ជំនួបកំពូលអឺរ៉ុប ចង់ទុកអង់គ្លេស តែមិនងប់ព្រមគ្រប់យ៉ាងឡើយ
ពេលវេលាផ្តាច់ព្រ័ត្របានមកដល់ហើយ សម្រាប់អឺរ៉ុបនិងអង់គ្លេស ! ប៉ុន្តែជំនួបកំពូលអឺរ៉ុប ស្តីពីជោគវាសនាអង់គ្លេសក្នុងសហភាពអឺរ៉ុប មួយថ្ងៃដំបូងមិនទាន់បានផ្តល់លទ្ធផលអ្វីទេ ! ប្រធានក្រុមប្រឹក្សា ដូណាល់ ទុស្ក៍ បានត្រឹមអះអាងថា មានការជឿនលឿនក្នុងកិច្ចចរចា ប៉ុន្តែនៅសល់បញ្ហាត្រូវជជែកដោះស្រាយច្រើន។ ក្រោយពីជជែកគ្នា យ៉ាងក្តៅស្លឹកត្រចៀកអស់មួយល្ងាចថ្ងៃព្រហស្បតិ៍ និងជំនួបដាច់ដោយឡែករវាងប្រមុខដឹកនាំសហភាពអឺរ៉ុបនិងអង់គ្លេសពេញមួយយប់មក ថ្នាក់ដឹកនាំអឺរ៉ុបទាំង២៨ត្រូវបន្តពិភាក្សាគ្នាទៀត នៅថ្ងៃសុក្រនេះទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៣
នៅក្នុងការចរចាថ្ងៃដំបូងនេះ ប្រទេសជាសមាជិកអឺរ៉ុបខ្លះ បានសម្តែងការមិនយល់ព្រមដាច់ខាតលើគម្រោងកិច្ចព្រមព្រៀងរវាងអឺរ៉ុបនិងអង់គ្លេសតែម្តង បើទោះបីជាគ្រប់គ្នាបានបង្ហាញជំហររួម ចង់ជួយអង់គ្លេស និងចង់បានកិច្ចព្រមព្រៀង ដែលអនុញ្ញាតឱ្យលោក នាយករដ្ឋមន្ត្រីអង់គ្លេស ដេវីត កាមឺរោន ចេញឃោសនាការពារសមាជិកភាពអង់គ្លេសអឺរ៉ុបនៅចំពោះមុខពលរដ្ឋអង់គ្លេសក៏ដោយ។
ពេញមួយយប់មិញ មានជំនួបជាក្រុមតូចៗ សឹងវាល់ភ្លឺ រវាងប្រមុខរដ្ឋាភិបាលអង់គ្លេសជាមួយប្រធានគណៈកម្មការ និងក្រុមប្រឹក្សាអឺរ៉ុប ជាមួយប្រធានាធិបតីបារាំង ប៉ុន្តែលទ្ធផលនៅតែដដែល។ លោក ដេវីត កាមឺរោន បានអះអាងមុនពេលចូលជាថ្មីក្នុងថ្ងៃទីពីរ ថា “នៅតែមិនទាន់មានកិច្ចព្រមព្រៀង”។
តើអ្វីទៅចំណុចខ្ទាស់ ?
ចំណុចដែលខ្ទាស់ គឺ ជាសំណើរបស់អង់គ្លេសតែម្តង ! កាលពីថ្ងៃទី ៤ កុម្ភៈ ដោយមិនចង់ឃើញអង់គ្លេសបំបែកខ្លួនចេញ ក្រុមប្រឹក្សាអឺរ៉ុប បានសុខចិត្តសុខកាយ ជាមួយអង់គ្លេស ធ្វើកំណែទម្រង់អឺរ៉ុប និងចេញជាគម្រោងកិច្ចព្រមព្រៀងមួយដាក់ជូនប្រទេសជាសមាជិកសហភាពសម្រេចនៅថ្ងៃនេះ។
ជាគម្រោងកិច្ចព្រមព្រៀងដែលឆ្លើយតបតាមសំណូមពរអង់គ្លេសស្ទើរតែទាំងស្រុង តែអាចប៉ះពាល់ដល់ប្រយោជន៍រដ្ឋជាសមាជិកផ្សេងទៀត ទើបបង្កបង្កើតជាការខ្វែងគំនិតគ្នា ពិបាកសម្រេច។
សំណើសំខាន់ៗរបស់អង់គ្លេស ដែលនៅជាប់គាំង មានដូចជា ការទាមទារឱ្យមានគិតគូរខ្លាំងដល់អធិបតេយ្យភាពអង់គ្លេស អភិបាលកិច្ចអឺរ៉ុបប្រសើរជាងមុន កាត់បន្ថយជំនួយឧបត្ថម្ភដល់អន្តោប្រវេសន៍អឺរ៉ុប។ អង់គ្លេសចង់ឱ្យប្រទេសជាសមាជិកតែមួយអាចបិទខ្ទប់សេចក្តីសម្រេចរបស់តំបន់អឺរ៉ូ ឬប្តូរកាលវិភាគរបស់ក្រុមប្រឹក្សាអឺរ៉ុប បើមិនពេញចិត្ត។ ប៉ុន្តែសម្រាប់បារាំង សិទ្ធិសុំបើកប្រជុំពិភាក្សាត្រូវតែមានការស្នើពីសមាជិកច្រើនប្រទេស កាន់តែច្រើន កាន់តែល្អ។
ទាក់ទងនឹងបញ្ហាអន្តោប្រវេសន៍ ដែលជាប្រធានបទដ៏រសើបនិងតានតឹងបំផុតវិញ។ លោកនាយករដ្ឋមន្ត្រីអង់គ្លេស ចង់កំណត់រយៈពេលនៃការផ្អាកជំនួយសង្គម ដល់ពលរដ្ឋអឺរ៉ុបរស់នៅអង់គ្លេស។ បើតាមប្រភពការទូតមួយនិយាយថាអង់គ្លេសចង់ពន្យារពេលផ្អាកជំនួយនេះ ដល់ទៅ៧ ឬ១៣ឆ្នាំ។ គឺចំណុចនៃដែលគាំងស្តូក ជាពិសេសសម្រាប់បណ្តាប្រទេសនៅអឺរ៉ុបខាងកើត (ប៉ូឡូញ សាធារណរដ្ឋឆែក ស្លូវ៉ាសគី និងហុងគ្រី)។
ជាចុងក្រោយ លោក កាមឺរោន ចង់ឱ្យសំណើកំណែទម្រង់ទាំងអម្បាលម៉ាននេះមានចុះ នៅថ្ងៃអនាគត ក្នុងសន្ធិសញ្ញាអឺរ៉ុប ប៉ុន្តែចំណុចនេះ បែលហ្សិកដែលស្រមៃចង់បានអឺរ៉ុបបែបរដ្ឋសហព័ន្ធ ពិបាកទទួលយកណាស់។
ការចរចាអឺរ៉ុប-អង់គ្លេសបង្អាក់ដោយបញ្ហាអន្តោប្រវេសន៍
កិច្ចចរចាស្តីពីការបញ្ចៀសអង់គ្លេសកុំឱ្យដើរចេញអឺរ៉ុបនេះ ត្រូវបានបង្អាក់ ដោយវិបត្តិអន្តោប្រវេសន៍។ ប្រមុខដឹកនាំខ្លះ យល់ថា គេហាក់ដូចជាចំណាយពេលវេលាច្រើនជ្រុលដល់រឿងអង់គ្លេស ក្នុងខណៈដែលអឺរ៉ុបកំពុងជួបប្រទះវិបត្តិមួយទៀត ដ៏ធ្ងន់ធ្ងរមិនធ្លាប់មាន គឺវិបត្តិអន្តោប្រវេសន៍។
ក្រោយជំនួបពិភាក្សាជាង៦ម៉ោង នៅយប់មិញ ប្រធានក្រុមប្រឹក្សាអឺរ៉ុប បានប្រកាសថា គ្មានមធ្យោបាយអ្វីប្រសើរ ឆ្លាតវៀងវៃ ល្អ និងសមស្រប ជាងការសហការជាមួយនឹងប្រទេសតួកគីឡើយ ក្នុងការទប់ស្កាត់លំហូរអន្តោប្រវេសន៍។ ក្នុងន័យនេះ អឺរ៉ុបនឹងបើកជំនយបកំពូលវិសាមញ្ញមួយជាមួយតួកគី នៅដើមខែមីនា ដើម្បីរកវិធីអនុវត្តផែនការសកម្ម ដែលបានព្រមព្រៀងគ្នាតាំងពីដើមខែធ្នូ ២០១៤ ទប់ស្កាត់អន្តោប្រវេសន៍នៅតួកគីអាចហូរចូលអឺរ៉ុបតាមប្រទេសក្រិក។
ក្នុងសំណុំរឿងនេះ សមាជិកទាំង២៨បានព្រមព្រៀងគ្នាជាឯកច្ឆ័ន្ទ ថាត្រូវតែមានដំណោះស្រាយជាលក្ខណៈអឺរ៉ុប មិនមែនសម្រេចអ្វីជាឯកតោភាគីទេ។ ការសម្រេចជាឯកតោភាគី គឺចង់សំដៅលើប្រទេសអូទ្រីស ដែលបានសម្រេចម្នាក់ឯង និងគួរឱ្យភ្ញាក់ផ្អើល កំណត់កូតា ចំនួនជនភៀសខ្លួនដែលអាចចូលឆ្លងកាត់ទឹកដី (៣២០០នាក់)និងដែលអាចសុំសិទ្ធិជ្រកកោន (៨០នាក់) ក្នុងមួយថ្ងៃៗ។ តែប្រមុខរដ្ឋាភិបាលអូទ្រីស ក៏បានសម្របខ្លួនទាំងស្រុងទៅនឹងសេចក្តីថ្លែងការណ៍ចុងក្រោយរបស់អឺរ៉ុបដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ