របួស ១១នាក់ ក្នុងហេតុការណ៍រន្ទះបាញ់នៅកណ្តាលក្រុងប៉ារីស
ភ្លៀង ព្យុះ និងរន្ទះ បានកើតមានឡើង នៅក្នុងតំបន់អឺរ៉ុប កាលពីល្ងាចថ្ងៃសៅរ៍ម្សិលមិញ បណ្តាលឲ្យស្លាប់មនុស្សម្នាក់ និងជាច្រើននាក់ផ្សេងទៀតត្រូវរងរបួស ក្នុងនោះជាច្រើននាក់ស្ថិតក្នុងលក្ខណៈធ្ងន់ធ្ងរ។ នៅបារាំង បាតុភូតធម្មជាតិនេះបានកើតឡើង នៅកណ្តាលក្រុងប៉ារីស ដែលក្នុងនោះ មនុស្ស ១១នាក់ រួមមានទាំងកូនក្មេងតូចៗ ៨នាក់ផង ត្រូវរងរបួស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
ហេតុការណ៍បានកើតឡើង នៅម៉ោងជិត ៤រសៀល ម៉ោងនៅប៉ារីស (ត្រូវនឹងម៉ោង ៩យប់ នៅក្នុងប្រទេសកម្ពុជា)។ មនុស្សមួយក្រុម មានចាស់ មានក្មេង កំពុងតែអង្គុយលេង និងញ៉ាំចំណី នៅក្នុងសួនឧទ្យានដ៏ជាទីពេញនិយមមួយឈ្មោះថា “Parc Monceau”។ ភ្លាមៗស្រាប់តែភ្លៀងធ្លាក់ជោគជាំ ហើយពួកគេក៏នាំគ្នារត់ទៅជ្រកភ្លៀងនៅក្រោមដើមឈើមួយដើម នៅក្នុងឧទ្យាន។ នៅក្រោមដើមឈើនោះហើយដែលពួកគេត្រូវរន្ទះបាញ់។
ក្នុងចំណោមអ្នករបួសទាំង ១១នាក់ មាន ៨នាក់ គឺជាក្មេងតូចៗ អាយុចន្លោះ ពី ៧ឆ្នាំ ទៅ៨ឆ្នាំ ហើយក្នុងនោះ មាន ៤នាក់ រងរបួសធ្ងន់ធ្ងរ។ គិតមកត្រឹមថ្ងៃអាទិត្យនេះ អ្នករបួសទាំងអស់ កំពុងសម្រាកព្យាបាល នៅក្នុងមន្ទីរពេទ្យ ក្នុងក្រុងប៉ារីស ហើយបើយោងតាមសេចក្តីថ្លែងការណ៍របស់មន្ទីរពេទ្យ រហូតមកដល់ពេលនេះ អ្នករបួសភាគច្រើនមានស្ថានភាពល្អប្រសើរឡើងវិញហើយ នៅសល់តែកូនក្មេងតែម្នាក់ប៉ុណ្ណោះ ដែលកំពុងស្ថិតក្នុងស្ថានភាពសង្រ្គោះបន្ទាន់។
យោងតាមអ្នកនាំពាក្យនៃការិយាល័យអគ្គិភ័យនិងសង្រ្គោះបន្ទាន់ក្រុងប៉ារីស គេអាចរាប់ថាជាសំណាងល្អមួយ ដែលនៅក្នុងហេតុការណ៍រន្ទះបាញ់នេះ មិនបានបណ្តាលឲ្យមានអ្នករងគ្រោះដល់បាត់បង់ជីវិត ហើយនេះ ក៏ដោយសារតែមានភាពចៃដន្យល្អមួយ គឺនៅក្នុងពេលមានហេតុការណ៍នោះ បុគ្គលិកជំនាញខាងសង្រ្គោះបន្ទាន់ម្នាក់ ដែលតាមពិតត្រូវសម្រាកពីការងារ តែកំពុងដើរកម្សាន្យនៅក្បែរកន្លែងកើតហេតុ ហើយបានចូលទៅធ្វើចលនាសង្រ្គោះបន្ទាន់ភ្លាមៗ មុនពេលរថយន្តសង្រ្គោះទៅដល់។
គួរបញ្ជាក់ថា កាលពីថ្ងៃសៅរ៍ម្សិលមិញនេះ តំបន់មួយផ្នែកធំក្នុងប្រទេសបារាំងត្រូវបានការិយាល័យឧតុនិយមប្រកាសដាក់ឲ្យស្ថិតក្នុងភាពប្រុងប្រយ័ត្នខ្ពស់ ដោយបាតុភូតព្យុះ និងរន្ទះ ក៏ប៉ុន្តែ ទីក្រុងប៉ារីស និងតំបន់ជុំវិញក្រុងប៉ារីស មិនស្ថិតក្នុងចំណោមតំបន់ដែលត្រូវប្រកាសអាសន្ននេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ