សហរដ្ឋអាមេរិកបានដកចលនាមូស្លីមចិនឈ្មោះ Etim ចេញពីបញ្ជីអង្គការ ភេរវនិយម
នៅថ្ងៃសុក្រ ទី៦ វិច្ឆិកា សហរដ្ឋអាមេរិកបានប្រកាសពីការដកចលនាមូស្លីមចិនឈ្មោះ Etim ចេញពីបញ្ជីអង្គការភេរវនិយម។ ប្រមុខការទូតអាមេរិកលោកម៉ៃ ប៉ុមប៉េអូបានបញ្ជាក់ថា អាមេរិកលែងចាត់ទុកចលនា Etim អង្គការភេរវនិយមទៀតឡើយ។ ចិនតាមរយៈអ្នកនាំពាក្យក្រសួងការបរទេសបានបញ្ចេញប្រតិកម្មខ្លាំងៗប្រឆាំងនឹងការសេចក្តីសម្រេចរបស់ក្រុងវ៉ាស៊ីនតោន។ គួររម្លឹកថា រដ្ឋាភិបាលក្រុងប៉េកាំងតែងចោទចលនា Etim ពីបទបង្កអំពើភេរវកម្មនៅក្នុងតំបន់ស្វយ័តស៊ីជាំងដែលសម្បូរដោយប្រជាជនអ៊ុយហ្គួ អ្នកកាន់សាសនាអ៊ីស្លាមរស់នៅ។
ចុះផ្សាយនៅថ្ងៃ៖
ស្តាប់ - ០២:២៧
ការសម្រេចដកចលនាមូស្លីមចិនឈ្មោះ Etim ត្រូវបានអ្នកនាំពាក្យក្រសួងការបរទេសអាមេរិកលើកយកហេតុផលទៅពន្យល់ថា អស់រយៈពេលជាង ១០ឆ្នាំកន្លងទៅដែលគ្មានភស្តុតាងបញ្ជាក់ពីការបន្តមានជីវិតរបស់ចលនានេះទៀតឡើយ។ គួររម្លឹកថា ចលនាមូស្លីមចិន Etim ត្រូវបានអាមេរិកក្នុងជំនាន់ប្រធានាធិបតីលោក George W.Bush បញ្ចូលទៅក្នុងបញ្ជីខ្មៅនៃក្រុមអង្គការភេរវនិយមកាលពីឆ្នាំ ២០០៤ នៅក្នុងយុទ្ធនាការប្រយុទ្ធប្រឆាំងនឹងភេរវនិយម។ តែសម្រាប់ចិនវិញ ចលនាមួយនេះនៅបន្តមានជីវិត និងបន្តមានសកម្មភាពនៅឡើយ។ អ្នកនាំពាក្យក្រសួងការបរទេសចិនបានបញ្ចេញប្រតិកម្មខ្លាំងៗប្រឆាំងនឹងការសម្រេចអាមេរិកដោយអំពាវនាវឱ្យអាមេរិកបញ្ឈប់ការរំលោភបំពានលើការប្តេជ្ញារបស់ខ្លួនស្តីពីកិច្ចសហប្រតិបត្តិការប្រឆាំងនឹងភេរវនិយមអន្តរជាតិ។
រដ្ឋាភិបាលក្រុងប៉េកាំងតែងចង្អុលមុខចលនា Etim ពីបទបង្កអំពើភេរវកម្មនៅក្នុងខេត្តស៊ីជាំងដែលរស់នៅភាគច្រើនដោយពួកអ៊ុយហ្គួ អ្នកកាន់សាសនាអ៊ីស្លាម។ តែក្រុមអ្នកជំនាញបានអះអាងថា ចិនមិនដែលបានលើកយកភស្តុតាងទៅបង្ហាញ និងទៅបញ្ជាក់ពីការបង្កអំពើភេរវកម្មរបស់ចលនាមូស្លីម Etim នៅក្នុងខេត្តស៊ីនជាំងម្តងណាទេ។ យ៉ាងណាក៏ដោយ ក្រុមអ្នកការពារសិទ្ធិមនុស្សឈ្មោះ « Uighur Human Rights Project » ដែលមានទីស្នាក់ការក្នុងក្រុងវ៉ាស៊ីតោនបានសាទរលើការសម្រេចចិត្តរបស់អាមេរិកពីការដកចលនា Etim ចេញពីបញ្ជីអង្គការភេរវនិយម។
លោក Omer Kanat នាយកអង្គការសិទ្ធិមនុស្ស « Uighur Human Rights Project » បានធ្វើអត្ថាធិប្បាយថា ការលើកឡើងរបស់ចិនពីការគំរាមកំហែងរបស់ចលនា Etim នៅស៊ីនជាំងគ្រាន់ជាលេសដើម្បីធ្វើបាបលើពួកអ៊ុយហ្គួ។ តាមក្រុមអង្គការសិទ្ធិមនុស្ស ចិនបានឃុំពួកអ៊ុយហ្គួជាង ១លាននាក់នៅក្នុងជំរំលត់ដំមួយដ៏ធំ។ តែចិនតែងចេញមុខបដិសេធ និងបញ្ជាក់ច្រើនដងថា ជំរំនោះជាមជ្ឈមណ្ឌលអប់រំវិជ្ជាជីវៈ។ ក្រុមសមាជិកព្រឹទ្ធសភា សភាអាមេរិកមួយក្រុមមកពីគណបក្សសាធារណរដ្ឋ និងគណបក្សប្រជាធិបតេយ្យស្នើឲ្យទម្លាក់កំហុសដាក់ចិនដាក់ទោសចិនពីបទប្រល័យពូជសាសន៍លើអ៊ុយហ្គួ និងសហគមន៍អ្នកកាន់សាសនាអ៊ីស្លាមដទៃទៀតនៅចិនដែលរងគ្រោះដោយការគាបសង្កត់។ សេចក្តីព្រាងច្បាប់មួយត្រូវបានក្រុមសមាជិកព្រឹទ្ធសភា និងសភាអាមេរិកស្នើឡើងកាលពីដំណាច់ខែតុលា និងកំពុងរង់ចាំការជជែក ពិភាក្សានៅក្នុងសភា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ