បក្សប្រជាធិបតេយ្យ និងបក្សសាធារណរដ្ឋកំពុងប្រកៀកប្រកិតគ្នា ក្នុងការបោះឆ្នោតព្រឹទ្ធសភា
ដូចការបោះឆ្នោតប្រធានាធិបតី គណបក្សសាធារណរដ្ឋ និងគណបក្សប្រជាធិបតេយ្យកំពុងប្រជែងគ្នា ខ្លាំងណាស់ដែរ សម្រាប់ដណ្តើមអាសនៈ នៅសភាអ្នកតំណាងរាស្រ្ត និងព្រឹទ្ធសភា ដែលដើរតួសំខាន់ ជាអ្នកអារកាត់សេចក្តី នៅក្នុងករណីមានជម្លោះបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នៅថ្ងៃអង្គារតែមួយ ក្រៅពីបោះឆ្នោតជ្រើសរើសប្រធានាធិបតី ប្រជាជនអាមេរិកាំងត្រូវបោះឆ្នោតផងដែរ ជ្រើសរើសសមាជិករដ្ឋសភា និងព្រឹទ្ធសភា និងអភិបាលរដ្ឋ។
សមាជិករដ្ឋសភា មានអាណត្តិតែ២ឆ្នាំប៉ុណ្ណោះ។ ដូច្នេះ សមាជិកទាំង ៤៣៥រូប នឹងត្រូវផ្លាស់ប្តូរនៅរៀងរាល់ពីរឆ្នាំម្តង។ ម្តងបោះឆ្នោតក្នុងពេលតែមួយជាមួយនឹងការបោះឆ្នោតប្រធានាធិបតី និងម្តងទៀត នៅពីរឆ្នាំក្រោយមកទៀត ក្នុងអំឡុងការបោះឆ្នោតពាក់កណ្តាលអាណត្តិ (Midterm elections)។
គិតមកដល់ម៉ោងនេះ ការរាប់សន្លឹកឆ្នោតបណ្តើរៗ បានបង្ហាញថា គណបក្សប្រជាធិបតេយ្យ អាចរក្សាសំឡេងភាគច្រើននៅរដ្ឋសភា សភាអ្នកតំណាង (House of Representatives) ជាមួយអាសនៈ ១៨៧ នាំមុខគណបក្សសាធារណរដ្ឋដែលមាន១៨០អាសនៈ។
នៅពេលគណបក្សប្រជាធិបតេយ្យ អាចមានសង្ឃឹមបន្តកាន់កាប់រដ្ឋសភា នៅព្រឹទ្ធសភាឯណោះវិញ ការប្រកួតប្រជែងគឺមានខ្លាំង រវាងគណបក្សសាធារណរដ្ឋ និងបក្សប្រជាធិបតេយ្យ។ ព្រឹទ្ធសភាមានអាណត្តិ ៦ឆ្នាំ ប៉ុន្តែសមាជិក១ភាគ៣ត្រូវផុតអាណត្តិ ហើយត្រូវជ្រើសរើសថ្មី នៅរៀងរាល់ ២ឆ្នាំម្តង។ ជារួម សមាជិកព្រឹទ្ធសភាថ្មីចំនួន ៣៥រូប (១ភាគ៣នៃសមាជិកសរុបទាំង ១០០) នឹងត្រូវជ្រើសរើសចេញពីការបោះឆ្នោត នៅថ្ងៃទី៣វិច្ឆិកា នេះ។ នៅក្នុងចំណោមអាសនៈ ទាំង ៣៥ ដែលត្រូវផ្លាស់ប្តូរ មាន ២៣ធ្លាប់ជាអាសនៈរបស់បក្សសាធារណរដ្ឋ ចំណែក ១២ អាសនៈ ធ្លាប់កាន់កាប់ដោយបក្សប្រជាធិបតេយ្យ។
ការរាប់សន្លឹកឆ្នោតនៅថ្ងៃយប់អង្គារ បង្ហាញថា គណបក្សប្រជាធិបតេយ្យ នៅគ្រប់គ្រងអាសនៈ ចំនួន ៤៧ ស្មើនឹងគណបក្សសាធារណរដ្ឋ។ ដើម្បីចូលគ្រប់គ្រងព្រឹទ្ធសភា ជាមួយ សំឡេងភាគច្រើនចំនួន ៥១ បក្សប្រជាធិបតេយ្យ ត្រូវដណ្តើមអាសនៈ៤ ពីគណបក្សសាធារណរដ្ឋ។ នៅមុនការបោះឆ្នោត អ្នកជំនាញធ្លាប់វាយតម្លៃថា អាសនៈចំនួន ១២ដែលបក្សសាធារណរដ្ឋធ្លាប់កាន់កាប់ អាចផ្លាស់ប្តូរ ធ្លាក់ទៅក្នុងដៃរបស់បក្សប្រជាធិបតេយ្យ។ ចំណែក អាសនៈ ២របស់បក្សប្រជាធិបតេយ្យវិញ នឹងអាចត្រូវបក្សសាធារណរដ្ឋប្រមូលយកវិញ។
ការចូលទៅគ្រប់គ្រងព្រឹទ្ធសភា គឺជារឿងសំខាន់មួយដែរ នៅក្នុងការបោះឆ្នោត កាលពីថ្ងៃទី៣វិច្ឆិកាម្សិលមិញ។ សព្វថ្ងៃនេះ គណបក្សសាធារណរដ្ឋ កាន់កាប់ព្រឹទ្ធសភា ដោយសារសំឡេង ៥៣ ទល់នឹង៤៧របស់បក្សប្រជាធិបតេយ្យ។ គណបក្សសាធារណរដ្ឋ ព្យាយាមការពារកៅអីរបស់ខ្លួន នៅតាមរដ្ឋសំខាន់ៗ ព្រោះគេជឿថា បើសិន គណបក្សប្រជាធិបតេយ្យដណើ្តមបានសំឡេងភាគច្រើន ចូលគ្រប់គ្រង ព្រឹទ្ធសភា និងរដ្ឋសភា នោះលោកដូណាល់ ត្រាំ មកពីគណបក្សសាធារណរដ្ឋ នឹងអាច ជួបឧបសគ្គច្រើន ក្នុងការសម្រេចចិត្ត ដូចជាការសម្រេចកញ្ចប់ថវិកាជាតិ ក្នុងករណី លោកឈ្នះឆ្នោត ធ្វើជាប្រធានាធិបតី អាមេរិកមួយអាណត្តិទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ