ប្រទេសបែលហ្ស៊ិកមានព្រះមហាក្សត្រថ្មីគ្រងរាជ្យ
នៅថ្ងៃអាទិត្យនេះ ប្រទេសបែលហ្ស៊ិកបានបើកទំព័រប្រវត្តិសាស្ត្រថ្មីរបស់ខ្លួន តាមរយៈការឡើងគ្រងរាជ្យរបស់ព្រះមហាក្សត្រថ្មី គឺព្រះអង្គ ហ្វីលីព ដែលត្រូវជាព្រះរាជបុត្រារបស់ព្រះមហាក្សត្រចាស់ អាល់ប៊ែរ ២។ ព្រះមហាក្សត្រហ្វីលីពបានក្លាយជាព្រះមហាក្សត្រគ្រងរាជ្យទី ៧ នៅបែលហ្សិក។ កាលពីថ្ងៃសៅរ៍ម្សិលមិញ ព្រះមហាក្សត្រអាល់ប៊ែរ ២ ដែលបានសោយរាជ្យអស់រយៈពេល២០ឆ្នាំមកហើយនោះ បានអំពាវនាវអោយមានការរួបរួមជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
នៅថ្ងៃអាទិត្យនេះ នៅចំពោះមុខសភាបែលហ្ស៊ិក ក្នុងព្រះជន្ម៥៣ព្រះវស្សា ព្រះមហាក្សត្រថ្មីរបស់ប្រទេសបែលហ្ស៊ិក មានព្រះនាមថា Philippe បានស្បថស្បែដើម្បីឡើងគ្រងរាជ្យបល្ល័ង្ក បន្តពីបិតាទ្រង់។ នៅមុននេះបន្តិច ព្រះមហាក្សត្រចាស់ Albert II ដែលបានសោយរាជ្យអស់រយៈពេល២០ឆ្នាំមកហើយនោះ បានធ្វើលិខិតដាក់រាជ្យបល្ល័ង្កជាផ្លូវការ។
នៅក្នុងពិធីគ្រងរាជ្យនេះ ក្រៅពីវត្តមានរបស់ព្រះញាតិវង្សានុវង្សរបស់ព្រះមហាក្សត្រ គេពុំឃើញមានថ្នាក់ដឹកនាំ រឺព្រះញាតិវង្សានុវង្សប្រទេសណាផ្សេងចូលរួមនោះទេ។ គេឃើញវត្តមានលោក José Manuel Barroso ប្រធានគណកម្មការអឺរ៉ុបតែម្នាក់ប៉ុណ្ណោះ។
គួររំលឹកថា ព្រះមហាក្សត្រថ្មី Philippe តាមធម្មតា អាចនឹងឡើងគ្រងរាជ្យបន្តពីព្រះបិតុលាព្រះអង្គ គឺអតីតព្រះមហាក្សត្រ Beaudoin តាំងពីឆ្នាំ ១៩៩៣ ម្ល៉េះ។ នៅឆ្នាំ ១៩៩៣ អតីព្រះមហាក្សត្រ Beaudoin បានចូលទីវង្គត់។ នៅពេលនោះ គេគិតថាព្រះអង្គ Philippe នៅមិនទាន់ត្រៀមខ្លួនគ្រប់គ្រាន់ដើម្បីគ្រងរាជបល្ល័ង្កនោះទេ។ ដូច្នេះ ព្រះបិតាព្រះអង្គ គឺព្រះអង្គ Albert II បានឡើងបន្តរាជ្យពីពេលនោះមក។
ថ្វីដ្បិតថា២០ឆ្នាំ កន្លងផុតទៅហើយក្តី ប្រជាជនបែលហ្ស៊ិកនៅមានការមន្ទិលសង្ស័យចំពោះសមត្ថភាពរបស់ព្រះអង្គហ្វីលីពនៅឡើយ ពិសេសនៅពេលដែលបែលហ្ស៊ិកជិតបោះឆ្នោតឆ្នាំ២០១៤ ខាងមុខនេះ។ ព្រះអង្គហ្វីលីពនៅមានបន្ទួលមិនសូវសមស្រប ហើយនៅមិនទាន់សំរួលបានអាកប្បកិរិយា ក្នុងពេលមានព្រះរាជបន្ទូលទៅកាន់សាធារណជន។ នៅពេលនេះ ដើម្បីទទួលទំនុកចិត្តពីប្រជាជនបែលហ្ស៊ិកបាន ព្រះមហាក្សត្រថ្មីត្រូវការ ការជួយជ្រោមជ្រែង គាំទ្រពីព្រះមហេសី Mathilde របស់ទ្រង់ ព្រោះថាព្រះមហេសី Mathilde មានសមត្ថភាព ប្រជាប្រិយភាព និងសំរស់ឥតខ្ចោះ មានគ្រប់លក្ខណៈដែលជាតិត្រូវការ។ ជាប្រវត្តិសាស្ត្រសំរាប់បែលហ្ស៊ិក ព្រះមហេសី Mathilde បានក្លាយជាព្រះមហាក្សត្រីបែលហ្ស៊ិកទីមួយ ដែលមានដើមកំណើតជាជនជាតិបែលហ្ស៊ិកផ្ទាល់តែម្តង។
ដោយឡែក ក្នុងការគ្រងរាជ្យរបស់អតីតព្រះមហាក្សត្រ Albert II កន្លងមក បែលហ្ស៊ិកជួបវិបត្តិនយោបាយនិងសង្គមជាច្រើន ដូចជាការឈ្លានពានរបស់ក្រុមស្តាំនិយមជ្រុល Flammand និងរឿងអាស្រូវសូកប៉ាន់របស់កងទ័ព នៅពេលទិញឧត្ធម្ភាគចក្រអ៊ីតាលីជាដើម។ ជាងនេះទៀត ក្រោយពេលបោះឆ្នោតឆ្នាំ២០១០ បែលហ្ស៊ិកបានចំណាយពេលយូរជាប្រវត្តិសាស្ត្រ គឺរហូតដល់៥៤១ថ្ងៃ ដើម្បីបង្កើតបានរដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ