រដ្ឋាភិបាលថ្មីប៊ែលហ្ស៊ិកស្បថចូលកាន់តំណែង ក្រោមពាក្យរិះគន់
ជាង៤ខែបន្ទាប់ពីមានការចរចារគ្នា រវាងគណៈបក្សសំខាន់ៗនៅប្រទេសប៊ែលហ្ស៊ិក ទីបំផុត សមាសភាពរដ្ឋាភិបាលថ្មីមួយ បានស្បថចូលកាន់តំណែង នៅព្រឹកថ្ងៃសៅរ៍ ទី១១ តុលា។ រដ្ឋាភិបាលប៊ែលហ្ស៊ិកថ្មីនេះ មានលោក Charles Michel ជានាយករដ្ឋមន្រី្ត មកពីគណៈបក្សនិយមភាសាបារាំង។ ទោះជាយ៉ាងណា មានមតិរិះគន់ជាច្រើនថា រដ្ឋាភិបាលនេះ គ្រាន់តែជាអាយ៉ងរបស់ពួកគណៈបក្ស និយមភាសាហូឡង់តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ប្រទេសប៊ែលហ្ស៊ិកចែកជាពីរតំបន់ធំៗ ដាច់ពីគ្នា។ តំបន់ភាគខាងជើង គឺជាតំបន់ដែលនៅជាប់ប្រទេសហូឡង់ ហើយប្រជាជននៅតំបន់នោះ និយាយភាសាហូឡង់ និងមានទំនៀមទំលាប់ រស់នៅដូចជនជាតិហូឡង់។ ចំណែកនៅភាគខាងត្បូងវិញ ជាតំបន់ដែលនៅជាប់ប្រទេសបារាំង ដែលមានប្រជាជនភាគច្រើន និយាយភាសាបារាំង។ កន្លងមក ការប្រទាញប្រទង់គ្នា កាន់កាប់អំណាចកណ្តាលរបស់រដ្ឋ រវាងតំបន់ទាំងពីរ តែងតែជាបញ្ហាចោទ ក្នុងការបង្កើតរដ្ឋាភិបាលប៊ែលហ្ស៊ិក។
ខុសគ្នាពីការបង្កើតរដ្ឋាភិបាលអាណត្តិមុន ដែលបានចំណាយពេលចរចារគ្នា អស់រយៈពេលមួយឆ្នាំកន្លះ អាណត្តិនេះ រដ្ឋាភិបាលថ្មីប៊ែលហ្ស៊ិក បានប្រសូត្ររូបរាង្គឡើង មិនដល់ពេល៥ខែផង។ ក្នុងសមាសភាពរដ្ឋាភិបាលថ្មីនេះ គឺមានលោក Charles Michel ជានាយករដ្ឋមន្រ្តី។ លោក Charles Michel ទើបតែមានវ័យ៣៨ឆ្នាំប៉ុណ្ណោះ បានក្លាយជានាយករដ្ឋមន្ត្រីប៊ែលហ្ស៊ីក វ័យក្មេងជាងគេក្នុងប្រវត្តិសាស្រ្ត។ គាត់ជាសមាជិកមកពីគណៈបក្ស ចលនាកំណែរទំរង់ Mouvement réformateur MR ដែលជាគណៈបក្សមាននិន្នាការស្តាំនិយម មកពីតំបន់និយាយភាសាបារាំង។
នៅក្នុងរដ្ឋាភិបាលថ្មីនេះ មានគណៈបក្សបួនចូលរួម ហើយគណៈបក្សនិមួយ បានទទួលកៅអីឧបនាយករដ្ឋមន្ត្រីម្នាក់មួយ។ មានពាក្យរិះគន់ពីគ្រប់មជ្ឈដ្ឋានថា រដ្ឋាភិបាលថ្មីនេះ មានភាពលម្អៀង ព្រោះថាក្នុងចំណោមគណៈបក្សទាំងបួនក្នុងរដ្ឋាភិបាល មានគណៈបក្សតែមួយគត់ដែលមកពីតំបន់និយាយភាសាបារាំង គឺគណៈបក្សរបស់លោកនាយករដ្ឋមន្ត្រីនេះឯង ឯគណៈបក្សទាំងបីទៀត សុទ្ធសឹងតែមកពីតំបន់និយាយភាសាហូឡង់។
មួយវិញទៀត ក្រសួងសំខាន់ៗទាំងអស់ ដែលជាប្រភពចំណូលរដ្ឋ និងដែលមានកញ្ចប់ថវិកាធំៗ ដូចជាក្រសួងហិរញ្ញវត្ថុ ក្រសួងមហាផ្ទៃ ក្រសួងការពារជាតិ ក្រសួងអន្តោប្រវេសន៍ ជាដើម ត្រូវធ្លាក់ទៅក្នុងដៃរបស់គណៈបក្សមកពីតំបន់និយាយភាសាហូឡង់ទាំងបី។ ផ្ទុយទៅវិញ ក្រសួងមួយចំនួន ដែលត្រូវការ ការធ្វើកំណែរទំរង់យ៉ាងស្មុកស្មាញ ដូចជាក្រសួងសាធារណៈការដឹកជញ្ជូន និងក្រសួងថាមពលជាដើម ត្រូវតំរូវឲ្យគណៈបក្សនិយមភាសាបារាំងជាអ្នកធ្វើការ។
ទាំងនេះហើយដែលជាមូលហេតុ នាំឲ្យមានពាក្យរិះគន់ ព្រោះថា លុយគឺខាងពួកនិយាយភាសាហូឡង់ជាអ្នកកាន់ ឯការងារលំបាកៗ គឺពួកនិយាយភាសាបារំាងជាអ្នកធ្វើ។ សរុបទៅ តើរដ្ឋាភិបាលថ្មីនេះ ធ្វើការដើម្បីផលប្រយោជន៍រួមរបស់ប៊ែលហ្ស៊ិកទាំងមូល រឺក៏សំរាប់តែតំបន់និយាយភាសាហូឡង់?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ