អឺរ៉ុបខកចិត្តចំពោះអាមេរិកដែលបញ្ឈប់ក្តីអនុគ្រោះផ្នែកថាមពលនុយក្លេអ៊ែរស៊ីវិលអ៊ីរ៉ង់
ប្រទេសអឺរ៉ុប បានសម្តែងសេចក្តីសោកស្តាយជាខ្លាំង ចំពោះការសម្រេចចិត្តរបស់សហរដ្ឋអាមេរិក ដែលបានបញ្ឈប់ការលើកលែងអនុគ្រោះចំពោះក្រុមហ៊ុនបរទេស ធ្វើការផ្នែកថាមពលនុយក្លេអ៊ែរ ស៊ីវិល នៅអ៊ីរ៉ង់។ រដ្ឋបាលក្រុង ប៉ារីស ឡុងឌ្រឺ និងប៊ែរឡាំង បានប្រតិកម្មខកចិត្ត នៅថ្ងៃសៅរ៍ បន្ទាប់ពី រដ្ឋមន្ត្រីការបរទេសសហភាពអឺរ៉ុប សម្តែងក្តីសោកស្តាយដូចគ្នាដែរ កាលពីថ្ងៃព្រហស្បតិ៍។ ពួកគេខកចិត្តចំពោះការបញ្ចប់ក្តីលើកលែងរបស់អាមេរិក ក្នុងសំណុំរឿងនុយក្លេអ៊ែរស៊ីវិលអ៊ីរង់។ ការសម្រេចចិត្តដូច្នេះ របស់អាមេរិក គឺហាក់ដូចជាដកខ្លួនចេញដាច់មែនទែនតែម្តង ពីកិច្ចព្រមព្រៀងនុយក្លេអ៊ែរអ៊ីរ៉ង់។
ចុះផ្សាយនៅថ្ងៃ៖
ស្តាប់ - ០២:៣២
អាមេរិក នៅថ្ងៃពុធ បញ្ជាក់ពីការបញ្ឈប់ក្តីលើកលែងអនុគ្រោះដកក្រុមហ៊ុនបរទេសទាំងអស់ ដែលធ្វើការនៅការដ្ឋានមជ្ឈមណ្ឌលនុយក្លេអ៊ែរស៊ីវិល មួយចំនួន នៅអ៊ីរ៉ង់ បើទោះបីជាក្រុមហ៊ុនរបស់បារាំង អង់គ្លេស អាល្លឺម៉ង់ រុស្ស៊ី ចិន ក៏ដោយក្តី។ ការសម្រេចនេះ នឹងចាប់ផ្តើមមានសុពលភាពអនុវត្ត នៅរយៈពេល៦០ថ្ងៃទៀត។
តាមសេចក្តីថ្លែងការណ៍រួម ប្រទេសបារាំង អង់គ្លេស អាល្លឺម៉ង់ យល់ថា ការបើកផ្លូវអនុគ្រោះដល់ក្រុមបរទេសធ្វើការក្នុងវិស័យថាមពលស៊ីវិលនៅអ៊ីរ៉ង់ គឺអាចជួយធានាដល់ការមិនសាយភាយអាវុធ ហើយអាចនឹងធានាទំនុកចិត្តដល់សហគមន៍អន្តរជាតិ អំពីដំណើរការមិនអភិវឌ្ឍគ្រាប់បែបនុយក្លេអ៊ែរ របស់អ៊ីរ៉ង់។ ផ្ទុយទៅវិញ ប្រសិនបើអាមេរិកសម្រេចចិត្ត ឈប់លើកលែងក្តីអនុគ្រោះនេះ ហាក់ដូចជា ជំរុញស្ថានការណ៍ឱ្យកាន់តែធ្ងន់ធ្ងរ។
ទន្ទឹមនឹងគ្នានេះ អ្នកនាំពាក្យក្រសួងការបរទេសអ៊ីរ៉ង់ លោក Abbas Moussavi បានថ្កោលទោសការសម្រេចចិត្តរបស់សហរដ្ឋអាមេរិក ដោយចាត់ទុកថា ជាការរំលោភនឹងសេចក្តីសម្រេច (លេខ2231) របស់ក្រុមប្រឹក្សាសន្តិសុខ និងបំពានធម្មនុញ្ញនៃអង្គការសហប្រជាជាតិ។
អ៊ីរ៉ង់ បានចុះហត្ថលេខាជាមួយប្រទេសមហាអំណាច ទាំងប្រាំ កាលពីឆ្នាំ ២០១៥ ស្តីពីការមិនអភិវឌ្ឍគ្រាប់បែកនុយក្លេអ៊ែរ។ ប៉ុន្តែ នៅឆ្នាំ២០១៨ សហរដ្ឋអាមេរិករបស់លោក ដូណាល់ ត្រាំ បានដកខ្លួនចេញ ជាឯកតោភាគី និងបានចោទចង្អុរមុខអ៊ីរ៉ង់ថា មិនគោរពកិច្ចព្រមព្រៀង ហើយអាមេរិកដាក់ទណ្ឌកម្មអ៊ីរ៉ង់។ ទណ្ឌកម្មអាមេរិកផ្តោតសំខាន់ ទៅលើផ្នែកសេដ្ឋកិច្ច ហិរញ្ញវត្ថុ និងវិស័យប្រេង។ ចំណែក ផ្នែកកិច្ចការថាមពលនុយក្លេអ៊ែរស៊ីវិល គឺមានខចែងអនុគ្រោះយោគយល់ខ្លះ។ ប៉ុន្តែ ក្នុងសប្តាហ៍នេះ សហរដ្ឋអាមេរិចសម្រេចចិត្តថ្មី បញ្ឈប់ក្តីអនុគ្រោះតទៅទៀតហើយ។ ការសម្រេចនេះ បើតាមអ្នកជំនាញ គឺប៉ះពាល់ផ្ទាល់និងខ្លាំង ជាដំបូងគេ ដល់ភាគីរុស្ស៊ី ដែលកំពុងធ្វើការរកស៊ីមានសន្ទុះជាងគេ ខាងថាមពលនុយក្លេអ៊ែរស៊ីវិលនេះ នៅអ៊ីរ៉ង់។ ដូច្នេះតាមរយៈការសម្រេចចិត្តថ្មីនេះ រុស្ស៊ី អាចនឹងត្រូវទណ្ឌកម្មអាមេរិក បន្ថែមទៀត។
នៅពេលនេះ ភាគី បារាំង អង់គ្លេស និងអាល្លឺម៉ង់ កំពុងតែជជែកជាមួយសមភាគី រុស្ស៊ី និងចិន ដើម្បីរកច្រកផ្លូវបញ្ជៀសហានិយភ័យឱ្យនៅទាប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ