ទីភ្នាក់ងារAIEA៖ បរិមាណស្តុកសារធាតុអ៊ុយរ៉ាញ៉ូម ដែលចម្រើនរួច របស់អ៊ីរ៉ង់បានកើនឡើង១០ដង
នៅក្រោមសំពាធរបស់អាមេរិក និងសេចក្តីសម្រេចរបស់ទីភ្នាក់ងារថាមពលបរមាណូ អន្តរជាតិ AIEA អ៊ីរ៉ង់នៅទីបំផុតបានបើកទ្វារ អនុញ្ញាតឲ្យក្រុមអធិការកិច្ចរបស់AIEA បានចូលទៅត្រួតពិនិត្យ មជ្ឈមណ្ឌលនុយក្លេអ៊េរ ២កន្លែង ដែលអ៊ីរ៉ង់ បដិសេធ អស់ជាច្រើនខែ។ នេះបើតាមរបាយការណ៍ ដែលស្ថាប័នទទួលបន្ទុកត្រួតពិនិត្យ ថាមពលនុយក្លេអ៊ែររបស់អង្គការសហប្រជាជាតិ បានចុះផ្សាយកាលពីល្ងាចថ្ងៃសុក្រម្សិលមិញ។ នៅក្នុងរបាយការណ៍ដាច់ដោយឡែកមួយទៀតរបស់ខ្លួន ទីភ្នាក់ងារថាមពលនុយក្លេអ៊ែរអន្តរជាតិ បានលើកឡើងដែរថា បរិមាណ ស្តុកសារធាតុអ៊ុយរ៉ាញ៉ូមដែលចម្រើនរួច របស់អ៊ីរ៉ង់ ឥលូវនេះបានកើនឡើងដល់២១០៥គីឡូក្រាម គឺស្មើ១០ដង នៃបរិមាណដែលមានចែងនៅក្នុងកិច្ចព្រមព្រៀងនុយក្លេអ៊ែរ ឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
នៅក្នុងរបាយការណ៍ ចុះផ្សាយកាលពីថ្ងៃសុក្រ ទីភ្នាក់ងារថាមពលបរមាណូអន្តរជាតិ AIEA បានអះអាងថា អ៊ីរ៉ង់បានអនុញ្ញាតបើកផ្លូវឲ្យមន្រ្តីរបស់ទីភ្នាក់ងារAIEA អាចចូលទៅត្រួតពិនិត្យទីតាំង២កន្លែង ដែលគេសង្ស័យថា អាចធ្លាប់ជាមជ្ឈមណ្ឌលនុយក្លេអ៊ែរដែលអ៊ីរ៉ង់លាក់ មិន ប្រកាសប្រាប់ ទីភ្នាក់ងារថាមពលAIEA។ តាមរបាយការណ៍របស់AIEA នៅក្រោយបើកភ្លើងខៀវរបស់អ៊ីរ៉ង់ កាលពីចុងខែសីហា ក្រុមអធិការកិច្ចបានចុះ ទៅប្រមូលយកស្លាកគំរូ នៅមជ្ឈមណ្ឌលទី១ ដើម្បីសិក្សា ស្រាវជ្រាវរកដានសារធាតុវិទ្យុសកម្ម ក្នុងករណីដែលទីតាំងធ្លាប់ជាមជ្ឈមណ្ឌលនុយក្លេអ៊ែរ របស់អ៊ីរ៉ង់ កាលពីមុនមក។ ការចុះត្រួតពិនិត្យនៅទីតាំងទី ២ នឹងប្រព្រឹត្តទៅ ចុងខែកញ្ញានេះ ទៅតាមការយល់ព្រមព្រៀង ពីអ៊ីរ៉ង់។
សូមបញ្ជាក់ថា ទាំងទីភ្នាក់ងារស៊ើបការណ៍សម្ងាត់អាមេរិក និងអ៊ីស្រាអែល ជឿថា អ៊ីរ៉ង់ធ្លាប់លួចលាក់ មានកម្មវិធី ផលិតអាវុធនុយក្លេអ៊ែរ ប៉ុន្តែ ក៏ត្រូវផ្អាកទៅវិញ នៅឆ្នាំ ២០០៣។
យ៉ាងណាក៏ដោយ របាយការណ៍របស់ទីភ្នាក់ងារ ថាមពលនុយក្លេអ៊ែរអន្តរជាតិបានសង្កត់ធ្ងន់ដែរថា គ្មានតម្រុយណាមួយ ដែលបង្ហាញថា សកម្មភាពនុយក្លេអ៊ែរ នៅមជ្ឈមណ្ឌលដែលអ៊ីរ៉ង់ មិនបានប្រកាសប្រាប់ បង្កការគំរាមកំហែងនោះទេ។
នៅពេលអ៊ីរ៉ង់យល់ព្រមបើកចំហរ ឲ្យក្រុមអធិការកិច្ចរបស់AIEA អាចចូលទៅត្រួតពិនិត្យទីតាំងដែលគេសង្ស័យ ថា ធ្លាប់ជាមជ្ឈមណ្ឌលនុយក្លេអ៊ែរ អ៊ីរ៉ង់ ក៏មិនបានលាក់បាំង បោះបង់ចោលផែនការចម្រើនសារធាតុអ៊ុយរ៉ាញ៉ូម ដើម្បីផ្គើនដាក់ អាមេរិកដែលបានដកខ្លួន ចេញពីកិច្ចព្រមព្រៀង និងត្រលប់ទៅដាក់ទណ្ឌកម្មសេដ្ឋកិច្ចលើអ៊ីរ៉ង់ កាលពីឆ្នាំ ២០១៨។
នៅក្នុងរបាយការណ៍ទី២របស់ខ្លួន ចុះផ្សាយកាលពីថ្ងៃម្សិលមិញដែរ ទីភ្នាក់ងារថាមពលបរមាណូអន្តរជាតិបានអះអាងថា គិតមកត្រឹមចុងខែ សីហា អ៊ីរ៉ង់មានបរិមាណ ស្តុកសារធាតុអ៊ុយរ៉ាញ៉ូម ដែលចម្រើនរួចហើយ ប្រមាណ ២១០៥គីឡូក្រាម ពោលគឺស្មើ១០ដងនៃបរិមាណសារធាតុអ៊ុយរ៉ាញ៉ូម ដែលអ៊ីរ៉ង់ អាចមានសិទ្ធិស្តុក ទៅតាមការចែងនៃកិច្ចព្រមព្រៀងនុយក្លេអ៊ែរ ឆ្នាំ ២០១៥។ ខឹងនឹងអាមេរិកដែលត្រលប់ទៅដាក់ទណ្ឌកម្មសេដ្ឋកិច្ចលើខ្លួនសាជាថ្មី អ៊ីរ៉ង់ធ្លាប់បានប្រកាសពីចេតនា កាត់បន្ថយ ការគោរព កិច្ចសន្យារបស់ខ្លួន ដែលមានចែង នៅក្នុងកិច្ចព្រមព្រៀង ដោយបានត្រលប់ទៅ បង្កើនបរិមាណស្តុកអ៊ុយរ៉ាញ៉ូមដែលចម្រើនរួច និងបង្កើនអត្រាចម្រើនធាតុអ៊ុយរ៉ាញ៉ូមឲ្យកាន់តែខ្ពស់ជាងមុន។ សមាគមគ្រប់គ្រងអាវុធអាមេរិក វាយតម្លៃថា ដើម្បី អាចផលិតអាវុធនុយក្លេអ៊ែរ អ៊ីរ៉ង់ អាចត្រូវការសារធាតុអ៊ុយរ៉ានីញ៉ូម ដែលចម្រើនរួចហើយ ក្នុងអត្រា ៣,៦៧% ប្រមាណ ១០៥០គីឡូក្រាម។ បន្ទាប់មកគេត្រូវការបង្កើនអត្រាចម្រើនសារធាតុអ៊ុយរ៉ាញ៉ូម ដល់ទៅ៩០% ដើម្បីអាចផលិតបានអាវុធនុយក្លេអ៊ែរ។ សម្រាប់អ្នកជំនាញ អ៊ីរ៉ង់ ត្រូវការពេលវេលាយូរឆ្នាំ ទម្រាំ អាចមានសមត្ថភាពធ្វើដូច្នេះបាន។ អ៊ីរ៉ង់វិញបានអះអាងរហូតមកថា កម្មវិធីនុយក្លេអ៊ែររបស់ខ្លួនមានគោលដៅ ស៊ីវិល ប៉ុន្តែ គ្មានមហិច្ឆតាចង់ផលិតអាវុធនុយក្លេអ៊ែរប្រល័យលោកនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ