Washington Post ៖ អាមេរិក ប្រុងបាញ់សាកល្បងអាវុធនុយក្លេអ៊ែរ ដើម្បីព្រមាន ចិន និងរុស្ស៊ី
អាមេរិក គិតប្រុងបាញ់សាកល្បងអាវុធនុយក្លេអ៊ែរ ដើម្បីព្រមានគំរាម ចិន និងរុស្ស៊ី។ នេះបើតាមការចុះផ្សាយរបស់សារព័ត៌មាន Washington Post នៅថ្ងៃសុក្រ ដែលបញ្ជាក់ទៀតថា នេះជាការសាកល្បងបាញ់អាវុធប្រល័យលោក ជាលើកទី១ ក្នុងរយៈកាល ជិត៣០ឆ្នាំចុងក្រោយនេះ។ ដំណឹងនេះ គឺធ្លាក់មក បន្ទាប់ពី ប្រធានាធិបតី ដូណាល់ ត្រាំ បានប្រកាសក្នុងសប្តាហ៍នេះ ដកខ្លួនសហរដ្ឋអាមេរិក ចេញពីកិច្ចព្រមព្រៀងអន្តរជាតិ Open Skies។
ចុះផ្សាយនៅថ្ងៃ៖
ស្តាប់ - ០៥:៣៦
សហរដ្ឋអាមេរិក បានគិតពិចារណាពីលទ្ធភាពនៃការសាកល្បងនុយក្លេអ៊ែរ នៅក្នុងពេលឆាប់ៗដ៏ខ្លីខាងមុខនេះ។ កាសែត Washington Post ផ្សាយដំណឹងយ៉ាងដូច្នេះ ដោយសំអាងទៅលើប្រភពមនុស្សបីនាក់ ស្នើមិនបញ្ចេញឈ្មោះ។ ពួកគេជាមន្ត្រីនិងអ្នកជំនាញការជាន់ខ្ពស់នៃរដ្ឋបាលរបស់លោកប្រធានាធិបតី ដូណាល់ ត្រាំ។ អត្ថបទចុះផ្សាយរបស់សារព័ត៌មាននេះ បានឱ្យដឹងថា សហរដ្ឋអាមេរិក យល់ឃើញថា រុស្ស៊ី និង ចិន សុទ្ធតែបានបាញ់សាកល្បងអាវុធប្រល័យលោក ខណៈដែលក្រុង ម៉ូស្កូ និង ប៉េកាំង សុទ្ធតែច្រាលទាត់ចោល ហើយក្រុង វ៉ាស៊ីនតោន ខ្លួនឯង ក៏មិនបានបង្ហាញភស្តុតាងនៃការចោទប្រកាន់នោះដែរ។
ក្នុងការផ្សាយនៃកាសែតដដែល, មន្ត្រីជាន់ខ្ពស់នៃរដ្ឋបាលរបស់លោក ដូណាល់ ត្រាំ ទម្លាយឱ្យដឹងថា មានកិច្ចប្រជុំពិភាក្សាគ្នាពីការចង់បាញ់សាកល្បងនុយក្លេអ៊ែរ ដោយចាត់ទុកថា មធ្យោបាយនេះ គឺជាយុទ្ធសាស្ត្រដ៏មានប្រសិទ្ធភាព ដើម្បីឱ្យ ចិន និង រុស្ស៊ី មកចូលតុចរចាគ្នា ជុំវិញបញ្ហាអាវុធបរមាណូប្រល័យលោក។
ចំពោះអ្នកវិភាគស្ថានការណ៍អន្តរជាតិ និងអ្នកស្រឡាញ់សន្តិភាព ការពិចារណារបស់រដ្ឋបាល ដូណាល់ ត្រាំ បែបនោះ គឺនាំមកនូវហានិភ័យ។ លោកស្រី Beatrice Fihn តំណាងអង្គការក្រៅរដ្ឋាភិបាល ដែលធ្វើយុទ្ធនាការលុបបំបាត់គ្រាប់បែកនុយក្លេអ៊ែរ និងដែលបានទទួលរង្វាន់ណូបែលសន្តិភាពឆ្នាំ២០១៧ផង បានក្រើនរម្លឹកថា ការសាកល្បងគ្រាប់បែកនុយក្លេអ៊ែរអាមេរិកាំង នឹងអាចនាំឱ្យពិភពលោកទាំងមូលធ្លាក់ទៅក្នុងសង្គ្រាមត្រជាក់ថ្មីមួយទៀត ហើយនិងនាំទៅរកការប្រកួតប្រណាំងប្រជែងសព្វាវុធ ថ្មី និងដ៏គ្រោះថ្នាក់ ជាទីបំផុត។
ជាការសម្គាល់ ក្នុងអាណត្តិដឹកនាំប្រធានាធិបតីរូបនេះ លោក ដូណាល់ ត្រាំ បានដកខ្លួនចេញពីកិច្ចព្រមព្រៀង ធំៗជាច្រើន ទាក់ទងអាវុធនិងសន្តិសុខ តួយ៉ាង ឆ្នាំ២០១៨ ដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់ ហើយឆ្នាំ២០១៩ ដកខ្លួនពីកិច្ចព្រមព្រៀងមីស៊ីលរយៈចម្ងាយមធ្យម។ ឆ្នាំ២០២០ ក្នុងសប្តាហ៍នេះតែម្តង គឺលោកប្រកាសដើរចេញពីកិច្ចព្រមព្រៀង Open Skies ដែលមានរុស្ស៊ី និង ប្រទេសជាង៣០ផ្សេងទៀត ភាគច្រើនជារដ្ឋសមាជិករបស់អង្គការអូរតង់។ គេបានដឹងថា ការដកខ្លួនរបស់សហរដ្ឋអាមេរិក គឺ លោក ត្រាំ ចង់ចរចារើសើកិច្ចព្រមព្រៀងថ្មី ស្តីពីការគ្រប់គ្រងអាវុធនុយក្លែអ៊ែរ ដោយមាន ភាគី ចិន ចូលរួមផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ