អាមេរិក៖ ចំនួនភេរវកម្មនៅលើពិភពលោកកើនឡើង ៣៥ភាគរយ នៅឆ្នាំ ២០១៤
នៅឆ្នាំ ២០១៤ អំពើភេរវកម្មនៅក្នុងពិភពលោកបានកើនឡើងខ្លាំង ប្រមាណ ៣៥ភាគរយ បើប្រៀបធៀបនឹងឆ្នាំ ២០១៣។ នេះបើតាមរបាយការណ៍របស់ក្រសួងការបរទេសអាមេរិក ចេញផ្សាយ នៅថ្ងៃសុក្រទី ១៩មិថុនា។ របាយការណ៍របស់ក្រសួងការបរទេសអាមេរិកបានលើកឡើងផងដែរ ពីវត្តមាន ពង្រីកឥទ្ធិពលរបស់ក្រុមជីហាត នៃអង្គការរដ្ឋអ៊ីស្លាម ដែលកំពុងបាំងលុបពីលើបណ្តាញអាល់កៃដា ដែលជាក្រុមភេរវនិយមក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
នៅក្នុង របាយការណ៍ឆ្នាំ ២០១៤ស្តីពីភេរវកម្ម ក្រសួងការបរទេសអាមេរិកបានរកឃើញ មានអំពើភេរវកម្ម ចំនួន ១៣ ៤៦៣ ដែលបានសម្លាប់មនុស្ស៣២ ៧០០នាក់។ តួលេខនេះបង្ហាញថា ក្នុងរវាងតែ១ឆ្នាំ ចំនួនភេរវកម្មបានកើនឡើង ៣៥ភាគរយ ចំណែក ជនរងគ្រោះស្លាប់ នៅក្នុងអំពើភេរវកម្ម កើនឡើង ដល់ទៅ ៨០ភាគរយ។
បើនិយាយពីការប្រកួតប្រជែងធ្វើភេរវកម្ម បណ្តាញភេរវនិយមអាល់កៃដា ត្រូវវ៉ាដាច់ដោយ អង្គការរដ្ឋអ៊ីស្លាមដែលកំពុងធ្វើសង្រ្គាម ដណ្តើមទឹកដីក្នុងប្រទេសស៊ីរី និងអ៊ីរ៉ាក់។ បន្តិចម្តងៗ ក្រុមនេះ ដែលមានទីតាំងតែនៅក្នុងទឹកដីស៊ីរី និងអ៊ីរ៉ាក់ បានចេញមុខប្រកាសទទួលខុសត្រូវលើអំពើភេរវកម្ម មិនថា នៅក្នុងប្រទេសយេម៉ែន អ៊ីរ៉ាក់ លីប៊ី ឬសូម្បីអាហ្វហ្កានីស្ថាន ដែលធ្លាប់ជាទីតាំងរបស់ក្រុមអាល់កៃដា ក្រុមភេរវកម្មពិភពលោក។ តាមរបាយការណ៍របស់ក្រសួងការបរទេសអាមេរិក ភេរវកម្ម របស់ក្រុមជីហាត ទៅលើគុកក្នុងម៉ូស៊ូល ប្រទេសអ៊ីរ៉ាក់ ដែលបានសម្លាប់អ្នកកាន់សាសនាស៊្ហីអ៊ីត ៦៧០នាក់ គឺជាភេរវកម្មសម្លាប់មនុស្សច្រើន មិនធ្លាប់មាន នៅក្រោយភេរវកម្មក្នុងក្រុងញូវយ៉កបង្កឡើងដោយក្រុមអាល់កៃដា។
ក្រៅតែពីអំពើហិង្សាសម្លាប់មនុស្ស ក្រសួងការបរទេសអាមេរិក បារម្ភផងដែរ ពីការរីកធំធាត់លឿនស្លេវ របស់ក្រុមជីហាតនៃអង្គការរដ្ឋអ៊ីស្លាម។ គឺថា ក្រុមនេះ បានអូសទាញការចូលរួមគាំទ្រ មិនថា ពីយុវជនអ៊ីស្លាមជ្រុលនិយម ឬពីក្រុមប្រដាប់អាវុធ នៅទូទាំងពិភពលោក។ តាមក្រសួងការបរទេសអាមេរិក ក្រុមជីហាត ចេះឆ្លៀតឱកាសយកជម្លោះប្រដាប់អាវុធ អស្ថិរភាពនយោបាយ ឬការចុះខ្សោយរបស់រដ្ឋាភិបាល ក្នុងប្រទេស ដូចជានៅស៊ីរី អ៊ីរ៉ាក់ យេម៉ែន លីប៊ី ឬ នីហ្សេរីយ៉ា ដើម្បី ពង្រីកបណ្តាញ ចាក់គ្រឹះឥទ្ធិពលរបស់ខ្លួន។ ក្រុមជីហាតនៃអង្គការរដ្ឋអ៊ីស្លាម នៅចេះប្រើបណ្តាញសង្គមក្នុងអ៊ីនធ័រនែត ដើម្បីអូសទាញ យុវជនបរទេស ឲ្យទៅចូលរួមប្រយុទ្ធក្នុងក្រុមខ្លួន។ តាមរបាយការណ៍អាមេរិក គិតត្រឹមចុងឆ្នាំ២០១៤ គេរកឃើញ មានទាហានបរទេស នៅក្នុងជួរកងទ័ពជីហាត ដល់ទៅ ១៦ ០០០នាក់ គឺច្រើនជាងជនបរទេស ដែលធ្លាប់បានទៅប្រយុទ្ធនៅអាហ្វហ្កានីស្ថាន ប៉ាគីស្ថាន អ៊ីរ៉ាក់ ឬសូម៉ាលីទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ