អង់គ្លេស-អាមេរិក៖ហេតុអ្វីបានជាលោកប្រធានាធិបតីអាមេរិកអូបាម៉ាប្រឆាំង « Brexit »
ចេញពីប្រទេសអារ៉ាប៊ីសាអូឌីត លោកប្រធានាធិបតីអាមេរិកអូបាម៉ាបន្តទស្សនកិច្ចរយៈពេល ២ថ្ងៃកន្លះនៅក្នុងប្រទេសអង់គ្លេសចាប់ពីនៅថ្ងៃសុក្រ ទី២២ មេសានេះ។ វត្តមានរបស់លោកអូបាម៉ាក្នុងទឹកដីអង់គ្លេសបានធ្វើឡើង ចំពេលដែលប្រជារាស្រ្តអង់គ្លេសកំពុងប្រារព្ធពិធីបុណ្យចម្រើនព្រះជន្មព្រះមហាក្សត្រី Elisabeth ទី២ ឈានចូល ៩០ព្រះវស្សា និងចំពេលដែលប្រទេសអង់គ្លេសកំពុងធ្វើយុទ្ធនាការឃោសនាបោះឆ្នោតប្រជាមតិស្តីពី “Brexit” មានន័យថា តើត្រូវបន្តរក្សាទុក ឬមួយក៏ដកអង់គ្លេសចេញពីសមាជិកសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៣០
មានប្រធានបទសំខាន់ចំនួនពីរដែលគ្របដណ្តប់ដំណើរទស្សនកិច្ចរយៈពេលជាង ២ថ្ងៃរបស់លោកប្រធានាធិបតីអាមេរិកអូបាម៉ានៅក្នុងប្រទេសអង់គ្លេស ទី១ ទាក់ទងនឹងយុទ្ធនាការប្រយុទ្ធប្រឆាំងអង្គការរដ្ឋអ៊ីស្លាម និងប្រធានបទទី២ ទាក់ទងនឹងគម្រោងរៀបចំបោះឆ្នោតប្រជាមតិនៅក្នុងប្រទេសអង់គ្លេសស្តីពី “Brexit” មានន័យថាតើត្រូវបន្តរក្សាទុក ឬមួយក៏ដកប្រទេសអង់គ្លេសចេញសមាជិកសហភាពអឺរ៉ុប។
ក៏ប៉ុន្តែ ប្រធានបទទី២ កំពុងគ្របដណ្តប់ខ្លាំងជាងគេនៅក្នុងទស្សនកិច្ចរបស់លោកអូបាម៉ា និងក៏កំពុងបង្កឲ្យមានភាពចម្រូងចម្រាសខ្លាំងនៅក្នុងមជ្ឈដ្ឋានមហាជនអង់គ្លសេទូទៅ តាំងពីស្រទាប់មហាជនសាមញ្ញ រហូតដល់ស្រទាប់អ្នកនយោបាយអង់គ្លេស។ សូមជម្រាបជូនថា រឿង “Brexit” នេះបាន និងកំពុងពុះចែកសង្គមអង់គ្លេសជាពីរ នៅម្ខាង គឺក្រុមគាំទ្រលោកនាយករដ្ឋមន្រ្តីអង់គ្លេសដាវីដ កាមេរ៉ូនដែលចង់រក្សាទុកអង់គ្លេសនៅក្នុងសហភាពអឺរ៉ុប រីឯនៅម្ខាងទៀត គឺក្រុមដែលចង់ដកអង់គ្លេសចេញពីសមាជិកសហភាពអឺរ៉ុប។
រហូតមកដល់ពេលនេះ លោកដាវីដ កាមេរ៉ូនកំពុងឈឺក្បាលខ្លាំង ព្រោះសម្លេងគាំទ្រ“Brexit” មានកាន់តែច្រើនឡើងៗពីមួយថ្ងៃទៅមួយថ្ងៃ។ តែយ៉ាងណាក៏ដោយ ជោគវាសនារបស់អង់គ្លេសយ៉ាងណានៅក្នុងសហភាពអឺរ៉ុបនឹងត្រូវកំណត់ដោយប្រជារាស្រ្តអង់គ្លេសតាមរយៈការបោះឆ្នោតប្រជាមតិដែលគ្រោងរៀបចំនៅថ្ងៃទី២៣ មិថុនាខាងមុខ។
លោកអូបាម៉ាចេញមុខប្រឆាំងនឹងការដកអង់គ្លេសពីសហភាពអឺរ៉ុប
លោកអូបាម៉ាបានចេញមុខប្រឆាំងនឹង “Brexit” តាំងតែពីដំបូងមកម្ល៉េះ និងធ្លាប់បានស្នើលោកលោកនាយករដ្ឋមន្រ្តីអង់គ្លេសកុំឲ្យរៀបចំបោះឆ្នោតប្រជាមតិទៀតផង។ វត្តមានរបស់លោកអូបាម៉ានៅអង់គ្លេសពេលនេះក៏មានការលើកឡើងថា គ្មានហេតុផលអ្វីដែលលោកអូបាម៉ាត្រូវទៅបំពេញទស្សនកិច្ចនៅក្នុងប្រទេសអង់គ្លេស ឬមួយក៏មានសំណុំរឿងអ្វីបន្ទាន់ដែលលោកអូបាម៉ាត្រូវដោះស្រាយជាមួយលោកដាវីដ កាមេរ៉ូនផ្ទាល់ទេ។ រឿងបន្ទាន់របស់លោកអូបាម៉ាមានតែមួយ គឺជួយផ្តល់ការគាំទ្របន្ថែមដល់លោកនាយករដ្ឋមន្រ្តីអង់គ្លេសដាវីដ កាមេរ៉ូន ឬមួយក៏ដាក់សម្ពាធដល់ប្រជារាស្រ្តអង់គ្លេសកុំឲ្យបោះឆ្នោតទទួលយក “Brexit”។
នៅក្នុងកាសែតអង់គ្លេសប្រចាំថ្ងៃឈ្មោះ Daily Telegraph ចេញផ្សាយថ្ងៃនេះ លោកអូបាម៉ាបានប្រាប់ពីមូលហេតុមួយចំនួនដែលលោកប្រឆាំងនឹង“Brexit” ។ លោកអូបាម៉ាយល់ថា សហភាពអឺរ៉ុបមិនបានកាត់បន្ថយឥទ្ធិពលរបស់អង់គ្លេសទេ ពោលមានតែជួយបង្កើនថែម ហើយសហភាពអឺរ៉ុបខ្លាំងក៏មិនបានគំរាមកំហែងតួនាទីរបស់អង់គ្លេសនៅក្នុងលោកដែរ ពោលមានតែជួយបង្កើនបន្ថែម។ បើគេពិនិត្យមើលមួយភ្លែតទៅឃើញថា លោកអូបាម៉ាចង់ឲ្យសហភាពអឺរ៉ុបបន្តរួបរួមគ្នា ព្រោះការចាកចេញរបស់អង់គ្លេសអាចជាគំរូអាក្រក់មួយសម្រាប់ប្រទេសសមាជិកអឺរ៉ុបផ្សេងទៀត។
តែបើគេពិនិត្យមើលឲ្យបានស៊ីជម្រៅបន្តិចឃើញថា ការដែលលោកអូបាម៉ាមិនចង់ឲ្យអង់គ្លេសចេញពីសហភាពអឺរ៉ុប ព្រោះអង់គ្លេសជាស្ពានតភ្ជាប់ និងជារឹតចំណងទាក់ទងរវាងអាមេរិក និងសហភាពអឺរ៉ុប។ សម្រាប់អាមេរិក អង់គ្លេសជាសម្ព័ន្ធមិត្តផ្តាច់មុខនៅផ្ទៃក្នុងអឺរ៉ុបដែលខ្លួនអាចពឹងពាក់បាន និងមានទឹកមាត់ប្រៃ ព្រមទាំងជាអ្នកជួយគាំទ្រជំហររបស់អាមេរិកនៅក្នុងកិច្ចចរចាជាមួយសហភាពអឺរ៉ុប។ អាមេរិកយល់ច្បាស់ថា បើអង់គ្លេសចេញពីសមាជិកអឺរ៉ុប អាមេរិក និងសហភាពអឺរ៉ុបអាចនឹងពិបាកនិយាយចុះសម្រុងគ្នា។
ក្រុមគាំទ្រ “Brexit”ចោទលោកអូបាម៉ាថាបានជ្រៀតជ្រែករឿងផ្ទៃក្នុងរបស់អង់គ្លេស
ទង្វើរបស់លោកអូបាម៉ាពេលនេះកំពុងធ្វើឲ្យក្រុមសកម្មជនអង់គ្លេសគាំទ្រ “Brexit” ក្តៅក្រហាយយ៉ាងខ្លាំង។ ក្រុមសកម្មជនគាំទ្រ “Brexit” បានចាត់ទុកអន្តរាគមន៍របស់លោកប្រធានាធិបតីអាមេរិកអូបាម៉ាថា ជាការលូកដៃចូលជ្រៀតជ្រែតកិច្ចការផ្ទៃក្នុងរបស់អង់គ្លេស។ នាប៉ុន្មានសប្តាហ៍កន្លងទៅនេះ សមាជិកសភាអង់គ្លេសប្រមាណជា ១០០នាក់ដែលភាគច្រើនជាអ្នកអភិរក្សនិយមបានសរសេរលិខិតមួយច្បាប់ទៅកាន់ស្ថានទូតអាមេរិកប្រចាំទីក្រុងឡុងដ៍ដោយបានស្នើឲ្យលោកអូបាម៉ាលប់ចោលទស្សនកិច្ចក្នុងប្រទេសអង់គ្លេស។
ទន្ទឹមគ្នានេះ ក្រុមសកម្មជនគាំទ្រ “Brexit” ថែមទាំងបានចោទលោកអូបាម៉ាថា ជាមនុស្សលាក់ពុត និងចោទជាសំណួរថា តើអាមេរិកខ្លួនឯងយល់ព្រមឲ្យអ្នកផ្សេងលូកដៃចូលកកូរកកាយរឿងផ្ទៃក្នុងរបស់ខ្លួនដែរ ឬទេ?។ សូមជម្រាបជូនថា ក្រុមសកម្មជនដែលចង់ឲ្យអង់គ្លេសដកខ្លួនចេញពីអឺរ៉ុបដោយពួកគេយល់ថា ជាការអនុញ្ញាតឲ្យអង់គ្លេសមានសេរីភាពទៅចាប់ដៃជាមួយប្រទេសផ្សេងដោយមិនចាំបាច់ឆ្លងកាត់តាមស្ថាប័នអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ