FBI ចាប់ខ្លួនមនុស្ស៦នាក់ ដែលបានរៀបចំផែនការចាប់ជំរិតលោកស្រីអភិបាលរដ្ឋMichigan
មនុស្ស៦នាក់ ត្រូវបានចាប់ខ្លួន និងចោទប្រកាន់ពីបទរៀបចំគម្រោងការចាប់ជំរិតអភិបាលរដ្ឋMichigan ដែលជាបុគ្គលរងការរិះគន់ខ្លាំងពីលោកប្រធានាធិបតីអាមេរិក ដូណាល់ ត្រាំ។ តាមរដ្ឋអាជ្ញាប្រចាំរដ្ឋMichigan មនុស្ស៧នាក់ផ្សេងទៀត ត្រូវបានចាប់ខ្លួនផងដែរ ពីបទមានផែនការវាយលុកវិមានរដ្ឋាភិបាល និងបញ្ឆេះឲ្យមានសង្រ្គាមស៊ីវិល។ នៅថ្ងៃព្រហស្បតិ៍ លោកស្រី Gretchen Whitmer អភិបាលរដ្ឋMichigan បាននិយាយចោទប្រកាន់ លោកប្រធានាធិបតី ដូណាល់ ត្រាំ ថា ជាអ្នកសរសេរសារ ញុះញង់ ឲ្យមានការស្អប់ មិនទុកចិត្ត នៅក្នុងចំណោមប្រជាជន នៅក្នុងកាលៈទេសៈ ដែលប្រទេសកំពុងប្រឈមខ្លាំងនឹងជំងឺរាតត្បាតកូវីដ ១៩។
ចុះផ្សាយនៅថ្ងៃ៖
ស្តាប់ - ០៨:០០
នៅក្នុងចំណោមមនុស្ស១៣នាក់ ដែលប៉ូលិសFBI ចាប់ខ្លួន កាលពីថ្ងៃពុធ ក្នុងបទចោទប្រកាន់ រៀបចំផែនការ ចាប់ជំរិត អភិបាលរដ្ឋ Michigan មាន៦នាក់ ជាក្រុមប្រដាប់អាវុធ ដែលស្អប់ ប្រឆាំងរដ្ឋាភិបាល។ មនុស្សនៅក្នុងក្រុមនេះ មួយចំនួន មាននិន្នាការទៅរក ក្រុមស្តាំនិយមជ្រុល ក្រុមគាំទ្រ សាសន៍ស្បែកស ចំណែក អ្នកខ្លះទៀត គ្រាន់តែជាក្រុមសេរីនិយមជ្រុល ធម្មតា ដែលមិនចូលចិត្តការបញ្ជា ការដឹកនាំរបស់រដ្ឋាភិបាល។ឮ
ចំណែក ៧នាក់ផ្សេងទៀត ដែលត្រូវប៉ូលិសចាប់ខ្លួនផងដែរ កាលពីថ្ងៃពុធ ជាសមាជិករបស់ក្រុមជនពាល ដែលមានឈ្មោះថា Wolverine Watchmen។
ប៉ូលិស សហព័ន្ធ FBI បានចាប់តាមដានក្រុមនេះ តាំងពីដើមឆ្នាំនេះ នៅបន្ទាប់ពីសំគាល់ឃើញមនុស្សមួយក្រុមតូច បានសរសេរ នៅលើបណ្តាញសង្គម ពីសកម្មភាព ផ្តួលរំលំ ស្ថាប័នរដ្ឋាភិបាល ឬ កម្លាំងរក្សាសណ្តាប់ធ្នាប់ តាមរយៈ ការប្រើអំពើហិង្សា។
ក្នុងរយៈពេលប៉ុន្មានខែនេះ ប៉ូលិសFBI បានលួចតាមដានស្តាប់ ចូលមើលការបង្ហោះផ្សាយ របស់ក្រុមប្រដាប់អាវុធនេះ នៅលើបណ្តាញសង្គម ក៏ដូចជាបញ្ជូនគិញសម្ងាត់ ឲ្យចូលទៅលួចស្តាប់យកការណ៍ ក្នុងក្រុមនេះតែម្តង។
ជារួម គេបានដឹងថា មនុស្ស៦នាក់ បានរៀបចំផែនការលម្អិត ដើម្បី ចាប់ជំរិត អភិបាលរដ្ឋ Michigan លោកស្រី Gretchen Whitmen ដែលពួកគេចាត់ទុកជាមេដឹកនាំផ្តាច់ការ ប្រើអំណាចជ្រុលហួសហេតុ។ តាមគម្រោង ពួកគេចង់ចាប់ជំរិត លោកស្រី អភិបាលរដ្ឋ Michigan និងបន្ទាប់ មក គឺ ជំនុំជម្រះ កាត់ទោស លោកស្រី ពីទោសក្បត់ជាតិ។
តាមកំណត់ហេតុរបស់ប៉ូលិស FBI មនុស្សទាំង៦នាក់ មានផែនការចាប់ជំរិត អភិបាលរដ្ឋ Michigan ឲ្យបានមុន ថ្ងៃបោះឆ្នោតប្រធានាធិបតី ដែលត្រូវធ្វើនៅថ្ងៃទី ៣ វិច្ឆិកាខាងមុខ។ ពួកគេចង់ចូលទៅ ចាប់ជំរិត អភិបាលរដ្ឋ នៅវិមានរដ្ឋាភិបាល ក្នុងទីក្រុង Lansing។ ប៉ុន្តែ បើសិនមិនបានសម្រេច គេនឹងចាប់លោកស្រីអភិបាលរដ្ឋMichigan ដល់ផ្ទះតែម្តង។ តាមប៉ូលិសFBI ក្រុមនេះបានទៅលួចតាមមើលផ្ទះផ្ទាល់ខ្លួន និងផ្ទះលំហែកាយរបស់លោកស្រី Whitmen ដល់ទៅ២ដង នៅរដូវក្តៅកន្លងទៅ។
ដោយសារពួកគេគ្រោងមានគ្នីគ្នា ដល់ទៅ ២០០នាក់ ដើម្បីប្រតិបត្តិការចាប់ជំរិតលើកនេះ ក្រុមមេក្លោងទាំង៦នាក់ បានទាក់ទងសុំជំនួយពីក្រុមជនពាល ប្រដាប់អាវុធ ឈ្មោះ Wolverin Watchmen។ ក្រុមចុងក្រោយនេះ បានចូលរួម រៀបចំផលិតដបសាំង សម្រាប់គប់លើប៉ូលិស នៅក្នុងគម្រោងវាយប្រហារនិងចាប់ជំរិតមន្រ្តី និងប៉ូលិស នៅវិមានរដ្ឋាភិបាល។
នៅប៉ុន្មានខែចុងក្រោយនេះ គេបានទិញកាំភ្លើងឆក់ ផលិតគ្រាប់បែកច្នៃ និងបានហាត់សម ជាច្រើនលើក។ ការហាត់សមចុងក្រោយ ធ្វើឡើងកាលពីចុងខែកញ្ញាកន្លងទៅ។
ប៉ូលិសFBI ចូលចាប់ខ្លួនក្រុមប្រដាប់អាវុធ នៅមួយថ្ងៃមុន ដែលពួកគេគ្រោងទិញ គ្រាប់បែក សម្រាប់បំផ្ទុះស្ពានក្បែរផ្ទះអភិបាលរដ្ឋ
នៅក្នុងបទចោទប្រកាន់ ជាផ្លូវការកាលពីថ្ងៃព្រហស្បតិ៍ រដ្ឋអាជ្ញាប្រចាំក្រុង Michigan បានអះអាងថា មនុស្ស៦នាក់ នឹងត្រូវ ជំនុំជម្រះ នៅតុលាការសហព័ន្ធ ពីបទរៀបចំផែនការចាប់ជំរិត។ ពួកគេអាចប្រឈមនឹងទោស ជាប់ពន្ធនាគារអស់មួយជីវិត។
តាមរដ្ឋមន្រ្តីយុត្តិធម៌ប្រចាំរដ្ឋMichigan លោកស្រី Dana Nessel នៅក្នុងបទចោទប្រកាន់ថា បានរៀបចំមផែនការ វាយប្រហារអគាររដ្ឋាភិបាល និងចាប់ជំរិតមន្រ្តីរដ្ឋាភិបាល មនុស្ស៧នាក់ផ្សេងទៀត ដែលជាសមាជិករបស់ក្រុមជនពាល Wolverine Watchmen ត្រូវចោទប្រកាន់ពីបទរំលោភច្បាប់ ប្រឆាំងភេរវនិយមនៅMichigan ជាពិសេស ក្នុងរឿង គាំទ្រ ផ្នែកសំភារៈ សម្រាប់សកម្មភាពភេរវកម្ម។ តាមលោកស្រី Dana Nessel ពួកក្រុមប្រដាប់អាវុធ ទាំងនេះ ចង់គំរាមកំហែងឲ្យមានអំពើហិង្សា ដើម្បីបង្កឲ្យមានសង្រ្គាមស៊ីវិល នៅទឹកដីអាមេរិក។ មនុស្សទាំង៧នាក់ ត្រូវចោទប្រកាន់ផងដែរ ពីបទ ជាសមាជិករបស់ក្រុមជនពាល។ បទឧក្រិដ្ឋ ទាំងនេះ នឹងធ្វើឲ្យពួកគេអាចប្រឈមនឹងការផ្តន្ទាទោស ជាប់ពន្ធនាគារ ពី ២ ទៅ២០ឆ្នាំ។
ខឹងនឹងអភិបាលរដ្ឋដែលចេញវិធានការបិទខ្ទប់ទីក្រុង ដើម្បីទប់ស្កាត់ ជំងឺរាតត្បាតកូវីដ
ក្រុមប្រដាប់អាវុធ ចង់ចាប់ជំរិត លោកស្រី ដោយសារតែពួកគេខឹងនឹងលោកស្រី ដែលបានវិធានការ បិទខ្ទប់ដ៏តឹងតែង កាលពីខែពាក់កណ្តាល មីនាកន្លងទៅ។ នៅពេលជំងឺកូវីដ បានរីករាតត្បាតខ្លាំង នៅរដ្ឋ Michigan ជាទីដែលកូវីដ សម្លាប់មនុស្សជាង ២ពាន់នាក់ អភិបាលរដ្ឋMichigan បានដើរផ្ទុយពីនយោបាយរបស់លោកប្រធានាធិបតីដូណាល់ត្រាំ ដោយបានប្រកាសបិទសាលារៀន ហាងទំនិញ កន្លែងហាត់កីឡា ដើម្បីរក្សាគម្លាតសង្គម។
ប៉ុន្តែ វិធានការរបស់លោកស្រី ត្រូវប្រឈមនឹងការរិះគន់ខ្លាំង រហូតបណ្តាលឲ្យមានបាតុកម្មប្រឆាំង ជាញឹកញយ នៅមុខ វិមានរដ្ឋាភិបាល ដើម្បីទាមទារឲ្យអភិបាលរដ្ឋ ដកចោលវិញ វិធានការបិទទីក្រុង។ នៅលើស្លាកបដាខ្លះ បាតុករបានចាត់ទុកលោកស្រី អភិបាលរដ្ឋ Michigan ជាហ៊ីត្លែ មេដឹកនាំផ្តាច់ការ។ បាតុកម្មភាគច្រើន ចូលរួមដោយមនុស្សប្រុស ដែលមានបំពាក់អាវុធ ពេញខ្លួន។ តាមរដ្ឋអាជ្ញាMichigan មនុស្ស២នាក់ ដែលត្រូវបានចាប់ខ្លួនកាលពីថ្ងៃ ពុធ ធ្លាប់លេចមុខ នៅក្នុង បាតុកម្មប្រឆាំងនឹងការបិទទីក្រុង នាពេលកន្លងទៅ។
តើលោកដូណាល់ ត្រាំ មកជាប់ពាក់ព័ន្ធអ្វីដែរនឹងគម្រោងផែនការចាប់ជំរិត អភិបាលរដ្ឋMichigan ?
លោកស្រី Gretchen Whitmer អភិបាលរដ្ឋ Michigan និងអភិបាលរដ្ឋផ្សេងទៀត មកពីគណបក្សប្រជាធិបតេយ្យបានរងផ្ទាំងស៊ីបរិះគន់របស់លោកដូណាល់ ត្រាំ ដោយសារតែនយោបាយគ្រប់គ្រងវិបត្តិកូវីដ។
នៅក្រោយផ្ទុះមានបាតុកម្មប្រឆាំង វិធានការ បិទខ្ទប់ទីក្រុង នៅរដ្ឋMichigan កាលពីពាក់កណ្តាលខែមីនា លោកដូណាល់ ត្រាំ បានសរសេរ សារទ្វីតធ័រ ថា ឲ្យគេរំដោះ Michigan។ “LIBERATE MICHIGAN”។ ១៣ថ្ងៃក្រោយសារបង្ហោះ របស់លោកដូណាល់ ត្រាំ បាតុករ ដែលមានប្រដាប់អាវុធ ពេញខ្លួន បានសម្រុកចូលក្នុងវិមានរដ្ឋាភិបាល នៅទីក្រុងLansing។
សម្រាប់ លោកចូ បៃដិន បេក្ខជនប្រជែងរបស់លោកដូណាល់ ត្រាំ តាមរយៈ សារអំពាវនាវឲ្យរំដោះ Michigan លោកដូណាល់ត្រាំ បានលើកទឹកចិត្ត ក្រុមប្រដាប់អាវុធ ស្តាំនិយមជ្រុល។
{{ scope.legend }}
© {{ scope.credits }}នៅថ្ងៃម្សិលមិញ លោកដូណាល់ ត្រាំ មិនបានបង្ហាញសមានចិត្តដល់លោកស្រី Whitmer ដែលអាចរងគ្រោះដោយសារផែនការចាប់ជំរិតនោះទេ។ ផ្ទុយទៅវិញ លោកនៅបានរិះគន់លោកស្រីទៀតថា បានធ្វើការងារដ៏អាក្រក់បំផុត។ សម្រាប់លោកដូណាល់ ត្រាំ លោកស្រី អភិបាលរដ្ឋMichigan មិនត្រឹមតែមិនអរគុណ លោក នៅក្រោយប៉ូលិសចាប់បានក្រុមដែលប៉ុនប៉ងចាប់ជំរិតលោកស្រីទេ លោកស្រីនៅចោទលោកថា ជាមេដឹកនាំរបស់ក្រុមគាំទ្រសាសន៍ស្បែកសទៀត។
នៅក្នុងសន្និសីទកាសែត នៅថ្ងៃព្រហស្បតិ៍ម្សិលមិញ លោកស្រី អភិបាលរដ្ឋមិនបានប្រើពាក្យចំៗថា លោកដូណាល់ ត្រាំ ជាមេដឹកនាំក្រុមគាំទ្រ សាសន៍ស្បែកសនោះទេ។ ប៉ុន្តែ លោកស្រី បានចោទប្រកាន់លោកដូណាល់ ត្រាំ ថា បានលើកទឹកចិត្តក្រុមជ្រុលនិយម ដូចជាក្រុមជនពាល Wolverin Watchmen តាមរយៈ ការបដិសេធ មិនថ្កោលទោស ក្រុមគាំទ្រស្បែកស នៅក្នុងវេទិកាដេញដោលបេក្ខជនប្រធានាធិបតី កាលពីចុងខែកញ្ញាកន្លងទៅ។ សម្រាប់អភិបាលរដ្ឋ Michigan នៅពេល មេដឹកនាំមួយ បានជួប លើកទឹកចិត្ត និងបង្ហាញ មេត្រីភាពជាមួយពួកភេរវជនក្នុងស្រុក នោះ មានន័យថាមេដឹកនាំរូបនោះ កំពុងតែ ផ្តល់ភាពស្របច្បាប់ ដល់សកម្មភាពរបស់ក្រុមភេរវនិយម និងបានចូលរួមឃុបឃិត ដោយប្រាកដ។
លោកដូណាល់ ត្រាំ វិញ ជាថ្មីម្តងទៀត មិនបានថ្កោលទោសផែនការរបស់ ក្រុមប្រដាប់អាវុធ ទាំង ១៣នាក់ ដែលត្រូវប៉ូលិសចាប់ខ្លួន កាលពីថ្ងៃពុធទេ។ ផ្ទុយទៅវិញ លោកបានចោទប្រកាន់ លោកចូ បៃដិន ថា ធូររលុង មិនថ្កោលទោស ក្រុមឆ្វេងនិយមជ្រុល ដែល បានដុត ហាង ដុតរថយន្ត ក្នុងពេលមានបាតុកម្ម ប្រឆាំងនឹងការរើសអើងពូជសាសន៍របស់ប៉ូលិស នាពេលកន្លងទៅ។ ស្ថានភាពរញ៉េរញ៉ៃ និងការបែកបាក់គ្នា ក្នុងសង្គមអាមេរិកាំង នៅមួយរយៈចុងក្រោយនេះ កំពុងផ្តល់កម្លាំងដល់ក្រុមនិយមជ្រុលនៅទឹកដីអាមេរិក។ នៅក្នុងកំណត់ចំណាំមួយ ក្នុងរបាយការណ៍សន្តិសុខផ្ទៃក្នុង អាជ្ញាធរអាមេរិកបានព្រមាន ពីការគំរាមកំហែងរបស់ក្រុមជ្រុលនិយម ហិង្សា ដែលកំពុងកើនឡើង កម្លាំង នៅទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ