WhatsApp ព្យាយាមទប់ស្កាត់ការផ្សព្វផ្សាយព័ត៌មានមិនពិតទាក់ទងវីរុសកូវីដ១៩
ស្របពេលដែលវីរុសកូវីដ១៩ កំពុងឆ្លងរាតត្បាតយ៉ាងខ្លាំងនៅក្នុងសកលលោក ព័ត៌មានមិនពិតទាក់ទងនឹងវីរុសនេះ ក៏កំពុងរាតត្បាតខ្លាំងដូចគ្នាដែរ ជាពិសេសតាមរយៈ WhatsApp ដែលជាកម្មវិធីមួយរបស់ហ្វេសប៊ុក។ ដោយមើលឃើញអំពីហានិភ័យ ដែលកម្មវិធីផ្ញើសារមួយរបស់ខ្លួន ត្រូវគេប្រើប្រាស់ដើម្បីផ្សព្វផ្សាយព័ត៌មានមិនពិត ក្រុមហ៊ុនហ្វេសប៊ុក បានដាក់ចេញនូវវិធានការជាពិសេសភ្លាមៗ ដើម្បីប្រយុទ្ធប្រឆាំងនឹងចលនាផ្សព្វផ្សាយព័ត៌មានមិនពិតទាំងនោះ។
ចុះផ្សាយនៅថ្ងៃ៖
វិធានការ ដែលក្រុមហ៊ុនហ្វេសប៊ុកដាក់ចេញនោះគឺ ការដាក់ឲ្យដំណើរការនូវមជ្ឈមណ្ឌលព័ត៌មានថ្មី ដែលអ្នកប្រើប្រាស់ អាចទទួលបានព័ត៌មានពិត និងលឿនរហ័ស ស្តីអំពីជំងឺកូវីដ១៩។
មជ្ឈមណ្ឌលព័ត៌មានខាងលើ បង្កើតឡើងដោយមានកិច្ចសហការពីអង្គការសុខភាពជាច្រើន ក្នុងគោលដៅផ្តល់ជូននូវវិធីស្វែងរកព័ត៌មានដែលអាចជឿទុកចិត្តបាន និងវិធីបញ្ឈប់ការផ្សព្វផ្សាយព័ត៌មានមិនពិតជាដើម។ល។ កាលពីថ្ងៃពុធ មជ្ឈមណ្ឌលព័ត៌មាននេះ បានដាក់ឲ្យដំណើរការហើយនៅក្នុងប្រទេសអាមេរិក និងអឺរ៉ុប និងគ្រោងនឹងពង្រីកទៅកាន់ទីតាំងផ្សេងៗទៀតនាពេលខាងមុខ។
ក្រុមហ៊ុនហ្វេសប៊ុក បានឲ្យដឹងកាលពីថ្ងៃពុធ ទី១៨ មីនាដែរថា ខ្លួន បានបង្កើនសមត្ថភាពម៉ាស៊ីនមេសម្រាប់ WhatsApp ចំនួនទ្វេដង ដើម្បីជួយសម្រួលដល់ការធ្វើទំនាក់ទំនងនានាដែលមាននៅក្នុងកម្មវិធី។
ក្រៅពីនេះ ហ្វេសប៊ុក ក៏បានបរិច្ចាគទឹកប្រាក់ចំនួន ១ លានដុល្លារផងដែរ ដល់បណ្តាញត្រួតពិនិត្យព័ត៌មានអន្តរជាតិ ដើម្បីបង្កើនចំនួនអ្នកតាមដានព័ត៌មាន និងដើម្បីការពារកុំឲ្យមានការផ្សព្វផ្សាយព័ត៌មានក្លែងក្លាយបន្តទៀត នៅលើកម្មវិធី WhatsApp។ នេះ គឺជាការ បញ្ជាក់ប្រាប់ពីប្រធានទទួលបន្ទុកផ្នែកសុខភាពរបស់ហ្វេសប៊ុក លោកកាំងស៊ីង ជិន (Kang-Xing Jin)។
ពាក់ព័ន្ធរឿងនេះដែរ នាយកប្រតិបត្តិហ្វេសប៊ុក លោកម៉ាក ហ្សាក់ឃឺបឺក បានមាន ប្រសាសន៍ថា គោលដៅរបស់ក្រុមហ៊ុនលោក គឺធ្វើយ៉ាងណានាំមកនូវព័ត៌មានដែលគួរឲ្យជឿទុកបាន ជូនអតិថិនរបស់ខ្លួន។
ជាមួយគ្នានេះ នាយកប្រតិបត្តិរូបនេះ បានលើកឡើងដែរថា ក្រុមការងាររបស់លោក ខិតខំធ្វើការខ្លាំងណាស់ដើម្បីធ្វើឱ្យប្រាកដថា សេវាកម្មទាំងអស់របស់ក្រុមហ៊ុន ដំណើរការទៅដោយរលូន ពីព្រោះថា នេះ គឺជាកាលៈទេសៈដែលមនុស្សចង់ភ្ជាប់ទំនាក់ទំនងនឹងគ្នា។
គួរកត់សម្គាល់ថា នៅមួយរយៈចុងក្រោយនេះ ការផ្សព្វផ្សាយព័ត៌មានមិនពិត ស្តីអំពី វីរុសកូវីដ១៩ តាមរយៈកម្មវិធីWhatsApp កាន់តែរីករាលខ្លាំងគួរឲ្យបារម្ភ។ ឧទាហរណ៍ជាក់ស្តែងរួមមានពាក្យចចាមអារ៉ាមដែលថា គេអាចធ្វើតេស្តរកជំងឺកូវីដ១៩ ដោយខ្លួនឯង តាមរយៈ ការអត់ដង្ហើម ១០ ឬ ១៥វិនាទី ឬក៏ការលើកឡើងថា បរិភោគទឹកក្តៅញឹកញាប់ អាចជួយបង្ការការឆ្លងកូវីដ១៩បាន ជាដើម។ ទាំងនេះ សុទ្ធសឹងជាព័ត៌មានដែលត្រូវបានអ្នកជំនាញ ក្នុងនោះរួមមានទាំងអង្គសុខភាពពិភពលោកផង បានបដិសេធថាជារឿងមិនពិត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ