ទស្សនកិច្ចលោកអូបាម៉ានៅអារ៉ាប៊ីសាអូឌីតបំពុលដោយគម្រោងច្បាប់ស្តីពីភេរវកម្មថ្ងៃ ១១ កញ្ញា ២០០១
នៅថ្ងៃអង្គារ ទី១៩ មេសានេះ លោកប្រធានាធិបតីអាមេរិកបារ៉ាក់ អូបាម៉ាចេញដំណើរទៅបំពេញទស្សនកិច្ចនៅក្នុងប្រទេសអារ៉ាប៊ីសាអូឌីត ប្រទេសអង់គ្លេស និងបញ្ចប់ទស្សនកិច្ចនៅក្នុងប្រទេសអាល្លឺម៉ង់។ អារ៉ាប៊ីសាអូឌីតដែលជាសម្ព័ន្ធមិត្តចាក់ទឹកមិនលេចរបស់អាមេរិកនឹងត្រូវលោកអូបាម៉ាទៅបំពេញទស្សនកិច្ចនៅថ្ងៃពុធ ទី២០ មេសា។ តែមួយថ្ងៃមុនការទៅដល់របស់លោកអូបាម៉ាក្នុងទឹកដីអារ៉ាប៊ីសាអូឌីត សង្រ្គាមពាក្យសម្តីកំពុងកើតមានយ៉ាងខ្លាំងរវាងទីក្រុងវ៉ាស៊ីនតោន និងទីក្រុងរីយ៉ាដទាក់ទងនឹងសេចក្តីព្រាងច្បាប់ស្តីពីភេរវកម្មថ្ងៃទី១១ កញ្ញា ២០០១ ដែលសភាអាមេរិកគ្រោងនឹងអនុម័តនៅថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០៥:៥៤
សេចក្តីព្រាងច្បាប់ស្តីពីភេរវកម្មថ្ងៃទី១១ កញ្ញា ២០០១ ដែលសភាអាមេរិកគ្រោងនឹងអនុម័ត គឺជាសេចក្តីព្រាងច្បាប់មួយដែលនឹងអនុញ្ញាតឲ្យមានការអូស ក ថ្នាក់ដឹកនាំអារ៉ាប៊ីសាអូឌីតមួយចំនួនទៅឆ្លើយបំភ្លឺនៅពីមុខតុលាការអាមេរិកាំងពាក់ព័ន្ធនឹងមហាភេរវកម្មថ្ងៃទី១១ កញ្ញា ឆ្នាំ ២០០១ នៅក្នុងទីក្រុងញូយ៉ក និងទីក្រុងវ៉ាស៊ីតោន។ សេចក្តីព្រាងច្បាប់នោះនៅមិនទាន់បានដាក់ឲ្យសភាអាមេរិកបោះឆ្នោតនៅឡើយទេ តែបានទទួលការគាំទ្រទាំងពីក្រុមអ្នកប្រជាធិបតេយ្យ និងក្រុមអ្នកសាធារណរដ្ឋដែលមានសម្លេងភាគច្រើននៅសភា។
ប្រសិនបើច្បាប់នោះត្រូវបានសភាអាមេរិកអនុម័តជាផ្លូវការ និងបើគ្មានការប្រើសិទ្ធិវេតូប្រឆាំងពីលោកប្រធានាធិបតីអូបាម៉ាទេ នោះក្រុមគ្រួសារជនរងគ្រោះអាមេរិកាំងក្នុងភេរវកម្មថ្ងៃ ១១ កញ្ញា ឆ្នាំ ២០០១ អាចនឹងដាក់ពាក្យប្តឹងប្រឆាំងរដ្ឋាភិបាលអារ៉ាប៊ីសាអូឌីតដើម្បីទទួលបានសំណងជម្ងឺផ្លូវចិត្ត និងសំណងជាលុយកាក់។ គួរជម្រាបជូនថា ១៥ឆ្នាំ ក្រោយមហាភេវកម្មថ្ងៃ១១ កញ្ញា ២០០១ មក គ្មានភស្តុតាងណាមួយដែលបញ្ជាក់ពីការរួមគំនិតរបស់ប្រទេសអារ៉ាប៊ីសាអូឌីតទេ។
តែសេចក្តីព្រាងច្បាប់របស់អាមេរិកពេលនេះបានតាក់តែងឡើងដោយគេសំអាងថា នៅក្នុងចំណោមភេរវជនអត្តឃាតទំាង ១៩នាក់ដែលបានបើកយន្តហោះទៅទម្លាក់ខ្លួនកម្ទេចនៅក្នុងទីក្រុងវ៉ាស៊ីនតោន និងទៅបុកអាគារពាណិជ្ជកម្មពិភពលោក « World Trade Center » ទាំងពីរក្នុងទីក្រុងញូយ៉ក មាន ១៥នាក់ជាជនជាតិអារ៉ាប៊ីសាអូឌីតដែលរដ្ឋាភិបាលអារ៉ាប៊ីសាអូឌីតមិនអាចឆ្លើយថា ខ្លួនមិនដឹងរឿងអ្វីទាំងអស់ទេ។
លោកអូបាម៉ាបានប្រឆាំងនឹងច្បាប់ដោយលើកពន្យល់ហេតុផល
លោកប្រធានាធិបតីបារ៉ាក់ អូបាម៉ាបានប្រាប់ឲ្យដឹងរួចហើយថា លោកនឹងប្រើសិទ្ធិវេតូប្រឆាំងនឹងច្បាប់នោះ ប្រសិនបើសភាអនុម័ត។ លោកអូបាម៉ាបានថ្លែងដូចនេះនៅក្នុងបទសម្ភាសន៍ជាមួយទូរទស្សន៍ CBSនាថ្ងៃចន្ទ ទី១៨ មេសា ពោលមួយថ្ងៃមុននឹងចេញដំណើរទៅកាន់ប្រទេសអារ៉ាប៊ីសាអូឌីត។ ក្នុងថ្ងៃចន្ទ ទី១៨ មេសាដដែល អ្នកនាំពាក្យសេតវិមានលោក Josh Earnestក៏បានប្រាប់បន្ថែមថា លោកអូបាម៉ាមិនគាំទ្រសេចក្តីព្រាងច្បាប់នោះ ហើយក៏នឹងមិនប្រកាសឲ្យប្រើច្បាប់នោះដែរ ប្រសិនបើសភា អនុម័ត។
លោកអូបាម៉ាបានលើកយកហេតុផលទៅពន្យល់ថា ប្រសិនបើរដ្ឋបាលរបស់លោកបើកសិទ្ធិឲ្យពលរដ្ឋអាមេរិកអាចដាក់ពាក្យប្តឹងប្រឆាំងនឹងរដ្ឋាភិបាលបរទេសណាមួយ នោះរដ្ឋបាលអាមេរិកខ្លួនឯងក៏អាចរងការប្តឹងពីពលរដ្ឋនៅក្នុងប្រទេសផ្សេងដែរ។ ចំណែកលោក Josh Earnestបានអះអាងថា អ្វីដែលរដ្ឋបាលអាមេរិកបារម្ភខ្លាំងចំពោះច្បាប់នោះមិនមែនខ្លាចប៉ះពាល់ដល់ទំនាក់ទំនងជាមួយប្រទេសណាមួយទេ តែវាពាក់ព័ន្ធនឹងការរំលោភបំពានលើគោលការណ៍នៃច្បាប់អន្តរជាតិដែលលោក Josh Earnestហៅថា « អភ័យឯកសិទ្ធិរដ្ឋ »។ « អភ័យឯកសិទ្ធិរដ្ឋ » ដែលនឹងអនុញ្ញាតឲ្យរដ្ឋ និងរដ្ឋដោះស្រាយបញ្ហាតាមផ្លូវទូត គឺមិនមែនដោះស្រាយបញ្ហាតាមផ្លូវតុលាការទេ។
អារ៉ាប៊ីសាអូឌីតចេញមុខព្រមានទុកជាមុន
ទោះបីជាមានការប្រឆាំងមុនរបស់លោកអូបាម៉ាក៏ដោយ ក៏មិនអាចទប់កំហឹងរបស់អារ៉ាប៊ីសាអូឌីតបានដែរ។ គេនៅមិនដឹងថា តើស្តេចអារ៉ាប៊ីសាអូឌីតសាលម៉ាននឹងនិយាយអ្វីជាមួយលោកអូបាម៉ាក្នុងសំណុំរឿងដ៏ចម្រូងចម្រាសនេះ។ អ្វីដែលគេដឹង ទីក្រុងរីយ៉ាដតាមរយៈប្រមុខការទូតរបស់ខ្លួនលោកអាដែល អាល់យូបេធ្លាប់បានបញ្ចេញប្រតិកម្មព្រមានខ្លាំងៗនាដំណើរទស្សនកិច្ចនៅអាមេរិកក្នុងខែមីនាកន្លងទៅថា ច្បាប់ស្តីពីភេរវកម្មថ្ងៃ១១ កញ្ញា ២០០១ នឹងបង្កឲ្យមានផលវិបាកធ្ងន់ធ្ងរនៅក្នុងទំនាក់ទំនងរវាងអាមេរិក និងអាមរ៉ាប៊ីសាអូឌីត។
បើតាមកាសែតប្រចាំអាមេរិកមួយឈ្មោះ New York Timesឲ្យដឹងថា ប្រមុខការទូតអារ៉ាប៊ីសាអូឌីតបានព្រមានពីការលក់មូលប័ត្របំណុលរដ្ឋទាំងអស់នៅអាមេរិកដែលគិតជាប្រាក់សរុបប្រមាណជា ៧៥០ ០០០លានដុល្លារ ព្រមទំាំងអចលនទ្រព្យផ្សេងទៀតរបស់អារ៉ាប៊ីសាអូឌីតដែលមាននៅលើទឹកដីអាមេរិកាំង។ ដូច្នេះចង់ ឬមិនចង់ សេចក្តីព្រាងច្បាប់ស្តីពីភេរវកម្មថ្ងៃ ១១ កញ្ញា ២០០១ របស់អាមេរិកពេលនេះកំពុងធ្វើឲ្យទំនាក់ទំនងអាមេរិក អារ៉ាប៊ីសាអូឌីតដែលកំពុងតានតឹងស្រាប់រឹតតែឡើងកម្តៅមួយកម្រិតទៀត ពិសេសនឹងធ្វើឲ្យបរិយាកាសអាប់អួរកាន់តែខ្លាំងនាជំនួបរវាងលោកអូបាម៉ា និងស្តេចអារ៉ាប៊ីសាអូឌីតសាលម៉ាន។
សូមជម្រាបជូនថា ពិតមែនជាសម័្ពនមិត្តចាក់ទឹកមិនលេចក៏ដោយ ក៏អារ៉ាប៊ីសាអូឌីតអន់ចិត្តនឹងអាមេរិកមិនតិចទេនៅក្នុងសំណុំរឿងជាច្រើន ទាំងសំណុំរឿងរវាងគ្នា ក៏ដូចជាសំណុំរឿងតំបន់ខ្លះ ពិសេសទាក់ទងនឹងវិបត្តិស៊ីរី ឬកិច្ចព្រមព្រៀងនុយក្លេអ៊ែរអ៊ីរ៉ង់ជាដើម។ តែគេក៏មិនត្រូវភ្លេចនិយាយទេថា មិត្តនៅជាមិត្តដែលត្រូវការគ្នាទៅវិញ ទៅមកដោយមិនអាចខ្វះបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ