អាមេរិកសម្រេចជាឯកតោភាគីឲ្យគេបន្តអនុវត្តទណ្ឌកម្មអន្តរជាតិ ទៅលើអ៊ីរ៉ង់
អាមេរិកក្រោមការដឹកនាំរបស់លោកដូណាល់ កាន់តែដើរឃ្លាតឆ្ងាយពីសហគមន៍អន្តរជាតិ។ កាលពីថ្ងៃ សុក្រ អាមេរិកបានប្រកាសជាឯកតោភាគី ការអនុវត្តទណ្ឌកម្មអន្តរជាតិ ទៅលើអ៊ីរ៉ង់ ជាពិសេស ការហាម លក់ និងដឹកអាវុធទៅ អ៊ីរ៉ង់។ ទោះមានសំឡេងប្រឆាំង ទាំងស្រុងនៅក្រុមប្រឹក្សាសន្តិសុខរបស់អង្គការសហប្រជាជាតិ ទណ្ឌកម្មអន្តរជាតិដែលអាមេរិកប្រកាសជាឯកតោភាគី បានចាប់ចូលជាធរមាន កាលពីយប់អាធា្រត្រថ្ងៃសៅរ៍តទៅ។
ចុះផ្សាយនៅថ្ងៃ៖
ស្តាប់ - ០២:៤០
នៅ៦សប្តាហ៍មុនការបោះឆ្នោតប្រធានាធិបតី អាមេរិក រដ្ឋបាលលោកដូណាល់ ត្រាំ ប្រើគ្រប់មធ្យោបាយដើម្បីដាក់ទណ្ឌកម្មទៅលើអ៊ីរ៉ង់ នោះបើទោះបីជាអាមេរិកមានម្នាក់ឯង និងត្រូវប្រឈមនឹងសំឡេងប្រឆាំងទាំងស្រុង នៅក្រុមប្រឹក្សាសន្តិសុខអង្គការសហប្រជាជាតិ (មិនថា ចិន រុស្ស៊ី ឬប្រទេសមហាអំណាចនៅអឺរ៉ុប ដែលជាសម្ព័ន្ធមិត្តរបស់អាមេរិក)។
នៅថ្ងៃសុក្រ ឯកអគ្គរដ្ឋទូតអាមេរិកប្រចាំអង្គការសហប្រជាជាតិ បានប្រកាសថា ទណ្ឌកម្មអន្តរជាតិទៅលើអ៊ីរ៉ង់ ដែលគេបានដកចេញ កាលពីឆ្នាំ ២០១៥ ទៅតាមកិច្ចព្រមព្រៀងនុយក្លេអ៊ែរ អ៊ីរ៉ង់ នឹងត្រូវចូលជាធរមានឡើងវិញ ចាប់ពីយប់ថ្ងៃសៅរ៍តទៅ។ ដោយព្យាយាមស្តារការដាក់ទណ្ឌកម្មអន្តរជាតិលើអ៊ីរ៉ង់ អាមេរិក មានគោលដៅទាមទារឲ្យប្រទេសសមាជិកអង្គការសហប្រជាជាតិ ពន្យារការដាក់ទណ្ឌកម្មសព្វាវុធអ៊ីរ៉ង់ ដែលត្រូវអស់សុពលភាព នៅខែតុលាខាងមុខ។
អាមេរិកចង់ឲ្យបម្រាមអន្តរជាតិលើការលក់ និងដឹកអាវុធទៅឲ្យអ៊ីរ៉ង់មានជារៀងរហូត។ ដូច្នេះ ដើម្បីអាចត្រលប់ទៅដាក់ទណ្ឌកម្មអន្តរជាតិទៅលើអ៊ីរ៉ង់សាជាថ្មី រដ្ឋបាលលោកដូណាល់ ត្រាំ ដែលបានប្រកាសដកខ្លួនចេញពីកិច្ចព្រមព្រៀង នុយក្លេអ៊ែរអ៊ីរ៉ង់ នៅឆ្នាំ ២០១៨ បានលើកហេតុផលថា ក្នុងនាមអាមេរិកជាអ្នកចូលរួមក្នុងកិច្ចព្រមព្រៀង អាមេរិកអាចប្រើយន្តការ ត្រលប់ទៅដាក់ទណ្ឌកម្មលើអ៊ីរ៉ង់ ក្នុងករណីអ៊ីរ៉ង់ រំលោភកិច្ចព្រមព្រៀងនុយក្លេអ៊ែរ។
កុំថាឡើយ ចិន និងរុស្ស៊ី ដែលជាគូប្រជែងរបស់អាមេរិក សូម្បី បារាំង អង់គ្លេស និងអាល្លឺម៉ង់ ដែលជាសម្ព័ន្ធមិត្តរបស់អាមេរិក ក៏ដើរផ្ទុយពីអាមេរិកដែរ។ នៅថ្ងៃសុក្រ អាល្លឺម៉ង់ អង់គ្លេស និងបារាំង ដែលជាហត្ថលេខី នៃកិច្ចព្រមព្រៀងនុយក្លេអ៊ែរអ៊ីរ៉ង់បានដាក់លិខិតទៅក្រុមប្រឹក្សាសន្តិសុខអង្គការសហប្រជាជាតិ ដើម្បីបញ្ជាក់ថា រាល់ការសម្រេចចិត្ត ឬសកម្មភាពដើម្បី ដាក់ទណ្ឌកម្មសាជាថ្មីលើអ៊ីរ៉ង់ នឹងមិនត្រឹមត្រូវតាមច្បាប់នោះទេ។ សម្រាប់ប្រទេសទាំង៣ នីតិវិធីរបស់អាមេរិកដើម្បីត្រលប់ទៅដាក់ទណ្ឌកម្មលើអ៊ីរ៉ង់ នឹងគ្មានបានផលនោះទេ។
តើវាអាចទៅរួចទេ ដែលអាមេរិក ប្រកាសជាឯកតោភាគី ទាមទារអន្តរជាតិ អនុវត្តទណ្ឌកម្មសេដ្ឋកិច្ចលើអ៊ីរ៉ង់នោះ? “អាមេរិកនឹងរារាំងមិនឲ្យអ៊ីរ៉ង់ ទិញ រថពាសដែកពីចិន និងទិញ ខែលមីស៊ីលពីរុស្ស៊ី” នេះជាប្រសាសន៍របស់រដ្ឋមន្រ្តីការបរទេសលោក Mike Pompeo ដែលបានបញ្ជាក់ហើយថា អាមេរិកនឹងធ្វើគ្រប់មធ្យោបាយ ដើម្បីទាមទារឲ្យគេគោរព និងអនុវត្តទណ្ឌកម្មអន្តរជាតិទៅលើអ៊ីរ៉ង់។ គេវាយតម្លៃថា លោកដូណាល់ ត្រាំ នឹងអាចប្រកាសដាក់ទណ្ឌកម្មរាល់ ប្រទេស ឬក្រុមហ៊ុនទាំងឡាយណាដែលរំលោភ មិនអនុវត្តការដាក់ទណ្ឌកម្មរបស់អង្គការសហប្រជាជាតិ ទៅលើអ៊ីរ៉ង់ ដែលអាមេរិកបានប្រកាសដាក់ឲ្យអនុវត្ត ជាឯកតោភាគី។ វិធានការនេះ នឹងធ្វើឲ្យអាមេរិក ឈរតាំងខ្លួនតែម្នាក់ឯង ប្រឆាំងពិភពលោក ប្រឆាំង នឹងក្រុមប្រឹក្សាសន្តិសុខអង្គការសហប្រជាជាតិ ដើម្បី គ្រាន់តែចង់ ដាក់ទណ្ឌកម្មអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ