ការជំនុំជម្រះលើសំណុំរឿងដកតំណែងលោកត្រាំ នឹងចាប់បើកនៅ២១មករា
រដ្ឋសភាអាមេរិកបានបញ្ជូន ជាផ្លូវការ បទចោទប្រកាន់លើរូបលោកប្រធានាធិបតី ដូណាល់ ត្រាំ ទៅដល់ព្រឹទ្ធសភាហើយនៅថ្ងៃពុធទី ១៥មករានេះ។ ការជំនុំជម្រះលើការដកតំណែងប្រធានាធិបតី នឹងត្រូវចាប់ផ្តើមនៅថ្ងៃអង្គារសប្តាហ៍ក្រោយ។ នេះជាលើកទីបី ក្នុងប្រវត្តិសាស្ត្រអាមេរិកដែលប្រធានាធិបតីត្រូវប្រឈមនឹងករណីបទចោទប្រកាន់ដកតំណែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ប្រធានព្រឹទ្ធសភាអាមេរិក ដែលជាអ្នកសាធារណរដ្ឋ នឹងទទួលស្វាគមន៍ភាគីរដ្ឋអាជ្ញាតំណាងដោយសមាជិកសភាបក្សប្រជាធិបតេយ្យ៧រូប ដើម្បីបង្ហាញបទចោទប្រកាន់ជាផ្លូវការទៅអង្គព្រឹទ្ធសភា។ ចំណែកប្រមុខតុលាការកំពូលដែលទទួលបន្ទុក ជំនុំជម្រះសំណុំរឿងដកតំណែងប្រធានាធិបតី នឹងត្រូវរៀបចំពិធីឱ្យសមាជិកព្រឹទ្ធសភាទាំងអស់ស្បថថា មិនលម្អៀង។
ដំណើរការជំនុំជម្រះ នឹងចាប់ផ្តើមនៅថ្ងៃអង្គារទី ២១មករា២០២០។ ក្នុងអំឡុងពេលនោះ សមាជិកព្រឹទ្ធសភាត្រូវស្តាប់អង្គជំនុំជម្រះ ដោយមិនអាចចាកចេញពីបន្ទប់ និងត្រូវស្ថិតក្នុងសភាពស្ងប់ស្ងាត់។ បើមានសំណួរ សមាជិកព្រឹទ្ធសភារូបនោះអាចសួរ តាមរយៈសំណេរជាលាយលក្ខណ៍អក្សរ ដែលបន្ទាប់មក ប្រធានព្រឹទ្ធសភានឹងអានឮៗទៅអង្គជំនុំជម្រះ។
សូមបញ្ជាក់ថាកាលពីថ្ងៃទី ១៨ ធ្នូ សភាអាមេរិកបានបោះឆ្នោតអនុម័ត បទចោទប្រកាន់ដើម្បីដកតំណែងលោកប្រធានាធិបតីអាមេរិក។ លោក ដូណល់ ត្រាំ រងបទចោទប្រកាន់ពីរករណី ៖ ទីមួយ គឺ បទរំលោភអំណាច ក្នុងនាមជាប្រធានាធិបតី ដោយលោកបានដាក់សម្ពាលើអ៊ុយក្រែន ឱ្យស៊ើបលោកចូ បៃឌិន នៃបក្សប្រជាធិបតេយ្យ ដែលអាចនឹងក្លាយជាគូប្រជែងដ៏មានសក្តានុពលរបស់លោក ក្នុងការបោះឆ្នោតនាឆ្នាំ ២០២០ និងបទរារាំងដល់ដំណើរការស៊ើបអង្កេតរបស់សភា ដោយលោកបានបដិសេធមិនសហការជាមួយសភា និងហាមមិនឲ្យជំនួយការសំខាន់ៗ របស់លោកចូលខ្លួនបកស្រាយ ឬនិយាយអ្វីជុំវិញសំណុំរឿងនេះ។
បើតាមអ្នកទទួលខុសត្រូវជាន់ខ្ពស់ក្នុងរដ្ឋបាលលោកដូណាល់ត្រាំ ដំណើរការជំនុំជម្រះនេះអាចប្រើពេល មិនលើសពីពីរសប្តាហ៍ទេ ដើម្បីទុកឱកាសឱ្យលោកដូណាល់ ត្រាំ ផ្តុំកម្លាំងតែលើការឃោសនាបោះឆ្នោតប្រធានាធិបតីអាណត្តិថ្មី។ នេះជាលើកទីបីហើយក្នុងប្រវត្តិសាស្ត្រអាមេរិកដែលប្រធានាធិបតីរងបទចោទប្រកាន់ដកតំណែងដូច្នេះ។ ប៉ុន្តែលើកនេះក៏ ដូចលើកមុន ដំណើរការទម្លាក់លោកត្រាំ ទំនងមិនអាចសម្រេចទៅកើតទេ ព្រោះព្រឹទ្ធសភាមានសមាជិកភាគច្រើនជាអ្នកសាធារណរដ្ឋ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ