តុលាការអ៊ីរ៉ង់កាត់ទោស អ្នកស្រាវជ្រាវបារាំង ដើមកំណើតអ៊ីរ៉ង់ ឲ្យជាប់ពន្ធនាគារ ៥ឆ្នាំ
អ្នកស្រាវជ្រាវបារាំង ដើមកំណើតអ៊ីរ៉ង់ ម្នាក់ ត្រូវតុលាការអ៊ីរ៉ង់សម្រេចផ្តន្ទាទោស ឲ្យជាប់ពន្ធនាគារ ៥ឆ្នាំ ពីបទ គប់គិត ក្នុងបំណង បៀតបៀន សន្តិសុខជាតិអ៊ីរ៉ង់។ នេះបើតាមការអះអាងរបស់មេធាវី របស់អ្នកស្រាវជ្រាវបារាំង លោកស្រី ហ្វារីបា អាឌែលកា Fariba Adelkhah។ កំពុងជាប់ឃុំ ជិតមួយឆ្នាំ នៅទឹកដីអ៊ីរ៉ង់ ជាអ្នកជំនាញខាងសាសនាស្ហ៊ីអ៊ីដ លោកស្រី ហ្វារីបា អាឌែលកា នៅតែអះអាង ថា លោកស្រីស្អាតស្អំ មិនបានធ្វើដូចការចោទប្រកាន់របស់អាជ្ញាធរអ៊ីរ៉ង់នោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
មេធាវីរបស់លោកស្រី ហ្វារីបា អាឌែលកាបាននិយាយនៅថ្ងៃសៅរ៍នេះថា តុលាការបដិវត្តអ៊ីរ៉ង់ ទើបបានសម្រេចកាត់ទោស អ្នកស្រាវជ្រាវបារាំង លោកស្រី អាឌែលកា ឲ្យជាប់ពន្ធនាគារ ៥ឆ្នាំ ក្នុងបទចោទប្រកាន់ គប់គិត ដើម្បី បៀតបៀនសន្តិសុខជាតិអ៊ីរ៉ង់ និង១ឆ្នាំទៀត សម្រាប់ឃោសនាប្រឆាំងប្រព័ន្ធនយោបាយរបស់សាធារណរដ្ឋអ៊ីស្លាម។ ប៉ុន្តែ តាមមេធាវី លោកស្រី អាឌែលកានឹងអនុវត្តទោស ដែលមានរយៈវែងប៉ុណ្ណោះ គឺទោសជាប់ពន្ធនាគារ៥ឆ្នាំ។ តាមមេធាវី លោកស្រី ត្រូវចោទប្រកាន់ថា ឃោសនា ប្រឆាំងនយោបាយអ៊ីរ៉ង់ ព្រោះលោកស្រីបាននិយាយរិះគន់ការពាក់ទទូរក្រណាត់របស់ស្រ្តី នៅអ៊ីរ៉ង់។
រដ្ឋាភិបាលបារាំង តាមរយៈក្រសួងការបរទេស បានចេញសេចក្តីថ្លែងការណ៍កាលពីថ្ងៃសៅរ៍ ថ្កោលទោសសាលក្រមរបស់តុលាការអ៊ីរ៉ង់ ដែលរដ្ឋាភិបាលបារាំងចាត់ទុកថា មានលក្ខណៈនយោបាយ។ តាមក្រសួងការបរទេសបារាំង គេបានកាត់ទោស លោកស្រី ហ្វារីបា ដោយគ្មាន ឈរលើមូលដ្ឋានរឹងមាំ។ ដូច្នេ ភាគីបារាំងទាមទារឲ្យអ៊ីរ៉ង់ ដោះលែង ជាបន្ទាន់ អ្នកស្រាវជ្រាវបារាំងអ៊ីរ៉ង់។
មានសញ្ជាតិ បារាំង ដើមដំណើតអ៊ីរ៉ង់ លោកស្រី ហ្វារីបា អាឌែលកាជាអ្នកស្រាវជ្រាវ ជំនាញខាង សាសនាស្ហីអ៊ីត សម្រាប់មជ្ឈមណ្ឌលស្រាវជ្រាវអន្តរជាតិរបស់សកលវិទ្យាល័យវិទ្យាសាស្រ្តនយោបាយក្រុងប៉ារីស។ លោកស្រីត្រូវបានអាជ្ញាធរចាប់ខ្លួន នៅពេលលោកស្រី អញ្ជើញទៅធ្វើការនៅទឹកដីអ៊ីរ៉ង់ កាលពីខែមិថុនាឆ្នាំមុន។ លោកស្រី ត្រូវបានចាប់ខ្លួន ជាមួយ អ្នកស្រាវជ្រាវបារាំងម្នាក់ទៀត គឺលោក Roland Marchal ក្នុងបទចោទប្រកាន់ គប់គិត ក្នុងគំនិតបៀតបៀនសន្តិសុខជាតិអ៊ីរ៉ង់។
បន្ទាប់ពីកូដកម្មអត់អាហារ រយៈពេល៤១ថ្ងៃ របស់លោកស្រី ហ្វារីបា អាឌែលកា ក្រុមគាំទ្រលោកស្រី តាំងពីប៉ារីស បានទាមទារឲ្យអ៊ីរ៉ង់ ដោះលែង លោកស្រី ជាបន្ទាន់ ព្រោះថា លោកស្រី អាចប្រឈមនឹងការឆ្លងជំងឺកូវីដ នៅក្នុងពន្ធនាគារអ៊ីរ៉ង់។ មេធាវីវិញនិយាយថា ដោយសារកូដកម្មអត់អាហារ ដើម្បីប្រឆាំងនឹងការចាប់ឃុំខ្លួន លោកស្រី ដោយអយុត្តិធម៌ លោកស្រីអាឌែលកា កំពុងមានបញ្ហា ជំងឺតម្រង់នោម ក្នុងពន្ធនាគារអ៊ីរ៉ង់។
នៅក្រោយការតវ៉ារបស់ក្រសួងការបរទេសបារាំង ដែលទាមទារឲ្យអ៊ីរ៉ង់ ដោះលែងអ្នកស្រាវជ្រាវបារាំងទាំង២រូប ក្រុងតេហេរ៉ង់ នៅទីបំផុត បានដោះលែង តែអ្នកស្រាវជ្រាវបារាំង ម្នាក់ប៉ុណ្ណោះ គឺលោក Roland Marchal កាលពីចុងខែមីនាកន្លងទៅ។ នៅក្នុងរឿងដោះលែង អ្នកស្រាវជ្រាវបារាំង អាជ្ញាធរអ៊ីរ៉ង់បានលើកឡើងពីការដោះដូរអ្នកទោស ជាតិអ៊ីរ៉ង់ដែលកំពុងជាប់ឃុំនៅបារាំង និងដែលកំពុងប្រឈមនឹងការធ្វើបត្យាប័នទៅអាមេរិក។
អ៊ីរ៉ង់ ដែលមិនទទួលសញ្ជាតិពីរ នៅបន្តឃុំខ្លួន លោកស្រី ហ្វារីបា អាឌែលកា មុននឹងសម្រេចកាត់ទោស ឲ្យជាប់ពន្ធនាគារ ៥ឆ្នាំ នៅពេលនេះ។
សូមបញ្ជាក់ថា ចាប់តាំងពីមានបញ្ហាជាមួយ អាមេរិក ដែលដកខ្លួន ចេញពីកិច្ចព្រមព្រៀង នុយក្លេអ៊ែរអ៊ីរ៉ង់ និងត្រលប់ទៅដាក់ទណ្ឌកម្មសេដ្ឋកិច្ចសាជាថ្មី លើអ៊ីរ៉ង់ កាលពីឆ្នាំ ២០១៨ អ៊ីរ៉ង់បានបង្កើនការចាប់ឃាត់ខ្លួនជនបរទេស ជាពិសេស ជនជាតិអ៊ីរ៉ង់ ដែលមានសញ្ជាតិពីរ។ ពួកគេទាំងនោះ ភាគច្រើន ត្រូវចោទប្រកាន់ពី បទលួចយកការណ៍សម្ងាត់អ៊ីរ៉ង់។ នៅប៉ុន្មានខែនេះ គេឧស្សាហ៍ឃើញអ៊ីរ៉ង់ ដោះលែងអ្នកទោស ជាការដោះដូរនឹងជនជាតិរបស់ខ្លួនដែលកំពុងជាប់ពន្ធនាគារនៅបរទេស ឬដែលកំពុងប្រឈមនឹងការចាប់បញ្ជូន ធ្វើបត្យាប័នទៅអាមេរិក ដែលជាសត្រូវរបស់អ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ