កូវីដ១៩- លោក ត្រាំ ផ្អាកជាបណ្តោះអាសន្ន ការផ្តល់បណ្ណស្នាក់នៅអចិន្ត្រៃយ៍ ដល់ជនបរទេស
អន្តោប្រវេសន៍ មិនអាចផ្តាច់បានពីកម្មវិធីនយោបាយរបស់លោកត្រាំបានទេ។ ដើម្បីប្រយុទ្ធប្រឆាំងនឹងភាពអត់ការងារធ្វើរបស់ប្រជាពលរដ្ឋអាមេរិក ដែលបង្កឡើងដោយវិបត្តិកូវីដ១៩ ប្រធានាធិបតីអាមេរិក លោក ដូណាល់ ត្រាំ បានប្រកាសនៅល្ងាចថ្ងៃអង្គារទី ២១មេសាម្សិលមិញ ផ្អាកទទួលអន្តោប្រវេសន៍ស្របច្បាប់ មួយរយៈសិន។ សហរដ្ឋអាមេរិកនឹងព្យួរការផ្តល់បណ្ណស្នាក់នៅអចិន្ត្រៃយ៍ ឬហៅខ្លីថា កាតបៃតង Green Cards រយៈពេលយ៉ាងហោច៦០ថ្ងៃ។
ចុះផ្សាយនៅថ្ងៃ៖
ស្តាប់ - ០២:០៥
លោកប្រធានាធិបតីអាមេរិក បានបញ្ជាក់ថា នៅថ្ងៃពុធទី ២២មេសានេះ លោកនឹងចុះហត្ថលេខាលើក្រិត្យប្រធានាធិបតី ព្យួរការផ្តល់បណ្ណស្នាក់នៅអចិន្ត្រៃយ៍ ដល់ជនអន្តោប្រវេសន៍ស្របច្បាប់រស់នៅលើទឹកដីអាមេរិក រយៈពេល៦០ថ្ងៃ យ៉ាងតិច។ រយៈពេលព្យួរអាចនឹងត្រូវពន្យារប្រសិនបើសេដ្ឋកិច្ចជាតិមិនប្រសើរ។ ប៉ុន្តែសេចក្តីសម្រេចនេះមិនពាក់ព័ន្ធនឹងការផ្តល់ទិដ្ឋាការការងារបណ្តោះអាសន្នទេ។ តាំងពីផ្ទុះវិបត្តិកូវីដ១៩មក និងក្នុងរយៈពេលបិទខ្ទប់ប្រទេសតែមួយខែ មានពលរដ្ឋអាមេរិកជាង២២លាននាក់បន្ថែម បានក្លាយជាជនអត់ការងារធ្វើ។ ដូច្នេះ ដោយឈរលើទស្សនៈជួយពលរដ្ឋអាមេរិកឱ្យមានការងារធ្វើឡើងវិញមុនគេ នៅពេលបើកប្រទេសវិញ អាមេរិកត្រូវផ្អាកទទួលអន្តោប្រវេសន៍មួយរយៈសិន។ ទុកឱ្យពលរដ្ឋអាមេរិកបាត់បង់ការងារ ហើយទៅប្រើកម្លាំងអន្តោប្រវេសន៍មកពីបរទេស ជាកំហុសនិងជាទង្វើដ៏អយុត្តិធម៌។ នេះបើតាមប្រសាសន៍របស់លោកដូណាល់ ត្រាំ។
បើតាមតួលេខជាផ្លូវការ សហរដ្ឋអាមេរិកបានផ្តល់បណ្ណស្នាក់នៅអចិន្ត្រៃយ៍ដល់ជនបរទេសចំនួន ៥៧ម៉ឺន៧ពាន់នាក់ ទល់នឹងការផ្តល់ទិដ្ឋាការការងារបណ្តោះអាសន្នចំនួន ៤៧ម៉ឺន២ពាន់នាក់ នៅឆ្នាំ ២០១៩។ ជាការប្រៀបធៀប នៅឆ្នាំ២០១៦ អាមេរិកផ្តល់បណ្ណស្នាក់នៅអចិន្ត្រៃយ៍ដល់ទៅ៦១ម៉ឺន៧ពាន់នាក់។
អ្នកវិភាគ និងក្រុមអ្នកប្រជាធិបតេយ្យជាបក្សប្រឆាំងបាននាំគ្នាបរិហារសេចក្តីសម្រេចរបស់លោកដូណាល់ ត្រាំនេះ យ៉ាងខ្លាំងថា គ្រាន់តែជាការបង្វៀងចំណាប់អារម្មណ៍របស់ប្រជាពលរដ្ឋ ដើម្បីចំណេញនយោបាយ នៅចំពោះមុខបរាជ័យនៃចំណាត់ការប្រយុទ្ធប្រឆាំងនឹងការរាតត្បាតរបស់កូវីដ១៩តែប៉ុណ្ណោះ។ ការចេញក្រិត្យអាចនឹងនាំលោកប្រធានាធិបតីទៅប្រឈមនឹងតុលាការ។ នេះការព្រមានរបស់បក្សប្រឆាំង។
នៅ៦ខែទៀត សហរដ្ឋអាមេរិកត្រូវរៀបចំការបោះឆ្នោតប្រធានាធិបតីជាថ្មី។ លោក ដូណាល់ ត្រាំ ប្រកាសឈរឈ្មោះជាថ្មី ជាបេក្ខជនប្រធានាធិបតីសម្រាប់អាណត្តិទីពីរ និងរក្សាការកំរិតចំនួនអន្តោប្រវេសន៍ជាអាទិភាពមួយរបស់លោកជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ