លោករ៉ូឌ្រីហ្គូ ឌុយទែរតេ៖សម្លាប់អ្នកកាសែតពុករលួយ ជារឿងត្រឹមត្រូវ
នៅបាំងតែ ១ខែគត់ ពោលនៅថ្ងៃទី៣០ មិថុនាខាងមុខដែលលោករ៉ូឌ្រីហ្គូ ឌុយទែរតេត្រូវធ្វើសច្ចាប្រណិធានចូលកាន់តំណែងប្រធានាធិបតីហ្វីលីពីនជាផ្លូវការ។ តែក្នុងរយៈពេលចុងក្រោយនេះ ពោលតាំងពីបានជាប់ឆ្នោតជាប្រធានាធិបតីថ្មីមក លោកឌុយទែរតេតែងតែបានបញ្ចេញប្រតិកម្មទាក់ទងនឹងរឿងរ៉ាវជាតិ ក៏ដូចជារឿងរ៉ាវអន្តរជាតិជាហូរហែ។ ពាក្យសម្តីរបស់លោកឌុយទែរតេដែលពេលខ្លះបានបំផុសឲ្យមានប្រតិកម្មខ្លាំងៗ និងការយល់ឃើញខុសៗគ្នា។ នៅរាត្រីថ្ងៃអង្គារ ទី៣១ ឧសភា លោកឌុយទែរតេយល់ឃើញថា អ្នកកាសែតពុករលួយសក្តិសមនឹងសម្លាប់ចោល ហើយហ្វីលីពីនមិនអាចពឹងអាមេរិកឲ្យជួយការពារខ្លួនមួយជីវិតទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៨
គឺនៅក្នុងឱកាសប្រកាសសមាសភាពរដ្ឋាភិបាលថ្មីនាយប់ថ្ងៃអង្គារ ទី៣១ ឧសភាដែលលោកប្រធានាធិបតីថ្មីហ្វីលីពីនឌុយទែរតេបានថ្លែងថា ជារឿងមួយត្រឹមត្រូវដែលត្រូវសម្លាប់អ្នកកាសែតជាប់ចោទក្នុងបទពុករលួយស៊ីសំណូកសូកប៉ាន់។ អ៊ីចឹងហើយបានជាមានសំណួរចោទឡើងថា តើអាជីពជាអ្នកកាសែតនៅក្នុងប្រទេសហ្វីលីពីនមិនមែនជាអាជីពប្រកបដោយគ្រោះថ្នាក់ខ្លាំងទេ ឬយ៉ាងណា?។ នៅសប្តាហ៍កន្លងទៅថ្មីៗនេះ មានអ្នកកាសែតម្នាក់ត្រូវបានគេធ្វើឃាតសម្លាប់នៅចំកណ្តាលបេះដូងទីក្រុងម៉ានីល ហើយគឺផ្តើមចេញពីឃាតកម្មសម្លាប់រូបអ្នកកាសែតនេះឯងដែលគេបានចោទសួរលោកប្រធានាធិបតីថ្មីឌុយទែរតេថា តើលោកមានវិធានការអ្វីខ្លះទៅលើឃាតកម្មនោះ?។
ចម្លើយគួរឲ្យភ្ញាក់ផ្អើល លោកឌុយទែរតេមិនបានឆ្លើយពីការស្វែងរកឃាតករដៃដល់ ឬស្វែងរកការពិតលើឃាតកម្មសម្លាប់រូបអ្នកកាសែតនោះទេ តែបែរជាថ្លែងដោយប្រើសម្តីធ្ងន់ៗ និងត្រង់ៗថា មិនមែនដោយសារអស់លោកជាអ្នកកាសែត អស់លោកនឹងត្រូវរួចផុតពីឃាតកម្មទេ។ អ្វីដែលលោកឌុយទែរតេចង់និយាយនោះគឺថា ការដែលមានឃាតកម្មសម្លាប់អ្នកកាសែតមកពីអ្នកកាសែតមានកំហុស មានន័យថា បើគ្មានកំហុសក៏គេមិនសម្លាប់ចោលដែរ។ លើសពីនេះទៅទៀត លោកឌុយទែរតេបានយល់ឃើញថា វាជារឿងសមហេតុ សមផលមួយដែលគេត្រូវសម្លាប់អ្នកកាសែតពុករលួយ ស៊ីសំណូកសូប៉ាន់។
សូមជម្រាបជូនថា នេះមិនមែនជាលើកទី១ ទេដែលលោកប្រធានាធិបតីថ្មីហ្វីលីពីនបានប្រើពាក្យដែលអ្នកខ្លះពិបាកស្តាប់ និងពិបាកទទួលយកនោះ។ នៅក្នុងយុទ្ធនាការឃោសនាបោះឆ្នោត លោកឌុយទែរតេបានសន្យាកំចាត់ឲ្យដល់ឫសគល់រាល់បទឧក្រិដ្ឋគ្រប់ប្រភេទដោយព្រមានសម្លាប់ឧក្រិដ្ឋជនជាច្រើនពាន់នាក់។ សម្រាប់លោកឌុយទែរតេ មិនថាមានអាជីពជាអ្នកកាសែត ឬមានអាជីពជាអ្វីទេ បើហ៊ានប្រព្រឹត្តិបទឧក្រិដ្ឋ គឺត្រូវតែប្រហារជីវិតចោល។
ឈឺចាប់ និងមិនយល់ពីសម្តីរបស់លោកឌុយទែរតេ
តក់ស្លុត និងមិនយល់ទាល់តែសោះចំពោះការថ្លែងរបស់លោកឌុយទែរតេចំពោះអ្នកកាសែតរបៀបនេះ នេះជាប្រតិកម្មរបស់សមាគមន៍អ្នកកាសែតជាតិហ្វីលីពីន។ នៅក្នុងសេចក្តីប្រកាសព័ត៌មានមួយចេញផ្សាយថ្ងៃនេះ សមាគមន៍អ្នកកាសែតជាតិហ្វីលីពីនមិនបដិសេធចោលទាំងស្រុងលើការលើកឡើងរបស់លោកប្រធានាធិបតីថ្មីហ្វីលីពីនដែលថា មានទង្វើពុករលួយ ស៊ីសំណូកសូកប៉ាន់នៅក្នុងចំណោមអ្នកកាសែត និងនៅក្នុងមធ្យោបាយឃោសនាមហាជនទេ តែរឿងយកភស្តុតាងពុករលួយ ស៊ីសំណូកសូកប៉ាន់ទៅសម្លាប់អ្នកកាសែតរូបនេះ ឬរូបនោះ ជារឿងមួយមិនត្រឹមត្រូវ និងមិនអាចទទួលយកបានទាល់តែសោះ។
នៅក្នុងសេចក្តីប្រកាសព័ត៌មានដដែល សមាគមន៍អ្នកកាសែតជាតិហ្វីលីពីនបានចាត់ទុកសម្តីរបស់លោកឌុយទែរតេថា ជាការប្រកាសសង្រ្គាមជាចំហប្រឆាំងអ្នកកាសែតជាលក្ខណៈបុគ្គល ឬស្ថាប័នក្នុងគោលដៅបំបិទមាត់អ្នកកាសែត។ ក្តីបារម្ភក៏មានពីមជ្ឈមណ្ឌលដើម្បីសេរីភាព និងការទទួលខុសត្រូវលើមធ្យោបាយឃោសនាមហាជនដែរ។ អនុប្រធានមជ្ឈមណ្ឌលមួយនេះបានចាត់ទុកការថ្លែងរបស់លោកឌុយទែរតេថា គួរឲ្យឈឺចាប់ខ្លាំងណាស់ និងថា ពាក្យសម្តីរបស់លោកឌុយទែរតេជាការបើកភ្លើងខៀវឲ្យសម្លាប់អ្នកកាសែតដោយសំអាងលេសពុករលួយ។
សូមជម្រាបជូនថា ហ្វីលីពីនជាប្រទេសមួយក្នុងចំណោមប្រទេសដ៏គ្រោះថ្នាក់ខ្លាំងណាស់សម្រាប់អ្នកកាសែត។ តាំងពីក្រោយការបិទបញ្ចប់របបផ្តាច់ការរបស់លោក Ferdinand Marcos រយៈពេល ៣០ឆ្នាំមក ហ្វីលីពីនបានញាំញីដោយអំពើពុករលួយស៊ីរូងផ្ទៃក្នុង ហើយមានឃាតកម្មសម្លាប់អ្នកកាសែតចំនួន ១៧៦នាក់។ គ្រាន់តែក្នុងឆ្នាំ ២០០៩ មួយ មានស្លាប់អ្នកកាសែតដល់ទៅ ៣២នាក់នៅក្នុងចំណោមក្រុមមនុស្ស ៥៧នាក់ដែលបានធ្លាក់ខ្លួនស្លាប់នៅក្នុងជម្លោះនយោបាយ។
ហ្វីលីពីនមិនអាចពឹងអាមេរិកឲ្យជួយការពារសន្តិសុខមួយជីវិតទេ
ក្រៅពីបញ្ហាផ្ទៃក្នុងប្រទេស លោកឌុយទែរតេក៏បានផ្តល់ការយល់ឃើញស្តីពីទំនាក់ទំនងរវាងអាមេរិក និងហ្វីលីពីនដែរ។ តែមិនផ្តោតសំខាន់លើទំនាក់ទំនងទ្វេភាគីអាមេរិក និងហ្វីលីពីនសុទ្ធសាធទេ។ នៅត្រង់ចំណុចនេះ លោកប្រធានាធិបតីថ្មីហ្វីលីពីនគ្មានបំណងនឹងសើរើឡើងវិញទេ គ្រាន់តែថា មានបញ្ហាមួយចំនួនដែលហ្វីលីពីនគួរពឹងលើកម្លាំងខ្លួនឯងជាជាងបន្តពឹងលើកម្លាំងអ្នកដទៃ។ លោកឌុយទែរតេចង់និយាយសំដៅលើជម្លោះរវាងហ្វីលីពីន និងចិននៅក្នុងសមុទ្រចិនខាងត្បូងដែលហ្វីលីពីនកំពុងអាងអាមេរិកជួយការពារ។
ឆ្លើយនឹងសំណួរអ្នកកាសែតដែលសួរថា តើហ្វីលីពីនអាចនឹងបើកចរចាផ្ទាល់ជាមួយចិននៅក្នុងជម្លោះនេះដែរ ឬទេ លោកឌុយទែរតែបានឆ្លើយថា ហ្វីលីពីនមានកិច្ចព្រមព្រៀងជាមួយបស្ចិមលោក តែហ្វីលីពីនក៏មានដំណោះស្រាយដាច់ដោយឡែករបស់ខ្លួនដែរ។ ដំណោះស្រាយដាច់ដោយឡែកនោះ គឺកិច្ចចរចាទ្វេភាគីហ្វីលីពីន ចិនដែលលោកឌុយទែរតេយល់ឃើញថា វាជាមធ្យោបាយចាំបាច់ដើម្បីដោះស្រាយបញ្ហា។ គួរជម្រាបជូនថា នេះមិនមែនជាលើកទី១ ទេដែលលោកឌុយទែរតេបានបង្ហាញពីជំហរចង់ដោះស្រាយជម្លោះជាមួយចិននៅក្នុងសមុទ្រចិនខាងត្បូងតាមផ្លូវចរចា និងដោយសន្តិវិធី។
ខុសពីលោកប្រធានាធិបតីផុតអាណត្តិអាគីណូដែលមិនខ្ចីប្រើយន្តការចរចាទ្វេភាគីទេ តែពឹងលើជំនួយអ្នកដទៃ ពិសេសអាមេរិក និងតុលាការអាជ្ញាកណ្តាលអចិន្រ្តៃយ៍ទីក្រុងឡាអេ។ លោកអាគីណូយល់ឃើញថា ជជែកមួយទល់មួយ គឺចាញ់ប្រៀបយ័ក្សចិនរួចទៅហើយ។ តែលោកឌុយទែរតេមិនចង់ពឹងអាមេរិកឲ្យជួយការពារសន្តិសុខហ្វីលីពីនអស់មួយជីវិតទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ