ក្នុងរយៈពេល មិនដល់១ខែ មនុស្ស៤លាននាក់នៅក្នុងពិភពលោក ឆ្លងជំងឺកូវីដ១៩
ចំនួនមនុស្សឆ្លងមេរោគកូរ៉ូណាក្នុងពិភពលោក បានកើនដល់ ១០លាននាក់ គិតត្រឹម នៅថ្ងៃអាទិត្យទី ២៨មិថុនា។ តាមអង្គការសុខភាពពិភពលោក ដោយចម្លងទៅមនុស្ស១០លាននាក់ គិតចាប់តាំងពីលេចមុខដំបូង នៅទីក្រុងវូហាន ប្រទេសចិន កាលពីចុងខែធ្នូ ឆ្នាំមុន មេរោគកូរ៉ូណាបានសម្លាប់មនុស្សក្នុងចំនួនដ៏ច្រើន ពោលគឺស្មើនឹងចំនួនមនុស្សស្លាប់ដោយសារចំនួនជំងឺគ្រុនផ្តាសាយ ធំ ក្នុងរយៈពេលពេញមួយឆ្នាំ។ នៅពេលរលកទី ២ នៃជំងឺកូវីដ កំពុងចាប់លេចមុខឡើងវិញ នៅអាស៊ី នាំមុខដោយប្រទេសចិន អាមេរិកឯណោះវិញ នៅមិនទាន់ងើបរួចខ្លួននៅឡើយពីរលកទី១នៃជំងឺកូវីដ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:២៦
ផ្ទុយពីការប៉ាន់ស្មានដែលថា វានឹងចុះថមថយ នៅរដូវផ្ការីក នៅអំឡុងខែឧសភា និងខែមិថុនា ជំងឺរាតត្បាតកូវីដ បានរាលដាលខ្លាំង លឿនមែនទែន។ ដូចបានលើកខាងដើម គិតចាប់តាំងពី ថ្ងៃទី៣១ ឧសភា រហូតមកដល់ថ្ងៃទី ២៨មិថុនា គឺក្នុងរយៈពេល មិនដល់១ខែផង ចំនួន មនុស្សឆ្លងកូវីដ បានកើនឡើងបន្ថែម ដល់ទៅ ៤លាននាក់ នៅក្នុងពិភពលោក។
ជំងឺកូវីដបានឆ្លងទៅមនុស្សសរុប ១០លាននាក់ នៅក្នុងពិភពលោក ដោយមានអាមេរិកនាំមុខគេ ទាំងក្នុងចំនួនអ្នកឆ្លង និងមនុស្សស្លាប់ដោយសារកូវីដ ១៩។
នៅប៉ុន្មានសប្តាហ៍ចុងក្រោយនេះ ជំងឺកូវីដបានរាលដាលខ្លាំង នៅទ្វីបអាមេរិក ប៉ុន្តែហាក់ថមថយចុះ នៅតំបន់អាស៊ី និងអឺរ៉ុប។ ទ្វីបអាមេរិក ដែលមានទាំងអាមេរិកខាងជើង និងអាមេរិកឡាទីន មានអ្នកឆ្លងជំងឺកូវីដ តំណាងឲ្យ២៥ភាគរយ រៀងៗខ្លួន នៃចំនួនអ្នកឆ្លងសរុប នៅក្នុងពិភពលោក។ នៅអាមេរិក ចំនួនអ្នកឆ្លងថ្មី បានកើនឡើង ដល់ ៤៣០០០នាក់ ក្នុងមួយថ្ងៃ កាលពីថ្ងៃសៅរ៍។ ជាចំនួនឆ្លងដ៏ច្រើន ដែលអាមេរិកមិនធ្លាប់ មាន គិតចាប់តាំងពីកើតមានជំងឺរាតត្បាតកូវីដ នៅទឹកដីអាមេរិក។ នៅទឹកដីអាមេរិកឡាទីន ប្រេស៊ីលបានក្លាយជាប្រទេសទី២ ក្នុងពិភពលោក បន្ទាប់ពីអាមេរិក ដែលមានអ្នកឆ្លងជំងឺកូវីដ១៩។ គិតត្រឹមថ្ងៃសៅរ៍ ប្រេស៊ីលមានមនុស្សស្លាប់ដោយសារកូវីដ ជាង ៥ម៉ឺននាក់ និងអ្នកឆ្លងសរុប ជាង ១លាន ៣សែននាក់។
គេវាយតម្លៃថា ទាំងអាមេរិក និងប្រេស៊ីល ដែលមានចំនួនមនុស្សឆ្លង និងស្លាប់ច្រើនជាងគេ នៅក្នុងពិភពលោក ដោយសារតែជំងឺកូវីដ ក៏ព្រោះតែប្រទេសទាំងពីរ ធូររលុង អនុវត្តមិនបានច្បាស់លាស់វិធានការបិទខ្ទប់ ការពាក់ម៉ាស និងការរក្សាគម្លាតសង្គម។ ដើម្បីប្រយោជន៍សេដ្ឋកិច្ច ទាំងប្រធានាធិបតី អាមេរិក ក៏ដូចជាប្រធានាធិបតីប្រេស៊ីល បានជំរុញ ឲ្យគេបើកទីក្រុង បើកក្រុមហ៊ុន ភោជនីយដ្ឋាន ឡើងវិញ ដោយមិនខ្វល់នឹងការអំពាវនាវរបស់អ្នកវិទ្យាសាស្រ្តដែលព្រមានពីគ្រោះថ្នាក់ បើសិនគេឆាប់បើកទីក្រុង នៅពេលគេនៅមិនទាន់អាចគ្រប់គ្រងជំងឺរាតត្បាតកូវីដបាននោះ។
អាមេរិក និងប្រេស៊ីលដើរផ្ទុយស្រឡះពីបណ្តាប្រទេសនៅអឺរ៉ុប និងប្រទេសចិន ដែលបានរងគ្រោះមុននឹងគេ ដោយសារកូវីដ។ នៅអឺរ៉ុប ករណីឆ្លងជំងឺកូវីដ ហាក់ងើបកំរើកឡើងវិញ បន្ទាប់ពីធ្លាក់ថយចុះខ្លាំង មកពីវិធានការបិទខ្ទប់ អស់រយៈពេល ២ខែកន្លងមក។ បើទោះបីជាបើកប្រទេស បើកព្រំដែនឡើងវិញ អឺរ៉ុបនៅតែប្រយ័ត្នប្រយែង ដោយនៅបន្តរក្សាគម្លាតសង្គម និងពាក់ម៉ាស ដើម្បីបង្ការកុំឲ្យមានករណីឆ្លងជំងឺកូវីដ ក្នុងល្បឿនលឿន។
នៅអាស៊ី ដែលតំណាងឲ្យ១១ភាគរយនៃចំនួនមនុស្សឆ្លងសរុបក្នុងពិភពលោក ឥណ្ឌានាំមុខ គេ ខាងមានចំនួនមនុស្សឆ្លង និងស្លាប់ដោយសារកូវីដ។ ឥណ្ឌាមានចំនួនអ្នកឆ្លងកូវីដ ដល់៥សែននាក់ ជាមួយនឹងតួលេចអ្នកឆ្លង ១៨០០០ នាក់ ក្នុងមួយថ្ងៃសៅរ៍ម្សិលមិញ។ ចំណែកចិនវិញ ដែលកំពុងប្រឈមនឹងរលកទី២នៃជំងឺកូវីដ នៅថ្ងៃអាទិត្យនេះបានចាត់វិធានការតឹងរ៉ឹងដូចមុន ដោយបានសម្រេចបិទទីក្រុង នៅជាយរដ្ឋធានីប៉េកាំង មួយដែលមានមនុស្សរស់នៅ៥សែននាក់ បន្ទាប់ ពីផ្ទុះករណីឆ្លងថ្មី នៅទីក្រុងប៉េកាំង ចំនួន ១៤នាក់ កាលពីថ្ងៃសៅរ៍។
តើការធ្វើតេស្តជាមូលហេតុធ្វើឲ្យគេករណីឆ្លងកូវីដកើនឡើង នៅអាមេរិក?
នៅពេលជំងឺរាតត្បាតកូវីដ១៩ ហាក់ចុះថមថយ នៅអឺរ៉ុប និងអាស៊ី ទ្វីបអាមេរិកឯណោះវិញ នៅមិនទាន់ងើបរួចពីរលកទី១នៃជំងឺកូវីដ ១៩នៅឡើយទេ។ អាមេរិក នៅថ្ងៃសៅរ៍ មានករណីឆ្លងថ្មី ដល់ទៅ ៤៣០០០នាក់ ក្នុងរយៈពេល១ថ្ងៃ ដែលធ្វើឲ្យអាមេរិកមានអ្នកឆ្លងមេរោគកូរ៉ូណាសរុប ជាង២លានកន្លះ។
កាលពីថ្ងៃសុក្រ អនុប្រធានាធិបតី អាមេរិក លោក Mike Pence អះអាងថា តួលេខនៃអ្នកឆ្លងបានកើនឡើង ក៏ដោយសារតែមានការបង្កើនយុទ្ធនាការធ្វើតេស្តរកមេរោគកូវីដ-១៩។ ការលើកឡើងរបស់អនុប្រធានាធិបតី អាមេរិក អាចត្រូវ ប៉ុន្តែ មិនទាំងអស់នោះទេ។
ជាការពិត ចំនួនអ្នកឆ្លងជំងឺកូវីដ ដែលភាគច្រើន ស្ថិតក្នុងដំណាក់កាលឆ្លងដំបូង បានកើនឡើងច្រើនចាប់ពីខែឧសភា គឺច្រើន ខ្លាំង បើប្រៀបធៀបនឹងខែមេសា ដែលអាមេរិកមិនសូវធ្វើតេស្តរកមេរោគកូរ៉ូណា ដោយសារតែខ្វះខាតសម្ភារៈធ្វើតេស្ត។
ប៉ុន្តែ បើពិនិត្យមើលតួលេខឆ្លង ជាក់ស្តែង នៅតាមតំបន់ ជាពិសេសនៅតំបន់ខាងត្បូង និងខាងលិច គេឃើញថា ចំនួនមនុស្សឆ្លង គឺកើនឡើង លឿនជាងចំនួន មនុស្សដែលគេធ្វើតេស្តទៅទៀត នៅប៉ុន្មានថ្ងៃចុងក្រោយនេះ។ ជាក់ស្តែង នៅរដ្ឋFlorida ជាទីដែលចំនួនមនុស្សឆ្លងកូវីដ បានហក់ឡើងដល់ ដល់ ៩៥០០នាក់ ក្នុងរយៈពេលមួយថ្ងៃ សៅរ៍ អភិបាលរដ្ឋទទួលស្គាល់ថា តួលេខមនុស្សឆ្លងនៅតែកើនឡើង បើទោះបីជាគេកាត់បន្ថយ ការធ្វើតេស្តរកអ្នកឆ្លង ក៏ដោយ។ ភស្តុតាងមួយដែលបញ្ជាក់ថា ការលើកឡើង របស់អនុប្រធានាធិបតីមិនសូវជាត្រឹមត្រូវទាំងស្រុងនោះ គឺចំនួនអ្នកជំងឺ ដែលចូលព្យាបាលនៅមន្ទីរពេទ្យបានកើនឡើង ជាបន្តបន្ទាប់ នៅបណ្តារដ្ឋខាងលិច និងខាងត្បូង ដូចជារដ្ឋតិចសាស់ និងអារីហ្សូណាជាដើម។
ដូចនិយាយខាងដើម អាមេរិកដែលនៅតែមានចំនួនមនុស្សឆ្លងជំងឺកូវីដ ច្រើន មិនព្រមថយចុះសោះ ដោយសារតែ រដ្ឋជាច្រើន ឆាប់បើកទីក្រុងលឿនពេក។ ករណីឆ្លងច្រើន ជាលទ្ធផលនៃការឆាប់បើកទីក្រុង បើកឆ្នេរសមុទ្រ និងបារ លឿនពេក នៅបណ្តារដ្ឋ។ នៅរដ្ឋ Florida និងរដ្ឋTexas ដែលដឹកនាំដោយអភិបាលរដ្ឋ មកពីគណបក្សសាធារណរដ្ឋរបស់លោកដូណាល់ ត្រាំ បានបើកទីក្រុង តាំងពីដើមខែ ៥មកម្ល៉េះ។
អាមេរិកត្រលប់ទៅបិទខ្ទប់ ផ្អាកសកម្មភាពសេដ្ឋកិច្ចសាជាថ្មី
រដ្ឋFlorida និងរដ្ឋTexas ដែលសុទ្ធសឹងជារដ្ឋរឹងទទឹងមិនចង់បិទទីក្រុង ដោយសារតែមិនចង់ខាតបង់សេដ្ឋកិច្ច ក៏ត្រូវ ត្រលប់ទៅបិទខ្ទប់ទីក្រុង ទាំងបង្ខំចិត្ត។ ចាប់តាំងពីថ្ងៃសុក្រ អាជ្ញាធរបានសម្រេចបិទបារ ពង្រឹងវិធានការ រក្សាគម្លាតសង្គម ចំណែក នៅរដ្ឋCalifornia អាជ្ញាធរបានផ្អាក ក្នុងរឿងដកវិធានការបិទខ្ទប់ ទីក្រុង និងបានអំពាវនាវឲ្យមនុស្សនៅក្នុងផ្ទះ បើសិនគ្មានកិច្ចការចាំបាច់ នៅខាងក្រៅ ឬបើចេញដើរក្រៅ គេត្រូវតែពាក់ម៉ាសជាប់ជានិច្ច។
នៅអាមេរិក ការពាក់ម៉ាស គឺជារឿងដែលគេមិនបានអនុវត្តជាទូទៅ នោះទេ។ អ្វីដេលគេកត់សំគាល់ឃើញនៅអាមេរិក គឺ ជំងឺកូវីដកំពុងចាប់ឆ្លងរាលដាល ទៅលើមនុស្សវ័យក្មេង ដែលកំពុងត្រេកត្រអាលនឹងសេរីភាព ចង់ដើរហើរ និងសប្បាយ ជួបជុំគ្នា នៅតាមបារ ដោយគ្មានរក្សាគម្លាតសង្គម។ តាមអ្នកជំនាញសុខភាពអាមេរិក អត្រារបស់អ្នកឆ្លងក្រោមអាយុ ៦៥ឆ្នាំ នៅ អាមេរិក បានកើនឡើង ពី ៦៥ភាគរយ ទៅដល់ ៨២ភាគរយ។ អាចនិយាយម្យ៉ាងថា យុវជនអាមេរិក កាន់តែប្រឈម ឆ្លងជំងឺកូវីដ ជាងពេលមុនៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ