ប្រជាជនហុងកុងធ្វើបាតុកម្មប្រឆាំងការហាមមិនឲ្យសកម្មជនប្រជាធិបតេយ្យឈរឈ្មោះបោះឆ្នោត
កាលពីល្ងាចថ្ងៃអាទិត្យទី២៨ ម្សិលមិញនេះ ក្រុមបាតុករក្នុងទីក្រុងហុងកុងបានប្រមូលផ្តុំគ្នានៅខាងក្រៅទីស្នាក់ការកំពូលៗរបស់រដ្ឋាភិបាល បន្ទាប់ពីសកម្មជនប្រជាធិបតេយ្យឈានមុខរបស់ពួកគេម្នាក់ត្រូវបានហាមឃាត់ មិនអោយឈរឈ្មោះជាបេក្ខជនក្នុងការបោះឆ្នោតដែលនឹងប្រព្រឹត្តទៅក្នុងខែមីនាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
សកម្មជនដែលបេក្ខភាពឈរឈ្មោះត្រូវបានហាមឃាត់គឺ កញ្ញា Agnes Chow ដែលមានអាយុ២១ឆ្នាំ។ កញ្ញា ធ្លាប់ជាសកម្មជននាំមុខនៃចលនា Umbrella Movement កាលពីឆ្នាំ២០១៤ ដើម្បីទាមទារអោយមានការកែទម្រង់របបនយោបាយរបស់ហុងកុង។ ហើយកាលពីពេលថ្មីៗនេះ កញ្ញាក៏បានដាក់ពាក្យសុំធ្វើជាបេក្ខនារីឈរឈ្មោះសម្រាប់ការបោះឆ្នោតក្នុងខែមីនាខាងមុខ ក៏ប៉ុន្តែពាក្យសុំនោះត្រូវបានបដិសេធចោលដោយរដ្ឋាភិបាលកាលពីថ្ងៃសៅរ៍ចុងសប្តាហ៍នេះ។
ចំពោះបាតុកម្មប្រឆាំងតវ៉ាម្សិលមិញវិញ កញ្ញាក៏មានវត្តមាននៅទីនោះដែររួមជាមួយនឹងក្រុមបាតុករប្រមាណ២ពាក់នាក់ផ្សេងទៀត។ កញ្ញាផ្ទាល់ ក៏ដូចជាបាតុករដទៃបានយល់ឃើញថា រដ្ឋាភិបាលកំពុងព្យាយាមកំចាត់ចោលនូវបក្សនយោបាយទាំងឡាយណាដែលប្រឆាំងនឹងពួកគេ។ តែទោះជារងនូវសម្ពាធនិងការគាបសង្កត់យ៉ាងណាក្តី ក្រុមបាតុករបានអះអាងថា ពួកគេនឹងបន្តទាមទារអោយមានសិទ្ធិមនុស្ស និងសិទ្ធិសេរីភាព។
គណបក្សរបស់កញ្ញា Agnes Chow ដែលមានឈ្មោះថា Demosisto ពុំបានធ្វើយុទ្ធនាកាឃោសនាទាមទារឯករាជ្យអោយហុងកុងពីចិននោះទេ តែពួកគេចង់អោយហុងកុងមានការចាត់តាំងការងារដោយខ្លួនឯង និងមានការធ្វើប្រជាមតិសម្រាប់ប្រជាជនក្នុងការសម្រេចចិត្តថាពួកគេចង់បានការគ្រប់គ្រងបែបណា។
គួររំលឹកដែរថា ហុងកុងត្រូវបានអង់គ្លេសប្រគល់អោយចិនវិញក្នុងឆ្នាំ១៩៩៧ ក្រោមកិច្ចព្រមព្រៀង ”ប្រទេសមួយ ប្រព័ន្ធគ្រប់គ្រងពីរ” ដែលអនុញ្ញាតអោយហុងកុងមានសិទ្ធិមួយផ្នែកក្នុងការរៀបចំបទនិតីបញ្ញាត្តិនិងសិទ្ធិមួយចំនួនដូចជាសិទ្ធិសេរីភាពក្នុងការបញ្ចេញមតិនិងសិទ្ធិធ្វើបាតុកម្មជាដើម ដែលសិទ្ធិទាំងនោះត្រូវបានហាមឃាត់នៅប្រទេសចិនដីគោក។
កិច្ចព្រមព្រៀងនេះ បានកំណត់អោយមានប្រសិទ្ធភាពរហូតដល់ឆ្នាំ២០៤៧។ ក៏ប៉ុន្ដែស្របពេលដែលរដ្ឋាភិបាលប៉េកាំងប្រទេសចិនតែងតែលូកដៃចូលក្នុងគ្រប់កិច្ចការងាររបស់ហុងកុង រួមទាំងការបោះឆ្នោតផងនោះ ប្រជាជនជនមួយចំនួនយល់ឃើញថា កិច្ចព្រមព្រៀងនេះហាក់បីដូចជាត្រូវបានបញ្ចប់រួចទៅហើយ។
សភាអង់គ្លេសក៏បានលើកឡើងអំពីបញ្ហានេះក្នុងកិច្ចប្រជុំរបស់ពួកគេកាលពីសប្តាហ៍មុនផងដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ