អឺរ៉ុប-អង់គ្លេស សម្រេចបានកិច្ចព្រមព្រៀងដើម្បីបញ្ចៀសកុំឲ្យអង់គ្លេសដកខ្លួនចេញ
អស់រយៈពេលពីរថ្ងៃស្ទើរឥតមានឈប់សម្រាក ដែលក្រុមការងារក្រុមប្រឹក្សាអឺរ៉ុប បានចរចាគ្នាជាមួយនឹងរដ្ឋាភិបាលអង់គ្លេស ដើម្បីស្វែងរកកិច្ចព្រមព្រៀងថ្មីមួយ។ កិច្ចព្រមព្រៀងនេះ ជាការទាមទារចង់បានជាច្រើនចំណុចរបស់លោកដេវីដ ខាមឺរុន នាយករដ្ឋមន្ត្រីអង់គ្លេស ដើម្បីធានាឲ្យលោក អាចយកវាទៅបញ្ចុះបញ្ចូលប្រជាជនអង់គ្លេស កុំឲ្យបោះឆ្នោតប្រជាមតិ ដកអង់គ្លេសចេញពីសហភាពអឺរ៉ុប។ នៅយប់ថ្ងៃសុក្រ ស្ទើរតែកណ្តាលអាធ្រាត្រ ការប្រជុំបានបិទបញ្ចប់ ដោយភាគីទាំងសងខាង បានព្រមព្រៀងចុះហត្ថលេខា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៣
កិច្ចប្រជុំជាប់គ្នា សឹងតែអត់មានសម្រាក ទាំងថ្ងៃទាំងយប់បានបិទបញ្ចប់ទៅ កាលពីយប់ថ្ងៃសុក្រ ទី១៩កុម្ភៈ នៅម៉ោងប្រហែលជាជិត១១យប់ នៅទីក្រុងព្រុយសែល។ ដូចយើងដឹងហើយថា កម្មវត្ថុនៃការប្រជុំចរចាគ្នានេះ គឺដើម្បីសម្រេចកិច្ចព្រមព្រៀងមួយ ដែលខាងភាគីអង់គ្លេសទាមទារ។ អង់គ្លេសទាមទារ លក្ខខណ្ឌជាច្រើន ព្រោះថាមិនដូច្នោះទេ គេនឹងមិនបញ្ចុះបញ្ចូលប្រជាជនគេ ឲ្យបោះឆ្នោតដកអង់គ្លេសចេញពីសហភាពអឺរ៉ុបទេ។ ព្រោះតែសហភាពអឺរ៉ុប មិនចង់ឃើញអង់គ្លេសដើរចេញ ពីអឺរ៉ុប តាមរយៈការបោះឆ្នោតប្រជាមតិ ទើបគេចាត់ឲ្យមានការចរចានេះដើម្បីធ្វើតាមលក្ខខណ្ឌរបស់អង់គ្លេស។
ពីរចំណុចធំៗ ដើម្បីឲ្យអង់គ្លេសអស់ចិត្ត៖
ទីបំផុត ការព្រមព្រៀងគ្នាបានសម្រេចជាលទ្ធផលមែន ដោយក្រុមប្រឹក្សាអឺរ៉ុប បានព្រមធ្វើសម្បទានជាច្រើន ទៅតាមការចង់បានរបស់លោក ដេវីដ ខាមឺរុន។ ចំណុចសំខាន់ៗ មានពីរ៖
១- ទីមួយគឺ ទាក់ទងទៅនឹងកម្មវិធីគ្រប់គ្រងប្រព័ន្ធហិរញ្ញវត្ថុ និងធនាគាររបស់អង់គ្លេស។ សហភាពអឺរ៉ុប បានសុខចិត្តផ្តល់សិទ្ធិអំណាចស្ទើរតែទាំងស្រុងទៅឲ្យរដ្ឋាភិបាលអង់គ្លេសជាអ្នកគ្រប់គ្រង។ ក៏ប៉ុន្តែគោលការណ៍គ្រឹះ កម្មវត្ថុហិរញ្ញវត្ថុធំៗ របស់សហភាពអឺរ៉ុប ដែលត្រូវអនុវត្តទូទាំងអឺរ៉ុប គឺអង់គ្លេសត្រូវតែគោរពដដែល។
២- ទីពីរ គឺទាក់ទងទៅនឹងសិទ្ធិ ទទួលបានជំនួយហិរញ្ញវត្ថុសង្គម របស់ជនអន្តោប្រវេសន៍ មកពីបណ្តាប្រទេសសមាជិកសហភាពអឺរ៉ុប ផ្សេងទៀត ដែលធ្វើការនិងរស់នៅលើដីអង់គ្លេស។ ចំណុចនេះ គឺអង់គ្លេសបានទាមទារថា អ្នកដែលទើបតែមកធ្វើការ និងរស់នៅអង់គ្លេស ក្រោមមិនទាន់គ្រប់៤ឆ្នាំ មិនអាចទទួលបានជំនួយថវិការនេះបានទេ។ ហើយចាប់ពីឆ្នាំ ២០២០ទៅ ក្រុមគ្រួសារជនអន្តោប្រវេសន៍អឺរ៉ុបណា ដែលរស់នៅលើដីអង់គ្លេស ក៏ប៉ុន្តែមានកូនរស់នៅប្រទេសផ្សេងក្រៅពីអង់គ្លេស គឺរដ្ឋាភិបាលអង់គ្លេស នឹងកាត់បន្ថយជំនួយហិរញ្ញវត្ថុសង្គមនេះ ផងដែរ។
បន្ទាប់ពីនេះទៅ លោក ដេវីដ ខាមឺរុន បានសន្យាថា នឹងធ្វើគ្រប់យ៉ាងដើម្បីបញ្ចុះបញ្ចូលប្រជាជនអង់គ្លេស កុំឲ្យបោះឆ្នោតដកអង់គ្លេសចេញពីសហភាពអឺរ៉ុបអី។ សម្បទានរបស់អឺរ៉ុបនាពេលនេះ គឺដើម្បីបំពេញចិត្តលោកដេវីដ ខាមឺរុន ដើម្បីឲ្យគាត់យកវាទៅធានាប្រជាជនអង់គ្លេស ថាបើអង់គ្លេសបន្តនៅក្នុងសហភាពអឺរ៉ុបទៀត ក៏វាមិនខាតអីដែរ ព្រោះអង់គ្លេសបានទាមទារលក្ខខណ្ឌច្រើនណាស់។
អង់គ្លេស៖ សមាជិកអឺរ៉ុបពិសេសជាងគេ រឺសមាជិកអត្មានិយមជាងគេ?
លោក ដេវីដ ខាមឺរុន បានប្រកាសក្រោយកិច្ចប្រជុំថា អង់គ្លេសជាសមាជិកអឺរ៉ុបមែន តែជាសមាជិកពិសេសជាងគេ ព្រោះមានលក្ខខន្តិកៈពិសេសដើម្បីការពារ មិនឲ្យទៅប្រឡាក់ប្រឡូស ជាមួយបញ្ហារបស់សហភាពអឺរ៉ុបទេ។ បញ្ហា រឺជំងឺរបស់អឺរ៉ុប ដែលលោកខាមឺរុនសំដៅនោះ គឺបញ្ហាព្រំដែន សន្ធិសញ្ញាចរាចរណ៍សេរីឆិនហ្គិន និងការចាយលុយរួម គឺលុយអឺរ៉ូនេះឯង។ តាំងពីដើមមក អង់គ្លេសព្រមធ្វើសមាជិកអឺរ៉ុប តែមិនព្រមចុះហត្ថលេខា លើសន្ធិសញ្ញាឆិនហ្គិន និងមិនព្រមចាយលុយអឺរ៉ូដូចគេទេ។ ឥឡូវពេលនេះ អង់គ្លេសទទួលបានសម្បទានផ្សេងបន្ថែមទៀត ពីអឺរ៉ុប។
ចេញរឺមិនចេញ ប្រជាជនអង់គ្លេសជាអ្នកសម្រេចចិត្ត៖
ប៉ុន្តែ អ្វីៗស្ថិតលើការសម្រេចចិត្តរបស់ប្រជាជនអង់គ្លេសខ្លួនឯង។ លោកដេវីដខាមឺរុន គ្រាន់តែបានសន្យាថា ពីនេះទៅ គាត់នឹងប្រឹងប្រែងឲ្យអស់ពីកម្លាំងកាយចិត្ត ដើម្បីឃោសនា ធ្វើយ៉ាងណាឲ្យប្រជាជនអង់គ្លេសបោះឆ្នោតបដិសេធ។ មានន័យថា បដិសេធមិនព្រមចេញពីសមាជិកភាពរបស់មហាគ្រួសារអឺរ៉ុប។ បើតាមការគ្រោងទុក ប្រជាមតិនេះ នឹងត្រូវរៀបចំនៅថ្ងៃទី ២៣ មិថុនាខាងមុខនេះហើយ។
យ៉ាងណាមិញ បើយោងតាមការស្ទាបស្ទង់ស្ថិតិ ធ្វើឡើងដោយ វិទ្យាស្ថាន TNSគឺថាសម្លេងឆ្នោតព្រមឲ្យអង់គ្លេសចេញពីអឺរ៉ុប មានប្រហែលជា៣៦% ឯសម្លេងឆ្នោតមិនព្រម គឺមាន៣៤% ពោលគឺលើសខ្វះគ្នាតែ២% ប៉ុណ្ណោះ។ ដូច្នេះ អ្វីៗនៅមិនប្រាដកទេ ។ សម្បទានប៉ុននេះរបស់អឺរ៉ុប អាចប្រហែលជាមិនអាចធ្វើឲ្យប្រជាជនអង់គ្លេសស្កប់ស្កល់ទេ។
ខ្លាចក្រែងសមាជិកដទៃយកគំរូតាមអង់គ្លេស៖
អឺរ៉ុបធ្វើសម្បទាននាពេលនេះ ដើម្បីកុំឲ្យបែកខ្ញែកគ្នា។ ក៏ប៉ុន្តែមិនមែនមានន័យថា អឺរ៉ុបថ្នមចិត្តអង់គ្លេសជ្រុលពេកទេ។ សម្បទាននៅពេលនេះ វាមិនប៉ះពាល់ធ្ងន់ធ្ងរដល់គោលការណ៍គ្រឹះរបស់មហាគ្រួសារអឺរ៉ុបទេ។ ក៏ប៉ុន្តែអ្វីដែលគេបារម្ភ គឺខ្លាចប្រទេសផ្សេងទៀត យកគម្រូតាមអង់គ្លេស មកទាមទារតាមចិត្តដែរ។ ជាក់ស្តែងថ្នាក់ដឹកនាំដាណឺម៉ាក បានប្រកាសដែរថា គំនិតកាត់បន្ថយជំនួយហិរញ្ញវត្ថុគ្រួសារ ដែលត្រូវផ្តល់ទៅឲ្យគ្រួសារជនអន្តោប្រវេសន៍មកពីប្រទេសសមាជិកអឺរ៉ុប វាជាគំនិតល្អគួរយកគម្រូតាមដែរ។ ថ្នាក់ដឹកនាំប៉ូឡូញ និងប្រទេសអឺរ៉ុបខាងកើតផ្សេងទៀត បានគម្រាមថា លក្ខខណ្ឌនេះ មិនត្រូវពង្រីកទៅអនុវត្តតាមប្រទេសផ្សេងទៀតទេ។
សហភាពអឺរ៉ុប៖ គ្រួសារដែលកូនចៅនិយាយមិនស្តាប់គ្នា
បើទោះបីជាកិច្ចព្រមព្រៀងជាមួយអង់គ្លេសនាពេលនេះ អាចផ្តល់ក្តីសង្ឃឹមបន្តិចក៏ដោយ សម្រាប់វាសនាមហាគ្រួសារអឺរ៉ុប ក៏ប៉ុន្តែវាបង្ហាញឲ្យកាន់តែច្បាស់ អំពីបញ្ហាស៊ីជំរៅ ជម្ងឺរបស់សហភាពអឺរ៉ុប ដែលកាន់តែបែកខ្ញែកគ្នា។ ធម្មតាទេ កាលណាមានការលំបាក ម្នាក់ៗដំឡើងសរសៃក ចចេសចង់យកតែរួចខ្លួន។ ដូចក្នុងករណីអង់គ្លេសពេលនេះ ដែលគម្រាមដើរចេញ បើគេមិនព្រមធ្វើសម្បទាន។ សុភាសិតខ្មែរថា ឆ្អិនក្បាលស៊ីក្បាល ឆ្អិនកន្ទុយស៊ីកន្ទុយគឺមិនខុសទេ។ ពេលមានទុកលំបាក ប្រលះយកតែរួចខ្លួន គ្មានការសាមគ្គីជាមួយសមាជិកដ៏ទៃ ជាក់ស្តែងទាក់ទិននឹងវិបត្តិជនភៀសខ្លួននេះឯង។
លោកប្រធានាធិបតីបារាំងវិញ បានថ្លែងថា អឺរ៉ុបមិនមែនជាកន្លែងអនាធិតេយ្យ អាចចូលមកយកនេះយកនោះ តាមតែចិត្តនឹកឃើញទេ។ បើម្នាក់ៗ ចេះតែទាមទារនេះ ទាមទារនោះតាមតែចិត្តនឹកឃើញ គឺថាអឺរ៉ុបពិតជារលាយមិនខាន។ អឺរ៉ុបនឹងលែងជាមហាគ្រួសារតែមួយហើយ គឺអឺរ៉ុបនឹងក្លាយជាគ្រួសារដែលកូនចៅឈ្លោះប្រកែកច្រណែនគ្នា ទៅវិញទៅមក។
នៅមានបញ្ហាច្រើនណាស់ ដែលអឺរ៉ុប ត្រូវដោះស្រាយបន្ទាន់។ លោក ហ្សង់ក្លូដ ជុងហ្គើ ប្រធានក្រុមប្រឹក្សាអឺរ៉ុប បានថ្លែងថា អឺរ៉ុបហត់នឿយណាស់ តែអឺរ៉ុប នឹងតស៊ូ ដោះស្រាយបញ្ហា។ នៅខែមីនាខាងមុខនេះ កិច្ចប្រជុំកំពូលស្តីពីបញ្ហាជនភៀសខ្លួន និងរៀបចំឡើង រវាងអឺរ៉ុប និងតួកគី។ ហើយ បន្ទាប់មកទៀតនិងមានជំនួបកំពូលស្តីពីវាសនាអនាគត តំបន់ចរាចរណ៍សេរីឆិនហ្គិន ដែលកំពុងតែចោទជាបញ្ហាដោយសារតែវិបត្តិជនភៀសខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ