អ៊ីរ៉ង់អំពាវនាវឱ្យអង់គ្លេស បារាំង ចិននិងរុស្ស៊ី កុំតាមអាមេរិករឿងបន្តទណ្ឌកម្មអាវុធ
នៅថ្ងៃពុធទី ១០ មិថុនានេះ ក្រុងតេហេរ៉ង់ បានអំពាវនាវសុំឱ្យប្រទេសជាសមាជិកអចិន្ត្រៃយ៍ក្នុងក្រុមប្រឹក្សាសន្តិសុខអង្គការសហប្រជាជាតិ ចិន បារាំង អង់គ្លេស និងរុស្ស៊ី ផ្ចាញ់គម្រោងរបស់សហរដ្ឋអាមេរិក ដែលចង់បន្តការទណ្ឌកម្មអាវុធលើអ៊ីរ៉ង់។ ទណ្ឌកម្មអង្គការសហប្រជាជាតិដែលតាមធម្មតា នឹងត្រូវអស់សុពលភាពនៅថ្ងៃទី ១៣ខែតុលាខាងមុខ។
ចុះផ្សាយនៅថ្ងៃ៖
ស្តាប់ - ០២:១២
“បើតាមសេចក្តីសម្រេចចិត្តក្រុមប្រឹក្សាសន្តិសុខអង្គការសហប្រជាជាតិលេខ ២២៣១ អ៊ីរ៉ង់នឹងត្រូវរួចផុតពីទណ្ឌកម្មអាវុធទាំងអស់ នៅខែតុលា។ ប៉ុន្តែសហរដ្ឋអាមេរិក កំហូចកំពុងរកវិធីដាក់ទណ្ឌកម្មលើអ៊ីរ៉ង់បន្តទៀត។” នេះបើតាមការគូសបញ្ជាក់របស់លោក រ៉ូហានី ប្រធានាធិបតីអ៊ីរ៉ង់។ សហរដ្ឋអាមេរិកបានអះអាងកាលពីសប្តាហ៍មុន ថាបានបង្ហើបគម្រោងសេចក្តីសម្រេចចិត្តថ្មីទៅរុស្ស៊ីសំដៅបន្តដាក់ទណ្ឌកម្មលើប្រព័ន្ធសព្វាវុធអ៊ីរ៉ង់ទៀត។
“យើងសង្ឃឹមថា សមាជិកអចិន្ត្រៃយ៍ក្រុមប្រឹក្សាសន្តិសុខទាំងបួនផ្សេងទៀតអាចផ្ចាញ់ផែនការប្រឆាំងនឹងប្រយោជន៍ភពផែនដីនិងស្ថិរភាពពិភពលោក របស់សហរដ្ឋអាមេរិកបាន តាមរយៈការប្រើសិទ្ធវេតូប្រឆាំង” នេះជាប្រសាសន៍របស់លោក រ៉ូហានី ប្រធានាធិបតីអ៊ីរ៉ង់នៅក្នុងសន្ទរកថាតាមកញ្ចក់ទូរទស្សន៍ ដោយអះអាងទៀតថា “អ៊ីរ៉ង់អាចសង្ឃឹមជាពិសេសទៅលើប្រទេសពីរជាមិត្ត គឺ ចិន និងរុស្ស៊ី”។ ម៉ូស្គូ បានប្រាប់ជំហររួចហើយថាមិនគាំទ្រការពន្យារពេលដាក់ទណ្ឌកម្មទៀតទេ។ ក្រុមហ៊ុនរុស្ស៊ីជាច្រើន ទំនងកំពុងចាប់ផ្តើមរៀបចំគម្រោងលក់អាវុធយុទ្ធភ័ណ្ឌទៅឱ្យតេហេរ៉ង់ទៅហើយផង។
សូមបញ្ជាក់ថា សមាជិកអចិន្ត្រៃយ៍ទាំង៥របស់ក្រុមប្រឹក្សាសន្តិសុខអង្គការសហប្រជាជាតិបូកនិងអាល្លឺម៉ង់ បានចុះកិច្ចព្រមព្រៀងនុយក្លេអ៊ែរជាមួយនឹងសាធារណរដ្ឋអ៊ីស្លាមអ៊ីរ៉ង់នៅឆ្នាំ២០១៥។ កិច្ចព្រមព្រៀងត្រូវរង្គោះរង្គើយ៉ាងខ្លាំង ក្រោយពីប៉ុន្តែ សហរដ្ឋអាមេរិកបានសម្រេចជាឯកតោភាគីដកខ្លួនចេញនៅឆ្នាំ២០១៨ ពីកិច្ចព្រមព្រៀងនេះ។ ដើម្បីសងសឹកនឹងទណ្ឌកម្មសេដ្ឋកិច្ចអាមេរិក តាំងពីខែឧសភា២០១៩មក អ៊ីរ៉ង់ក៏បានរំលោភកិច្ចព្រមព្រៀងជាច្រើនចំណុច។
តាមរយៈកិច្ចព្រមព្រៀងជាប្រវត្តិសាស្ត្រ និងក្នុងក្របខ័ណ្ឌនៃសេចក្តីសម្រេចចិត្តក្រុមប្រឹក្សាសន្តិសុខអង្គការសហប្រជាជាតិ ទណ្ឌកម្មខ្លះត្រូវបានលើកចេញពី អ៊ីរ៉ង់ និងជាបន្តបន្ទាប់ ជាថ្នូរនឹងការធានាមិនអភិវឌ្ឍកម្មវិធីនុយក្លេអ៊ែរយោធា។ ទណ្ឌកម្មហាមឃាត់ការលក់អាវុធយុទ្ធភ័ណ្ឌធុនធ្ងន់ ដូចជាការលក់យន្តហោះចម្បាំង នាវាសង្គ្រាម ឬប្រព័ន្ធមីស៊ីលជាដើម នឹងត្រូវអស់សុពលភាពចាប់ពីថ្ងៃទី១៣តុលា២០២០ទៅ។ តែបើតាមសេចក្តីសម្រេចចិត្តអង្គការសហប្រជាជាតិដដែល អ៊ីរ៉ង់ត្រូវបន្តជាប់ទណ្ឌកម្មទាក់ទងនឹងការផ្ទេរឬលក់បច្ចេកវិទ្យាបរិក្ខាសម្រាប់កម្មវិធីបាលីស្ទិក ព្រមទាំងទណ្ឌកម្មអាវុធមួយទៀត ដែលដាក់ដោយសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ