួន១៤២លាននាក់ នឹងត្រូវទៅចូលរួមបោះឆ្នោតជ្រើសរើសប្រធានាធិបតី នៅថ្ងៃអាទិត្យនេះ។ រួមជាមួយគ្នានេះ ប្រជាជនប្រេស៊ីល ក៏ត្រូវជ្រើសរើសអភិបាលរដ្ឋចំនួន ១៤ ក្នុងចំណោមរដ្ឋទាំង២៧ របស់ប្រេស៊ីស ផងដែរ។ តាមការរាយការណ៍ មាននគរបាល ទាហានចំនួន ជាង២០ម៉ឺននាក់ ដែលនឹងត្រូវដាក់រាយទូទាំងប្រទេស ដើម្បីយាមការពារ ធានាសន្តិសុខនៅតាមការិយាល័យបោះឆ្នោត។ បេក្ខជនឈរឈ្មោះ ប្រធានាធិបតីមានពីរនាក់ គឺលោកស្រី Dilma Rousseff និងលោក Aecio Neves៕ គ្រប់គ្នាពេលនេះ កំពុងអ៊ុតមើលលទ្ធផលនៃការបោះឆ្នោតនេះ ព្រោះថាបើតាមការស្ទាបស្ទង់មតិ លោកស្រី Dilma Rousseff អាចនឹងមានប្រៀប លើគូប្រកួតរបស់គាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ