អាមេរិកបង្កើនការចល័តទ័ព នៅភាគឦសានស៊ីរី នៅក្រោយ ការប៉ះទង្គិចគ្នាជាមួយទ័ពរុស្ស៊ី
កងទ័ពអាមេរិកបានប្រកាសកាលពីថ្ងៃសុក្រម្សិលមិញ ថាបានបញ្ជូនរថក្រោះ និងកងទ័ពបន្ថែម ទៅកាន់តំបន់ភាគឦសាន ស៊ីរី នៅជាប់ព្រំដែនតួកគី ជាទីដែលកងទ័ពអាមេរិក និងរុស្ស៊ី បានប៉ះទង្គិចគ្នា កាន់តែញយដង។ តាមបញ្ជាការដ្ឋានកណ្តាលរបស់កងទ័ព អាមេរិកប្រចាំដើមបូព៌ា អាមេរិក បង្កើនវត្តមានទ័ព នៅតំបន់ភាគខាងជើងស៊ីរី ដើម្បី ការពារក្រុមគួដឌីស្ថានស៊ីរីដែលជាសម្ព័ន្ធមិត្តរបស់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
នៅក្នុងសេចក្តីថ្លែងការណ៍កាលពីថ្ងៃសុក្រ បញ្ជាការដ្ឋានទ័ពអាមេរិកប្រចាំតំបន់ដើមបូព៌ា Centcom បានអះអាងថា ខ្លួនបានបញ្ជូន រ៉ាដាសម្រាប់ចាប់សញ្ញាយន្តហោះ បង្កើនការហោះល្បាតរបស់យន្តហោះចម្បាំង ហើយនិងពង្រាយបន្ថែមរថក្រោះ នៅតំបន់ភាគឦសានស៊ីរី ដែលកំពុងគ្រប់គ្រងដោយកងទ័ពអាមេរិក និងទាហានគួដឌីស្ថាន សម្ព័ន្ធមិត្តរបស់អាមេរិក។
តាមអ្នកទទួលខុសត្រូវអាមេរិកម្នាក់ដែលសុំមិនបញ្ចេញឈ្មោះ អាមេរិកបានបញ្ជូនបន្ថែមរថពាសដែកប្រយុទ្ធឈ្មោះ Bradley និងទាហានតិចជាង១០០នាក់ ទៅកាន់តំបន់ភាគខាងជើងស៊ីរី។ រថពាសដែក Bradley ត្រូវបានអាមេរិកដកចេញពីតំបន់ភាគខាងជើង ស៊ីរី កាលពីខែតុលាឆ្នាំមុន ទៅតាមការសម្រេចរបស់លោកដូណាល់ ត្រាំ ដែលចង់ដកកងទ័ពអាមេរិកពីទឹកដីស៊ីរី។ កាលណោះ លោកដូណាល់ ត្រាំ បានយល់ព្រម ឲ្យគេទុកបន្ត រថពាសដែក Bradley ជាង១០០គ្រឿង នៅស៊ីរី ដើម្បីចាំការពារអណ្តូងប្រេងនៅទឹកដីភាគខាងជើងស៊ីរី។
តាមអ្នកនាំពាក្យរបស់បញ្ជាការដ្ឋានទ័ពអាមេរិក លោក Bill Urban អាមេរិកគ្មានបំណងរករឿងឈ្លោះ ជាមួយប្រទេសដទៃនៅស៊ីរីនោះទេ។ វិធានការរបស់អាមេររិកមានគោលដៅ សំខាន់ ការពារកងកម្លាំងទ័ពរបស់សម្ព័ន្ធអន្តរជាតិ ដែលកំពុងមានវត្តមាន នៅតំបន់ភាគខាងជើង ស៊ីរី។
អ្នកនាំពាក្យរបស់បញ្ជាការដ្ឋានទ័ពអាមេរិកមិនបាននិយាយចំៗឈ្មោះប្រទេសរុស្ស៊ី ប៉ុន្តែ អ្នកទទួលខុសត្រូវរបស់អាមេរិកម្នាក់បាននិយាយប្រាប់ទីភ្នាក់ងារព័ត៌មានបារាំងAFPថា យុទ្ធសាស្រ្តបង្កើន ការពង្រាយទ័ពបន្ថែម នៅស៊ីរី ជាសញ្ញាសម្រាប់ឲ្យរុស្ស៊ីគោរព គោលការណ៍មិនបង្កជម្លោះ និងឈប់ ប្រព្រឹត្តសកម្មភាពដែលអាចគ្រោះថ្នាក់ នៅក្នុងតំបន់។
នៅចុងខែសីហាកន្លងទៅ កងទ័ពអាមេរិក ៧រូបបានរងរបួស នៅក្នុងការប៉ះទង្គិចគ្នាមួយ ជាមួយក្រុមទាហានរុស្ស៊ី។ វីដេអូ ថតដោយទាហានរុស្ស៊ីខ្លួនឯង និងដែលត្រូវបង្ហោះផ្សាយនៅលើបណ្តាញសង្គមTwitter បានបង្ហាញ រថពាសដែកនិងឧទ្ធម្ភាគចក្ររុស្ស៊ី ព្យាយាម បន្ទុចបង្អាក់ បង្ខំឲ្យរថយន្តរបស់កងទ័ពអាមេរិក បើកចេញពីតំបន់ជម្លោះ។
នៅតំបន់ភាគខាងជើងស៊ីរី កងទ័ពរុស្ស៊ីដែលបានបង្កើនការយាមល្បាត នៅតាមព្រំដែនស៊ីរី តួកគី ទៅតាមកិច្ចព្រមព្រៀងជាមួយអង់ការ៉ា ប៉ះទង្គិចគ្នាកាន់តែញយ ជាមួយ កងទ័ពអាមេរិក ដែលបន្ត វត្តមានរបស់ខ្លួន នៅស៊ីរី ដើម្បី ជួយ ក្រុមគួដឌីស្ថានស៊ីរី។ នៅភាគខាងជើងស៊ីរីដដែល កងទ័ពអាមេរិកក៏ត្រូវប្រឈមនឹងទាហានស៊ីឈ្នួលរុស្ស៊ី ដែលត្រូវបញ្ជូនឲ្យទៅកាពារ អណ្តូងប្រេង នៅទឹកដីស៊ីរី។
កាលពីខែកុម្ភៈ ឆ្នាំ ២០១៨ នៅក្រោយ ការវាយប្រហាររបស់ទាហានស៊ីឈ្នួលរុស្ស៊ីទៅលើកងកម្លាំងប្រជាធិបតេយ្យស៊ីរី ដែលជាសម្ព័ន្ធមិត្តរបស់អាមេរិក សម្ព័ន្ធអន្តរជាតិនៅស៊ីរី ដឹកនាំដោយអាមេរិកបានបើកការវាយប្រហារយ៉ាងចាស់ដៃ ដែលបានសម្លាប់ទាហានស៊ីឈ្នួលរុស្ស៊ី ពី ១០០ ទៅ២០០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ